Jan 19 - Papang Yulni

¹ Kaput dawak Pailat yaklauwi pakwak Jisas yakat wiwisna.

² Dawak, soldado balna yakat kraunni as yayamna, dawak Jisas tunan yakat papakna, dawak prakni pauni kat ahana dai.

³ Usnit kat, yaihnit yakat uiwi kalyulwi dakakana: —¡Ju balna Kingnina sangka kawang! Dawak muhni yakat wiwisna dai.

⁴ Pailat watwi ahni yakat kalahwi diyulna: —Talnauh, akat duaitayang, kaput laih manna amanglanamna, witing yakat di dutni as bik yaktasyang.

⁵ Kaput laih kalahna Jisas, witing tunan yakat wakal kraunni kidika pakna dai, dawak witing prakni kidika pauni kat ahana dai. Pailat yulna: —¡Yakat kidika alni dutamana!

⁶ Sumalyang balna taninatuna, makatyulnin ūni maintalyang balna kidika tatalna kat parasni sarahwi yuyulna: —¡Pan prihni yakat patah! ¡Pan prihni yakat patah! Pailat yaklauwi diyulna: —Manna duyawa, pan prihni yakat patanauh, kat yang laih witing yakat dutni as bik yaktayang bahang.

⁷ La muihni Ju balna kidika nangnitlalana: —Yangna lā as dutayangna, bahang yangna lākina kat daunin ki, kat witing laih Papang Walanibis kapat kaldakana bahang.

⁸ Pailat kidika dakawi, baisa yamaduna.

⁹ Ūni yakat kawi kiwi, baisa Jisas yakat kalyulwi dakana: —¿Man angkaupakmahn? Kaunah Jisas yaklauwi nangnitlawasdai.

¹⁰ Pailat yaklauwi kalyulna: —¿Nangkitlatas awamayah? ¿Man amanglatasmahn, yang la parasni dutayang kidika pan prihni yakat mapanik, sihm kaput bik malaihtik yaknik?

¹¹ Kaput dawak Jisas yaklauwi nangnitlana: —Yang mikit yakat lā parasni as bik dis awama, Papang yaklauwi mawas katlaih; kidika bahang, angdik muihni yaklauwi man tingma yakat yahana kidika tanit dutni duwi, man karak dawakat.

¹² Kidika minitni kaupak, Pailat witing tanka walna Jisas kidik uluhna atnin; kaunah Ju balna yaklauwi parasni kalsararahna: —¡Uluhma karang kat, king tanit nuhni karak kaltalyang yamni awasman! ¡Wais muihni kat king kaldakawa kidika, king tanit nuhni karak kalwaihla kalwi!

¹³ Pailat kidika dakawi, Jisas kidika yakna, usnit kat la yamwa pāni yakat yalahna, hibru yulni kau laih Gabata, kidika tanka laih: kipala kau yamna kidika.

¹⁴ Kidika laih insal kaiwi bayakna mani kidika tanitkauh dai, matunak kapat dai. Pailat Ju balna yakat diyulna: —¡Yakat manna kingmana dutamana!

¹⁵ Kaunah witingna sararahna: —¡Kangyaktah! ¡Kangyaktah! ¡Pan prihni yakat patah! Pailat yaklauwi diyulwi dakana: —¿Kingmana kidika pan prihni yakat paki katpah? Dawak sumalyang balna taninatuna nangnitlalana: —¡Yangna laih king as bik disyangna kaunah, king tanit nuhni kidika manah dutayangna!

¹⁶ Kaput laih Pailat yaklauwi Jisas kidika diana dai, pan prihni yakat pana atnin, dawak witingna duwi uina.

Jisas pan prihni yakat papana

¹⁷ Jisas kalahwi panan prihni trukwi kiuna, “Muih tunan wakalni” kidika pāni yakat (Hibru kau laih Gólgota).

¹⁸ Kidika yakat pan prihni kau papana, dawak muih ūk bu karak ilwi papana, pirini nakaskau, nakaskau, kaput laih Jisas kidika papus yakat witdai.

¹⁹ Pailat ulna dai aput: “Jisas Nazaret kaupak, Ju balna Kingnina”, dawak kidika sihwak duwi uiwi, Jisas panan prihni mayakat papana dai.

²⁰ Ju balna manas ulna kidika yulwi tatalna, kat Jisas papana pāni kidika laih tawan nuhni yaihnit yakat dai bahang, dawak ulna kidika laih hibru, latin dawak grik kau bik ulna dai bahang.

²¹ Kaput bahang, sumalyang taninatuna Ju balna kidika Pailat yakat kalyuyulna: —Ulwinih: ‘Ju balna Kingnina’, kaunah ultah: ‘Yulna, witing laih Ju balna Kingninayang atna’.

²² Kaunah Pailat yaklauwi diyulna: —Ulnayang kidika laih, kaput ban karang.

²³ Soldado balna yaklauwi Jisas kidika pan prihni yakat papana usnit kat, asnina kidika duwi pīsni arungka bibisna, soldado balna kidika as as dinina. Dawak prakni nuhni kidika bik duduna, kaunah kidika laih biwas barangni aslah yamna dai, makaupak saukat,

²⁴ soldado balna kidika biri biri yuyulna: —Bisdas kawang, kaunah suerte ruhmdi taldang, wais yakat bukwarangpa. Ulna yakat kaput kalahna, yulwa kidika: “Prakki kidika witingna biswi duduna, dawak prakki nuhni kidika laih suerte ruruhmna.” Soldado balna kidika yayamna.

²⁵ Pan prihni yaihnit yakat Jisas nanangni kidika sakdai, nanangni wirahni yal kidika, Mery, Cleofas yalni, dawak Mery Magdalin.

²⁶ Jisas nanangni yakat talna, dawak yaihnit yakat sakdai disainipil dalani palni talwa kidika, dawak nanangni yakat kalyulna: —Yal, yakat walamabis al kidika dutaman.

²⁷ Kidika usnit kat disainipil yakat kalyulna: —Yakat nanangma dutaman. Kidika kaupak, disaipil ūni yakat duna dai.

Jisas dauna

²⁸ Kidika usnit kat, Jisas witing amanglana bahang, di balna kidika bitik laih kalahna bahang, ulna yakat kalahnin yulni, yulna: —Dikih yawi.

²⁹ Kidika yakat wain sapahni pupuna buhng sakdai. Di yudutni kau susuihna wain sapahni kidika pan as walapni kidika tingni rahni as sutni yakat sitwi dawi, Jisas tinpas yakat ahana.

³⁰ Jisas wain sapahni kidika diwi, yulna: —Di bitik laih yamna ki. Kidika usnit kat tunan kidika abukna, dawak spiritni kidika kalana dai.

Jisas pirini yakat langsa papana

³¹ Kidika laih insal kaiwi bayaknin kidika tanitkauh ma as dai, Ju balna kidika dukih diawasdai, muih muihni kidika ban pan prihni yakat wit atnin, urupnin mani, kat kidika urupnin mani laih tanit nuhni kulna dai bahang. Kidika bahang Pailat yakat papakna pan prihni yakat papana balna kidika barahninamak bahna atnin, dawak muihni balna kidika bik, kidika kaupak lakna atnin.

³² Kaput laih soldado balna kidika uiwi tatuna witkidika barahnimak balna kidika wiswi babahna dai, dawak ūk as Jisas yaihnitkau papana witdai kidika bik kaput kalyayamna dai.

³³ Kaunah Jisas yaihnit yakat uiwi tatalwak uman dauna dai. Kidika bahang barahnimak balna babahwas dadana.

³⁴ Kaput kaunah, soldado balna kidika as yaklauwi pirini yakat langsa kau pana, dawak was, ā karak kalahna.

³⁵ Adik yulwa kidika laih, as talna kidika yulwi, dawak di rahm yulwi; witing amanglawi rahm yulwa kidika, kaput laih manna bik kulnamna.

³⁶ Adika dini balna kalahna, ulna yakat kaiwi kalahnin yulni: “Wakalni as bik babahwas karang.”

³⁷ Dawak ulna ūk yakat yulwa kidika: “Talah pawi ahllalana kidika.”

Jisas nununa

³⁸ Kidika usnit kat, José, Arimatea kaupak kidika, Pailat yakat kalyulna kalawak Jisas muihni kidika duwi kiuna atnin. José laih Jisas disainipil dai, kaunah malnikau dai, Ju balna yamaninaduwa kidika yulni. Dawak Pailat yaklauwi kalana, dawak José kiwi Jisas muihni kidika duwi kiuna.

³⁹ Nicodemo bik, pukta as Jisas yakat kiwi yulbauna dai kidika, dia walapni kilo 30 duwi kiuna, kidika laih mirra dawak aloe karak bahana dai.

⁴⁰ Kaput laih José dawak Nicodemo karak Jisas muihni kidika duwi uina, dawak asna balaknin dini balna kidika dia walapni kau suihwi dawi wadadatna, Ju balna muih dauwak amput nunuwa kidika kaput.

⁴¹ Jisas pan prihni papana yaihnit yakat di dadahna pāni as pakdai, dawak kidika yakat sau-ū wisam as yayamna sakdai, kidika yakat muih as bik ahawasdai.

⁴² Kidika yakat Jisas muihni kidika uiwi ahana, kat yaihnit yakat dai bahang, dawak bik Ju balna urupninna mani kidika uman kaiwi kawadai bahang.