Jan 20 - Papang Yulni

Sau-ū pāni manah

¹ Kidika wīkni ma tatuna yakat, Mery Magdalin witing mapiris palni sau- ū yakat kiuna, baisa apis puksani dai; bahang talwakat panikungmak kau kipala kakna sakdai kidika kahrwi lapamna dai.

² Bahang witing kidika talwi kiri kiuna Saiman Pita, dawak disaipil Jisas yaklauwi tanit dalani talwadai yakat bik, dawak diyulna: —¡Sau-ū kaupak Dawan dai kidika duwi uina, amangladaski angkat duwi uinapa!

³ Pita dawak disaipil ūk kidika karak kalahwi uina sau-ū yakat.

⁴ Albupak kiri uina papatni; kaunah as kidika laih tanit kirana Pita karak dawakat, bahang tatuna kiwikana sau-ū yakat.

⁵ Abukwi talna, dawak kidika yakat asna sisitna dai kidika tusdai, kaunah kāwasdai.

⁶ Witing dangnit kaupak Saiman Pita kiwi kana, dawi sau-ū yakat kawi kiuna. Dawak witing bik talna asna sitna balna dai kidika;

⁷ dawak baisa minit yakat, Jisas tunan balalakna asnina dai kidika, asna ūk piririna dai kidika karak libitni bang-awasdai, piriwi dawi silp lakna dai.

⁸ Kaput laih disaipil as dai kidika bik kawi kiuna, tatuna sau-ū yakat kiuna dai kidika, di balna kalahna kidika talna dawak kasak kulna.

⁹ Kat Ulna balna dai kidika amanglawasdai bahang, kat witing laih dauna kaupak yaklaunin dai kidika.

¹⁰ Kidika usnit kat disaipil balna dai kidika nawatwi uina ūnina kau.

Jisas kidika lāih kalahwi Mery Magdalin yakat

¹¹ Mery kidika laih ahni yakat watna dai, sau-ū yaihnit yakat, bahang kaput laih kaidasakdai. Dawak kaida sakkauna abukwi talna pasyakat,

¹² bahang witing talwak insal bu raudai praknina kidika pihni kat kana, bahang witingna laih yalahna raudai, Jisas lalakna pāni dai yakat; as kidika tunan niningyakauh, dawak ūk kidika laih kalnisut niningyakauh.

¹³ Insal balna yaklauwi kalyulwi dakakana: —Yal, ¿ais yulni aidamahn? Yal kidika yaklauwi diyulna: —Yang Dakiwan kidika duwi uina, amanglatasyang angkat duwi uinapa.

¹⁴ Kidika yulwa minitni yakat, wiryaklawi talwak Jisas sakdai, kaunah amanglawasdai witing kidika.

¹⁵ Jisas yaklauwi kalyulwi dakana: —Yal, ¿ais yamta aidamahn? ¿Wais waltamahn? Witing kulna laih kidika pāni maintalwa muihni kulna, bahang kalyulna: —Dawan, man duyawanaman kat, yayultah angkat laknamahn, yang yawik walnik.

¹⁶ Kaput laih Jisas yaklauwi kalyulna: —¡Mery! Yal kidika wiryaklawi hibru yulni kau kalyulna: —¡Rabuni! (kidika tanka laih: “Maestro”).

¹⁷ Jisas yaklauwi kalyulna: —Yalaihwinih, kat baisa Papangki yakat yawik kalpaktasyangna bahang. Kaunah yawa wirahki ahal balna yakat diyultah, yang Papangki yakat yawik kalpaktanaki ki, bahang kidika laih manna bik Papangmana.

¹⁸ Kaput laih Mery Magdalin kidika kiwi disaipil balna yakat diyulna, Dawan talna kidika, dawak bik diyulna kalyulna yulni dai kidika.

Jisas disaipil balna yakat lāih kalahwi

¹⁹ Kidika mani puklakwak, wīk tatuna yakat, disaipil balna kidika kaluduhwi dawi dūrnina kidika puputna dai, lā muihni Ju balna kidika yamaninaduduwa kidika yulni. Jisas kiwi kawi disainipil balna bangkidika papus yakat yaklauna, dawi diparasna: —¡Kulnin aslah manna karak!

²⁰ Kidika yulwi usnit kat, ningnakana tingni balna dawak pirini kidika bik. Dawak witingna Dawan talwi alasna kalalahna.

²¹ Kidika usnit kat watwi Jisas diyulna: —¡Kulnin aslah manna karak! Papang yaklauwi yasihna kapat, yang bik manna yakat manasihtayang.

²² Dawak witingna minitna yakat puhwi diyulna: —Spirit Holi kidika dutanauh.

²³ Wais balna yakat dutnina datanang disna karang kat, kidika laih dutnina dawak disna karang; dawak wais balna yakat dutnina datanang diswas karang kat, dutnina dawak diswas karang.

Tomás talna Jisas dauna kaupak yaklauna kidika

²⁴ Tomás, disaipil balna paskaupak as dai kidika, dawak sūtki kalahwadai kidika, sak-awasdai Jisas kiwi kana yakat.

²⁵ Usnit kat disaipil ūk balna yaklauwi kalyuyulna: —Yangna Dawan talnayangna. Kaunah Tomás yaklauwi diyulna: —Tingni yakat silak papana kidika talasyang kat, dawak pirini kau yakat bik tingki uhr-atik talasyang kat, sip kultas awaki.

²⁶ Ma tiaskaubās bayakwak, disaipil balna kidika ū as kau kalududuhna, kidika yakat laih Tomás bik sakdai. Dūr balna kidika puputna dai, kaunah Jisas kawi yaklana, dawak papusyakat yaklauwi, diparaswi yulna: —¡Kulnin aslah manna karak!

²⁷ Kidika usnit kat Tomás yakat kalyulna: —Tingma bikis akat uhr-ata dakah, dawak bik tingki balna adika talah; tingma uhr-ata dakah piriki akat. Kulwas atna; ¡kultah!

²⁸ Kaput dawak Tomás yulna: —¡Yang Dawanki, yang Papangki!

²⁹ Jisas yaklauwi kalyulna: —¿Kasak kultamahn yatalada bahang? ¡Yamni ki talwas kaunah rahm kukulwa kidika!

Ais yulni adika wauhnitaya ulnayah

³⁰ Jisas sain manas yamna disainipil balna muhnina yakat, kidika balna laih adika wauhnitaya akat ulwas ki.

³¹ Kaunah adika balna ulna, manna kasak kulnamna Jisas laih Mesías, Papang Walanibis, kaput laih witing yakat kulta sangka ban atnin kidika dutanama witing munah.