Jan 13 - Papang Yulni

Jisas disainipil balna kalnina suhwi

¹ Insal kaiwi bayakna alasnina yayamwas tanit kauh, Jisas witing amanglana dai, uman awarni kaiwi kana kidika adika sauni kaupak dawi bayakwi kiwi Papang karak kalpaknin kidika. Witing dini balna kidika dalani talna dai sau akat bangkidika, dawak kaput bik laih witni kat dalani ditalna dai.

^2-4 Sitan kidika uman Judas, Saiman Iscariote walanibis kulnin yakat kana dai, Jisas kidika daunin tingni yakat ānin kidika. Jisas amanglana dai Papang kaupak kaina kidika, dawak Papang yakat kiwarang kidika nawatwi, dawak Papang yaklauwi parasni bitik kalana kidika; kaput bahang, masan yakat di kaswabangkat, tibil kaupak yaklauwi, prakni nuhni kidika yakpamwi, dawi banimak yakat tawil as sitna.

⁵ Usnit kat tingsuhnin dini kau duwi was utuhna, dawak disainipil balna kalnina suhna, dawak banimak kau tawil sitna kidika karak uswi buhna.

⁶ Saiman Pita kalni suhnin yamwakat, witing yaklauwi kalyulna: —Dawan, ¿man yang kalki suhmayah?

⁷ Jisas yaklauwi nangnitlana: —Waradika amanglatasman ais yamtayang kidika, kaunah usnit kat amanglama.

⁸ Pita yaklauwi kalyulna: —¡Datingkat kalki suhtas awama! Jisas yaklauwi nangnitlana: —Suhtas awakikat, yang diki awas awama.

⁹ Saiman Pita yaklauwi kalyulna: —¡Kaput kat Dawan, kalki manah suhwinih, kaunah tingki balna, dawak tunaki bik suhtah!

¹⁰ Kaunah Jisas yaklauwi nangnitlana: —Wisam waskawi kalahna kidika, nid awaski baisa suhnin, kaunah kalnimanah laihtak, kal muihni bitik laih klin bahang. Manna laih klin mana, kaunah bitik laih kaput awasmana.

¹¹ Yulna: “Manna bitik laih klin awasmana”, kat witing amanglana dai bahang wais yaklauwi daunin tingni yakat āwarang kidika.

¹² Kalnina suhna usnit kat, watwi prakni nuhni kidika kanadai, dawak watwi tibil yakat yalahwi diyulna: —¿Manayamtikda kidika amanglatamanah?

¹³ Manna yayultamana, Maestro, dawak Dawan bik, bahang manna rahm yultamana, kat kaputyang bahang.

¹⁴ Yang laih Maestro yang dawak bik Dawan yang, dawak kalmana suhtikda, kaput bik laih manna biri biri kalmana suhtanama ki.

¹⁵ Yang yamtik namangnakatikda, manna bik sihm kaput yamnamna, yang yamtikda kapat.

¹⁶ Manayultayang, muih dini yamyang kidika kauh tanit awaski daniwan karak dawakat, dawak sihna muihni kidika kauh nuhni awaski, muih sihyang kidika karak dawak.

¹⁷ Manna adika amanglata, kaput yamtanama kat, manna alasna awanama.

¹⁸ “Manna bitik yakat laih manayultasyang; yang amanglatayang wais balna kidika walyaktik dunayang kidika. Kaunah Ulna kidika yakat kalahnin ki: ‘Yang karak di kaswa muihni kidika, yang nikingkauh ki.’

¹⁹ Baisa kaiwi kalahwas tanitkauh manayultayang, bahang kaiwi kalahwarang kat, manna yakultanama yang adika.

²⁰ Yang manayultayang, sihnayang muihni yakat duwa kidika, yang akat yaduwi, dawak yasuhna muihni yakat bik duwi.

Jisas yulna Judas yaklauwi dutni yakat kal-awarang kidika

²¹ Kidika yulwak usnit kat, Jisas witing tuhni palni kulnin yakat kalusna dai, dawak lāih yulna: —Rahm manayultayang, manna paskaupak as daunin yakat yahawarang ki.

²² Kaput laih disainipil balna kidika biri biri kaltatalna, amanglalawasdai wais yakat kalyulwapa.

²³ Witingna paskaupak as, Jisas yaklau dalani kaltalwa dai kidika, yaihnit yakat sakdai, di kaswabang yakat,

²⁴ dawak Saiman Pita sain yamwi kalyulna, kalyulwi dakana atnin wais kat yulwapa.

²⁵ Dawak Jisas yaihnit palni yakat kiwi kalyulwi dakana: —Dawan, ¿kidika waisyah?

²⁶ Jisas yaklauwi nangnitlana: —Plawar busna kidika apis suihtik kalaki, bahang kidika muihni karang. Kaput laih plawar busna kidika apis suihwi kalana Judas yakat, Saiman Iscariote walanibis.

²⁷ Dawak Judas plawar busna kidika duna usnit yakat, Sitan kidika witing kulnin yakat kana. Dawak Jisas kalyulna: —Man yamma kidika, sirihni yamtah.

²⁸ Kaunah tibil yakat di kaswabang kidika, as bik amanglawasdai, ais yulwa kidika.

²⁹ Judas kidika lalah uni trukwa bahang, buas kukulna, Jisas kalyulwa kidika laih di bakanna atnin alasna mani kidika dini bakanna atnin, kidika awasbik muih miniknakunni balna yakat di as as diana atnin.

³⁰ Judas plawar busna kidika duna usnit kat, kalahwi kiuna. Uman puklakna dai.

Lā wisam

³¹ Judas kalahwi kiwak usnit kat, Jisas yulna: —Waradika laih muih Walanibis al alasnina yaksihni kidika lāih kalahwi, dawak Papang alasnina yaksihni kidika laih niningkana ki, witing munah.

³² Muih Walanibis al kidika yaklauwi Papang alasnina yaksihni kidika lāih yakwakat, Papang yaklauwi biriwi witing alasnina yaksihni kidika lāih yakwarang; dawak kidika laih sirihni yamna karang.

³³ Walakibis binina, ma mahni manna karak awas awaki ki. Manna yawaltanama, kaunah Ju balna kau diyulnayang kaput, manna yakat bik manayultayang: Yang angkat yawaki kidika manna sip yawas awanama.

³⁴ Adika lā wisam manatayang: Manna biri biri dalani kaltalnauh. Yang manna kau dalani manatalayang kapat, bahang manna bik kaput biri biri dalani kaltalnamna ki.

³⁵ Manna biri biri dalani kaltalnama kat, muih bitik manatatalwarang, manna laih yang disaikipil mana.

Jisas yulna, Pita yulwarangki yang yatalwaski

³⁶ Saiman Pita, Jisas yakat kalyulwi dakana: —Dawan, ¿angkat yawamahn? —Angkat yawayang kidika —Jisas kalyulna— waralaih sip uskit uitasman, kaunah kidika usnit kat uskit uima.

³⁷ Pita yaklauwi kalyulna: —Dawan, ¿ampadawak, waralaih sip usmat uitas awakiyah? ¡Man yulma sangkika kalanik kidika ridiyang!

³⁸ Jisas yaklauwi nangnitlana: —¿Rahm palni yang yulki sangmaka kalanam kidika ridimahn? Yang mayultayang, sakara almuk baisa unbauwas tanit kauh, yang yatalasman kidika wat bās yulma.