Jims 2 - Papang Yulni

Muih as kau dauh talnin kidika

¹ Wirah balna, manna Madakiwan Jisaskrais yakat kasak kultamana kidika, muihas kau nuhni kulnin dawak ūk kau laih dauh kulnin awaski.

^2-3 Yuldarang kat, manna kaluduhna bangmana, dawak muih diduyang as kiwarang, ting ānin gol dawak asnina kidika yamni palni karang, dawak yamni kalyamta kalyultanama: “Pa yamni akat aiwa yalahdah”, sihm minitni yakat muih minikunni prakni utuhni kat kiwi kawarang, dawak witing yakat laih kalyultanama: “Man laih yakat kasakni sak awah, kidika awaskat sau yakat yalahdah”;

⁴ kaput laih kulnin dutni karak yamtamana, muih as kau dauh kulnin kidika sakki.

⁵ Wirah balna, adika dakanauh: Papang yaklauwi walwi duna sau akat muih miniknakunni balna kidika, kaput laih duyang atnin kasak kulnin lani kidika, dawak witing kau dalani kaltatalwa balna kau pramis diyamna kidika witing kingni lani ridi yamna kidika dianin;

⁶ manna laih nawatkauh, sau yakat laktamana. ¿Di duyang balna kidika awasyah manna manamamalwa kidika, dawak wihta balna yakat manamurwi uiwakidika?

⁷ ¿Witingna awasyah ayangni yamni kidika yulni manasumamalwak witingna dutni yuyulna dai kidika?

⁸ Manna yamni yamtanama, lā nuhni yulwa kaput yamtanama kat, Ulna kau yulwa kaput: “Man yaihmat kau muih balna kidika dalani talah sihm man muihma kapat.”

⁹ Kaunah muih as kau nuhni kultanama dawak ūk yakat laih dauh kultanama kat, dutni yamtamana, kaput kat Papang lāni niningyakat pāt dutanama.

¹⁰ Muih as witing lā yulwa kidika bitik yamwarang kaunah kidika, pasyakat as yamwas dawarang kat, lā ūk balna bitik nining yakat witing kidika pāt duwi.

¹¹ Kat sihm Papang yulna: “Marid lāni bahwinih”, dawak bik yulna: “Iwinih.” Kaput bahang, muih as marid bahwas ki, kaunah muih iwarang kat, lā minit bayakwi yamna.

¹² Manna laih lā mailaihwi yakwa kidika yakat muih lanina yayamwak yulbabauwa kapat dawak yayamwa kapat bik yamnamna ki.

¹³ Kidika balna muih ūk yakat minikun tatalwas kidika lanina yamwarang ki, kaunah muih minikun tatalwa balna kidika laih, la yamwarang yakat minit bayayakwarang.

Yamnin dawak dauh yul manah awaski

¹⁴ Wirah balna, ¿ais ilp as yah muih as kasak kulnin lani duwi atnin kidika, warkni balna yamwas kat? ¿Kidika kasak kulnin yaklauwi kallaihwi yakwarahng?

¹⁵ Yuldarangkat, mawirahki al kidika awaskat yal karangpa asna dis karang dawak kasnin bik dis karang kat;

¹⁶ manna kalyultanama: “Tala yamni yawah, kalmuktah, dawak kasnam bik kaskihman yakat kastah”, kaunah witing muihni nuhni dukih kalawa kidika kalatasman kat, ¿ais as ilpyah?

¹⁷ Kasak kulnin kidika bik kaput ki: yulni manah yuldakat, warkni balna bik yamdaskat, kidika laih dauna ki.

¹⁸ Muih as sipkarang yulnin: “Man kasak kultaman dawak yang laih warkni balna kidika yamtayang. Dawak kasak kultaman kidika nikingkatah warkni yamtas; dawak yang laih namangkaki kasak kulnin kidika warkni balna karak.”

¹⁹ Man kultaman Papang aslah yah, dawak adika yamni yamtaman kultamahn; kaunah spirit dutni balna bik rahm kukulwi dawak yamaduduwi.

²⁰ Mutu atnah, amanglatah muih as kasak kulnin duwa kidika warkni yamwaskat, kidika laih kasak kulnin as dauh ki.

²¹ Papang yaklauwi Abraham yakat lā kat kalkulna, mamuihkibarak yakat, bahang witing walanibis Isaac yakat sakripais yamna dai kidika yulni.

²² Talnam sipki, Abraham yamna kidika, witing kasak kulnin duwa kidika wark yamna, dawak witing yamwa balna kidika kau kasak kulnin duwa kidika barangni dai.

²³ Kaput kaiwi kalahna Ulna yakat yulwa kidika: “Abraham Papang yakat kulna, kidika bahang Papang yaklauwi lā kat muihni kalkulna.” Dawak Abraham kidika Papang karak kaltalyang yamni kalahna dai.

²⁴ Manna talamana, Papang yaklauwi muih al yakat lā kat kalkulwi warkniyamwa balna kidika karak, kasak kulwa manah laih awaski.

²⁵ Rahab karak sihm kaput kalahna, ahal manas karak kalangyang yalni kidika; Papang yaklauwi lā kat yamyang muihni kalkulna, warkni yamna kidika yulni, yul duwi uiyang muihni balna yakat pa diana payahnin, ilp diawak ta ūk munah kalahwi uina.

²⁶ Bitik parahni yamnin kat: muihni nuhni kidika spirit dis kat dauna ki, kaput bik laih kasak kulnin kidika warkni dis kat dauna ki.