Job 3 - Papang Yulni

Job, witing dutni kalahna kidika yulni yulna

^1-2 Ap dai kaupak, mahka Job yulbauwadai, batahndana mani kidika dutni kulwadai.

Job

³ ¡Dutni palniki kidika puknita muih kalnayang dai kidika! ¡Dutni ki batanh danayang mani kidika!

⁴ ¡Yamni dai, kidika mani puksani lakna dai kat, dawak kaput laih Papang yaklauwi kalawak bayakwi kiwitdai, dawak kidika puknita ban kaput payahlawas atnindai!

⁵ ¡Yamnikitdai puksani tubakni as kalawak puklakna dai kat laih, kidika awasbik mukus sani as duailakna katlaih, kidika awasbik waiku dikaswa kaput bik kalwak yamadunin parasni as bitik kau yamaduduwitdai!

⁶ ¡Yamnikitdai kidika pukta, puksani nuhni yakat disna katlaih, kidika mani laih kulnin awasdai, waiku balna pasyakat dawak kurih balna pasyakat bik!

⁷ ¡Yamni dai, kidika puknita minik yakwasdai katlaih, dis atnindai alasna duwi sarahnin kidika!

⁸ ¡Yamni kitdai, di talyang balna dutni yuyulna dai katlaih, kuma paskau di anyang, minitna yakat parasni nuhni duduwa kidika!

⁹ ¡Yamni kitdai mapiris balna kidika yaringni duduwasdai katlaih, kidika yaringni tani tahawa kidika bik kiwaskitdai, mapiris masar kalann bik tatalwaskitdai!

¹⁰ ¡Dutni palni ki kidika puknita batahn danayang kidika, di dis minikunni atnin kidika yang mikpa kaupak malwasdai!

¹¹ ¿Amput dawak nanangki bānipas yakat dautasyang dai, kidika awaskat batanh datayang minitni yakat?

¹² ¿Amput dawak kalki balna dunayang dai, dawak ta bik sunayang dai?

¹³ Yang daunayang dai katlaih waradika yamni amatus awaki, kulnik aslah awaki,

¹⁴ king balna dawak tunan nunuhni balna ū yayamwa balna karak,

¹⁵ kidika awaskat kabamint balna witingna ūnina yakat gol dawak lalah manah puwi babahngwa balna kidika karak.

¹⁶ ¿Amput dawak sau yakat yanunuwasdai, muih binina nanangnina bāni pasyakat dauwi dawak batanh dadawak nunuwa kapat?

¹⁷ Muih dudutni balna kidika laih sau ū yakat uiwi witni kat, dawak disuhna balna kidika laih sau ū yakat wingninata pupuhwi;

¹⁸ silak muihni balna laih kidika yakat kulninna lani aslah duduwi, dawak taninatuna disarahwa kidika baisa dakakawaski;

¹⁹ kidika yakat laih nunuhni balna, dawak dibinina balna kidika sihm aslah kapapatki, dawak warau muih dini yamyang kidika kaupak dakwi kalahna.

²⁰ ¿Amput dawak Papang yaklauwi dawak muih dutni wauhwa kidika ma yaringni talwi? ¿Ais yamwi sangnika kalawi baisa, tapalhni wauhwa muihni yakat,

²¹ daunin walwa muihni kidika yakat sip daunin kiwas kidika, gol disna kat walwa kapat tanit walwarang bik?

²² Kidika alni yakat alasnina kidika kiwi kawi, sau ū yakat kiwa mani kat.

²³ Papang yaklauwi yamwak minikpa dis lapakwi, dawak tani balna bitik putna ki.

²⁴ Kaidinin kidika laih yang kasnik, dawak yang dīnik kidika laih dalani wauhtayang kidika ki.

²⁵ Di bitik pasyakat yang yamadutayang dai kidika, dawak baisa tanit yamadutayang dai kidika, yang mikityakat bukna.

²⁶ Yang wingkita puhnik disyang, isinglak bik awaski, kulnik aslah lani bik yaktasyang, kauna kulnik abahlni manahki.