Jan 18 - Papang Yulni

Jisas lalaihna

¹ Kidika yulna usnit kat, Jisas disainipil balna karak kalahwi kiuna, Cedrón wasni nakas yakat. Di dadahna pāni as pakkat yakat uiwi kakana, Jisas disainipil balna karak.

² Judas bik, witing yaklauwi daunin yakat āwadai kidika, amanglawādai kidika pani, kat Jisas wat wat kidika pāni yakat disainipil balna karak kalududuhwādai bahang.

³ Kaput laih Judas witing soldado balna duwi kiuna, dawak makatyulnin ūni maintalyang balna bik uina dai, kidika laih sumalyang balna dawak parisi balna bik yaklauwi sisihna dai. Kalbaunin dini duwi uina, dawak awas bik dahlwi uina dai.

⁴ Kaunah Jisas laih amanglawadai bahang di kalkalahwarang kidika witing yakat, kalahwi diyulwi dakana: —¿Wais waltamanah?

⁵ Witingna yaklauwi nangnitlalana: —Jisas Nazaret kaupak kidika. Jisas yulna: —Kidika laih yang. Judas, witing yaklauwi īnin tingni yakat āwa kidika bik likdai witingna karak.

⁶ Jisas kaput diyulwak: “Kidika laih yang”, witingna dangsani uiwi bubukna sau yakat.

⁷ Jisas watwi diyulwi dakana: —¿Wais yakat waltamanah? Dawak witing watwi yuyulna: —Jisas Nazaret kaupak kidika.

⁸ Jisas watwi diyulna: —Uman manayulnayang, kidika laih yang. Manna yawaltamana kat, adika balna datanang uiwang.

⁹ Adika kalahna, Jisas yulna dai yakat kaiwi kalahnin dai bahang: “Papang yanaman balna dai kidika as bik diswasdai.”

¹⁰ Kaput laih Saiman Pita, witing isparah as duwadai kidika, yakwi kidika balna paskaupak as tapani dakna tingnipal niningkauh kidika, bahang ayangni laih Malco, kidika lani laih sumalyang nuhni dini yamyang as dai.

¹¹ Jisas yaklauwi Pita yakat kalyulna: —Ismaparah kidika pāni yakat atah. Papang ki yaklauwi adika dinin tapahlni yāwakat, ¿yang dinik awaskatpah?

Jisas Anás muhni tani yakat

¹² Soldado balna kidika, taninatuna karak, dawak Ju balna makatyulnin ūni maintalyang balna karak, Jisas kidika laihwi sisitna dai.

¹³ Tatuna laih Anás ūni yakat duwi uina, kat witing laih Caifás unisah dai bahang, kidika kurihni balna yakat witing kidika sumalyang nuhni dai.

¹⁴ Adika Caifás kuduh Ju balna yakat diyulna dai kidika, tanit yamni ki muih al aslah dauwarang kidika tawan yulni.

Pita, yulna Jisas kidika talwas ki

¹⁵ Saiman Pita dawak disaipil ūk balna kidika Jisas usnit yakat uina. Disaipil ūk kidika laih sumalyang nuhni kidika amanglawadai, kidika bahang Jisas karak ū yakat uiwi kakana;

¹⁶ kaunah Pita laih ahni yakat watna, dūr yakat. Kaput bahang, disaipil as sumalyang nuhni yaklauwi amangnilawa dai kidika kalahwi yulkalbauna dūr maintalyang yakat, dawak Pita kidika kalawak kana.

¹⁷ Dūr maintalyang kidika Pita yakat kalyulwi dakana: —¿Man kidika alni disainipil asman awasyah? Pita yaklauwi nangnitlana: —Dikah, dikah yang awaski.

¹⁸ Sanni lakwasakdai bahang, dinina yamyang balna dawak makatyulnin ūni maintalyang balna kidika kuh bibina dai, bahang kidika yakat kalpuihwa bangdai. Pita bik witingna karak kuh yaihnit yakat kalpuihwa sakdai.

Sumalyang nuhni kidika Jisas yakat kalyulwi dakana

¹⁹ Sumalyang nuhni kidika yaklauwi Jisas yakat kalyulwi dakana, disainipil balna yulnina dawak, witing ais sumalwadai kidika.

²⁰ Jisas yaklauwi kalyulna: —Yang muih balna muhnina yakat maltas yulbaunayang; sumamalwa ūni yakat sumaltayang dai, dawak makatyulnin ūni yakat bik, kidika yakat Ju balna kidika kalududuhwādai, kaput bahang yul mani as bik yultasyang dai.

²¹ ¿Ais yamta yayulta dakaman yang akat? Yulting dakakana balna yakat diyulta dakah, dawak witingna mayuyulwarang ais yulbaunayang kidika. Witingna amanglalawi ais yulbaunayang kidika.

²² Jisas kaput yulwak, makatyulnin ūni maintalyang as yaklauwi Jisas muhni yakat tisna, dawi kalyulna: —¿Sumalyang nuhni yakat kaput nangnitlatamahn?

²³ Jisas yaklauwi nangnitlana: —Dutni as yulnayang kat, yayultah ais dutni yulnayang; yulnayang kidika yamni kat, ¿ais yamta yatistamahn?

²⁴ Kaput dawak Anás yaklauwi sihna, sitwi dawi, Caifás, sumalyang nuhni yakat.

Pita watwi yulna, Jisas kidika talasyang

²⁵ Kaput laih, Pita kidika ban kalpuihwasak dai kuh yaihnit yakat. Dawak kalyulwi dakakana: —¿Man awasyah, kidika alni disainipil? Pita yulna: —Dikah, yang awaski.

²⁶ Usnit kat, sumalyang nuhni dini yamyang as yaklauwi yulwi dakana, Pita yaklauwi tapani dakna kidika alni kidika wanaihni dai: —¿Matalasyang daih, di dahna pāni pasyakat?

²⁷ Pita, watwi talasyang yulna, kidika minitni yakat sakara unbauna.

Jisas Pailat muhni yakat

²⁸ Jisas kidika Caifás ūni kaupak yakwi duwi uina, Roma kabamintni ūni yakat. Payahlanin manah bahang, Ju balna kidika kabamint ūni yakat kakawasdai, kakawarang kat, maisihnidis atnin lani kidika niningkauh karang bahang, dawak kaput bik witingna sip kakaswaskarang bahang, insal kaiwi bayakna kasnin kidika.

²⁹ Kidika bahang Pailat kalahwi yuldibauna. Dawi diyulna: —¿Adika alni ais yulni witing minit yakat duaitamanah?

³⁰ —Muih dutni awas katlaih —nangnitlalana—, man tingma yakat ādas karang.

³¹ Pailat diyulna: —Manna duyawanauh, manna lamana kat lani yamtanauh. Kaunah Ju la muihni balna kidika yuyulna: —Ju balna yangna laih muih as bik īnin kidika rahmkina yanawas ki.

³² Kaput laih Jisas yulna yakat kaiwi kalahna, witing amput dauwarang dai kidika.

³³ Pailat watwi ūni yakat kawi kiuna, Jisas yakat kalyulwak kiwak, kalyulwi dakana: —¿Man Ju balna Kingninamahn?

³⁴ Jisas kalyulna: —¿Kidika man silp yulta dakamahn, kidika awaskat, muih ūk yaklauwi yang yulki mayulnayah?

³⁵ Pailat yaklauwi kalyulwi dakana: —¿Yang adika Ju yang katpah? Man nimasan balna, dawak sumalyang tunan muihni balna yaklauwi yang tingki yakat ma-ahana. ¿Man ais yamnamahn?

³⁶ Jisas yaklauwi nangnitlana: —Yang king āwayang kidika adika sauni akat awaski. Kaput kat laih, muih diki yamyang balna duki, dawak witingna kalbabauwarang dai, Ju balna tingnina yakat āwinik awas yulni. Kaunah yang king awayang kidika adika sauni akat awaski.

³⁷ Kaput dawak Pailat kalyulwi dakana: —¿Kaput bahang, man kingmahn? Jisas yaklauwi nangnitlana: —Man kaput yultaman: yang king yang. Yang sau akat aiwik batahndanayang, di rahm kidika yulna atnik. Dawak di rahm muihni balna bitik kidika, yadakakawi.

³⁸ Pailat yaklauwi kalyulna: —¿Di rahm kidika aisyah? Kidika balna kalyulwi dakawak usnit kat, Pailat watwi kalahwi Ju balna karak yulbauna, dawak diyulna: —Yang dutni as bik yaktasyang, kidika alni yakat.

Jisas laih daunin yakat wirlana

³⁹ Kaunah manna nining kaput yamtamana, insal kaiwi bayakna mani alasnina yakat, yang muih as uluhtik manatayang: ¿dukih manawih, Ju balna Kingnina kidika uluhtik mananik?

⁴⁰ Bitik sararahna: —¡Kidika laih awaski! ¡Barrabás kidika uluhtah! Dawak Barrabás laih di malyang as dai.