Jan 17 - Papang Yulni

Jisas minityulwi disainipil balna yulnina

¹ Kidika yulna usnitkat, Jisas makau kisang yakat talwi yulna: “Papang, awarni kaiwi kana: Walamabis al yakat alasnina yaksihni kidika yamtah, kaput laih, man yakat bik alasmana yaksihni kidika yamnakarang.

² Kat man Walamabis al yakat kalanaman parasni bitik kidika muih balna bitik minitna yakat, kaput laih sangka ban atnin kidika dianin, man lawa kalanaman balna bitik yakat.

³ Sangka ban atnin kidika laih man yakat amangmalanin, man manah Papang aslahman kidika, dawak Jisaskrais, man lawa sihnaman kidika.

⁴ “Yang alasmana yaksihni kidika yamnayang sau akat, man wark yamnin yanaman kidika yamnayang.

⁵ Waralaih Papang, man muhma yakat alasna yaksihni dutayang dai kidika watta yatah, sau adika dis mani balna kau dutayang dai kidika.

⁶ “Sau kaupak walta yaknaman kidika, yana atnam, bahang niningnakanayang waisman kidika. Man dima balna dai, dawak man yanaman, kaput laih man yulma kidika dakakana.

⁷ Waralaih amanglataman, man yanaman balna bitik dai kidika man yakat aiwi;

⁸ yul balna yanaman dai kidika dianayang, bahang witingna duduna. Dawak amanglalana, rahmpalni man kaupak aiwanayang kidika, dawak bik witingna rahm kukulwi man yasihnaman kidika.

⁹ “Witingna yulnina man kalma dinit yakat buktik yultayang; sau muihni balna yulnina kalmadinit yakat buktik yultasyang, kaunah yanaman balna kidika yulnina, kat man dima balna bahang.

¹⁰ Yang diki balna bitik kidika man dima balna, dawak man dima balna kidika yang diki balna, bahang yang alaskina yaksihni kidika lāih kalahwi witingna munah.

¹¹ “Yang sau akat ban awas awaki, kaunah witingna laihtak sau akat ban karang ki, yang laih yawik man karak awaki. Papang holi, man ayangma parasni kidika maintalah, kidika ayangni yanaman kidika, kaput laih witingna kidika aslah palni atnin, man yang karak aslah mayang kapat.

¹² Yang witingna karakyang dai, adika sauni akat, man ayangma parasni kau maintalayang dai, dawak nanitna daktayang dai, ayangni yanaman kidika kau. Witingna kidika as bik didiswas ki, kaunah aslah uman disna dai kidika manah laih, Ulna balna yakat kaiwi kalahnin yulni.

¹³ “Waralaih yawayang man sakman yakat; kaunah adika yulni balna yultayang baisa minit as sau akat sakyang bahang, yang alasna dutayang kapat witingna bik alasna duna atnin.

¹⁴ Man yulma balna kidika dianayang, kaunah sau muihni balna kidika dutni ditatalwi, kat witingna laih sau muihni awas bahang.

¹⁵ Mayultasyang sau akaupak yaknin, kaunah dutni balna kidika kaupak nanitnadaknin.

¹⁶ Yang sau muihni awasyang kaput bik, witingna kidika sau muihni awaski.

¹⁷ Man dima yaktah, di rahm kidika munah; man yulma balna kidika kuduh rahm.

¹⁸ Sau muihni balna pasyakat yasihnaman kaput bik, yang witingna kidika sihtayang, sau muihni balna pasyakat.

¹⁹ Witingna yulnina, man dima alahwayang, kaput bik laih witingna kidika man dima kalnin, di rahm kidika munah.

²⁰ “Adika balna yulnina manah kalma dinit yakat buktik yultasyang, kaunah yang akat yakukulwarang balna kidika yulnina bik, witingna yuyulwak dakawi.

²¹ Mayultayang witingna kidika aslah karang; man kapat, Papang, man yangyakman kidika, dawak yang manyakyang, dawak witingna kidika mayang karak kawang, kaput laih sau muihni balna kidika kukulwang man lawa yasihnaman.

²² Man alasna yaksihni yanaman kidika, sihm witingna yakat bik dianayang, kaput laih aslah atnin, man dawak yang karak aslah mayang kapat:

²³ yang witingna yakatyang, dawak man laih yangyakatman, kaput laih yamni palni aslah atnin kidika, kaput laih sau muihni balna kidika amanglalawarang man lawa yasihnaman kidika, dawak bik witingna yakat dalani ditalaman, yang akat dalani yataman kapat.

²⁴ “Papang man lawa yanaman, kaput bahang dukih yawi yang angkat sak- awaki kidika, witingna bik yakat atnin, kaput laih alaskina yaksihni kidika tatalwarang, alasna yaksihni yanamna kidika; kat man dalani yatalnaman sau adika yamwas tanitkauh.

²⁵ Papangki la kat, sau muihni balna kidika amangmalalawas ki; kaunah yang laih amangmalatayang, dawak adika balna bik amanglalawi man yasihnaman kidika.

²⁶ Niningnakana yang, waisman kidika, kaunah baisa yamki ki, kaput laih dalani yatalaman kidika witingna yakat bik karang, dawak kaput bik yang witingna karak awaki.”