Jan 10 - Papang Yulni

Sīp maintalyang dawak sīp balna

¹ Kaput laih Jisas yaklauwi kalyulna: “Rahm yultayang, angdika kat sīp balna bangkidika yakat dūr munah kawas kat, kidika laih dimalyang.

² Kaunah angdika kat dūr munah kawa kidika laih sīp maintalyang.

³ Dūr maintalyang kidika dūr apahwi, dawak sīp maintalyang sīpni balna yakat ayangnina kau diyulwi; dawak sīp balna kidika amanglalawi wais dinit yulwa kidika; daklana pāni kaupak yakwi,

⁴ bitik kalahwi dadawak, witingna tanitna yakat kiwi, dawak sīp balna kidika witing dangnit yakat uiwi, dinit yulwa kidika dakakawa bahang.

⁵ Kaunah, muih as amangnilalawas kidika laih usnit uiwi uiwaski, nawatkauh laih witing kaupak kikiri, kat witing dinit yulwa kidika amanglalawas bahang.”

⁶ Jisas yaklauwi adika karak libitwi diyulna, kaunah witingna amanglalawasdai ais diyulnin kulwi yulwa kidika.

Jisas laih sīp maintalyang yamni

⁷ Jisas watwi diyulna: “Adika rahm manayultayang: Yang kuduh dūr yang, sīp balna kidika yang munah bayayakwi.

⁸ Yang takitkauh aina balna kidika laih, dimalyang balna dai, dawak bik muih dudutni; kidika bahang sīp balna kidika witingna yuyulwa kidika dakakawasdai.

⁹ Yang kuduh dūr: yang munah kawa kidika, solni laihwi yakna karang. Kidika laih sīp as kat kiwi kawi dawi watwi kalahwi dibasta yamni yakwa kapat karang.

¹⁰ “Dimalyang kidika laih kaiwi di malnamanah, īnin dawak daukalnin; kaunah yang laih aiwanayang sangninaka duna atnin yulni, dawak bik sangninaka kidika manas palni dunin.

¹¹ Yang kuduh sīp maintalyang yamni. Sīp maintalyang yamni kidika, sīpni balna yulni sangnika kidika kalana ki;

¹² kaunah minit dunin yulni manah wark kalahwa kidika laih, nawah kaiwak talwi, sīpni balna kidika dawi kiri, kat sīp maintalyang awas bahang, dawak bik sīp balna kidika witing dini awas bahang. Nawah kidika yaklauwi sīp balna yakat iwi dawak pini ruhna ki.

¹³ Kidika lani kiri, kat witing walwa kidika laih minit dunin kamanah kulwa bahang, kaunah sīp balna yakat laih kulwaski.

^14-15 “Yang kuduh sīp maintalyang yamni kidika. Papangki amangkilawa kapat bik, yang amangnilatayang Papangki yakat, kaput bik laih sīpki balna yakat bik amangninalatayang, dawak witingna kidika amangkilalawi.

¹⁶ Dawak sīp ūk balna bik dutayang, kidika adika kaluduhna balna kaupak awaski; kidika balna bik akat duainik ki. Witingna yulki dakakawarang ki, dawak kaluduhna aslah kakalwarang ki, dawak sīp maintalyang bik aslah karang ki.

¹⁷ “Papangki dalani yatalwi kat sangkika kidika kalatayang kaunah wattik duna atnik yulni.

¹⁸ Muih as bik sangkika kidika dakyakwas ki, kaunah yang silp kulnik lani kalatayang. Yang rahmki dutayang kalanik kidika, dawak bik wattik dunik kidika. Papangki yaklauwi kaput yamnin yapakna.”

¹⁹ Ju balna kidika yulni dakawi, watwi kalwayahwi kalalahna.

²⁰ Witingna manas bik yuyulna: —¿Ais yamta yulwa kidika dakamanah, witing walasa duwi dawak bik sinsni yamni awas kidika?

²¹ Kaunah ūk balna kidika yuyulna: —Muih as walasa duwa kidika sip kaput yulbauwas ki. ¿Walasa kidika sip katpah, muih as minikpa kalawak talnin?

Ju balna Jisas kidika ruhwi dadawi

²² Kidika laih wasma dai, dawak Jerusalén yakat makatyulnin ūni blisyamna mani kidika alasnina yamwa bangdai.

²³ Jisas kidika makatyulnin ūni yakat sakdai, dawak Salomón dūrni kidika yakat likdai.

²⁴ Kaput laih Ju balna kidika awaihwidakwi kalyulwi dakakana: —¿Mampat kat lāih maiyaktasman kidika damayah? Man kidika Mesías man kat barangni maiyultah.

²⁵ Jisas yaklauwi nangnitnalana: —Uman mayulnayang manna yakat, kaunah rahm yakultas mana. Yang di balna yamtayang kidika laih Papangki ayangni kau yamtayang kidika di bitik lāih yakna ki;

²⁶ kaunah manna sip kultasmana, kat manna laih yang sīpki awasmana bahang.

²⁷ Yang sīpki balna kidika laih yang dikit yulting dakakawi, dawak witingna kidika amangninalatayang, dawak witing uskit uhuiwi.

²⁸ Yang lawik sangka ban atnin kidika diatayang, bahang witingna dadauwas karangki, dawak bik muih as bik nikingyakwas karang.

²⁹ Papangki yana kidika laih di bitik yakat tanit nuhni ki, dawak muih as bik dakyakwas ki.

³⁰ Papangki dawak yang karak laih aslah yangna.

³¹ Ju balna kidika watwi kipala laihwi ruhmnin yayamna,

³² kaunah Jisas yaklauwi diyulna: —Papangki parasni kau di yayamni manas yamnayang manna muhmana yakat; ¿bahang angdika palni yulni kipala kau yabahrtanamayah?

³³ Ju balna kalyuyulna: —Di yamni balna yamnaman kidika yulni laih kipala kau mabahrdaski, kaunah man yultaman balna kidika laih Papang niningkauh ki. Man laih dauh muih as man, kaunah man muihma kidika Papang yamtaman.

³⁴ Jisas diyulna: —Manna lāmana yakat ulna: ‘Yang yulnayang manna laih dawan mana.’

³⁵ Amangladi ulna balna yakat yulwa kidika, sip dauh kuldas ki; Papang yaklauwi kidika muihni balna witing yulni duwi uina muihni balna yakat diyulna, witingna kidika laih dawan.

³⁶ Dawak Papang yaklauwi blisyayamwi, muih balna pasyakat yasihna kat, ¿manna amput yulnamna sipyah, Papang niningkauh kidika, yang laih Papang Walanibisyang atnayang kidika manah?

³⁷ Papangki wark balna yamwa kidika yamtasyang kat, yakukulwinih.

³⁸ Kaunah yamtayang kat, yang akat yakultasmana bik, wark balna yamtayang yakat kultanauh, kaput laih manna amanglatanama Papang kidika yang karak kidika, dawak yang bik Papang karak yang kidika.

³⁹ Watwi laihwi sitnin kukulna, kaunah kidika kaupak Jisas kiri yaklana.

⁴⁰ Jisas, witing Jordán wasni nakas yakat dakyaklana, dawak yakat watna dai, muhnilau kau Jan muih was utuhwi sak-atna pāni yakat.

⁴¹ Muih manas kiwi talwi, yuyulna: —Rahm laih Jan kidika sain manas yamwasdai, kaunah adika alni yulna balna kidika bitik laih rahm dai.

⁴² Kidika pāni yakat muih manas Jisas yakat rahm kalkukulna dai.