Habacuc 3 - Papang Yulni

Habacuc minityulna

¹ Adika laih prapit Habacuc minit yulna.

² Papang man yulma dakayang kidika, dawak di balna bitik man yamnaman kidika, yulni man yakat rismapik nuhni matayang. Yamta waradika, mayang masangkika yakat, di nunuhni balna yanaman dai kaput, ma bayakna balna yakat, kaput laih yangna bik amanglana atnikna. Kaput bik dalani lani dutaman kidika manikingkata, antaman pasyakat karang bik.

³ Papang kaiwi, Temán sauni kaupak; dawak Parán asangni kaupak Papang holi kidika kaiwi. Witing alas yaksihni kidika makau kisang bitik yakat laihna ki, dawak sau bitik yakat witing ayangni kidika nuhni yamna ki.

⁴ Yaringni manah kal-awaihdak kaiwi, dawak witing tingni kaupak yaringni tukwi kalahwi, bahang kidika laih niningkana ki witing yakat parasni nuhni duwa kidika malni yakat sakkidika.

⁵ Witing muhni tani yakat wah yamadangni kidika uiwi, dawak kidika dangnit yakat kiwi yamah daihni kidika.

⁶ Witing kiwi watwakat sau kidika kalyukwi; dawak muhwi talwak nisan balna kidika bik diyukwi, asang balna kidika ihrwi kawi, dawak pini didiswi asangni umamani balna kidika; kaunah Papang tani balna kidika laih banki.

⁷ Yang talnayang Cusán muihni balna kidika dutni yakat bubukwak, dawak Madián muihni balna kidika yamaduduwakat.

⁸ ¿Kulnam daukalnaman Papang, was balna murwa yakat? ¿Kulnam daukalnaman kuma nining yakat? ¿Kidika bahang amaras yakat ilwanaman, dawak kaput bik kalbauta minit bayaktaman kārni yakat ilwanamahn?

⁹ Lasma kidika ridi yamta dunaman, dawak simabang balna kidika bik. Was kau kalatangkat sau yakat naini kuhrwi kiuna.

¹⁰ Asang nunuhni balna kidika matatalwak diyukwi; makau kisang yakaupak was kidika utuhwi, kuma tuhni balna kidika parasni palni yulna ki lalamwa nunuhni balna kidika dulauwak.

¹¹ Ma dawak waiku kidika yakmamaldana kidika kaupak kalalahwas ki, man simabang yaringni duwa nining yakat, langnisa yaringni lapwa kidik yakat.

¹² Kulnam daukalwak sau bitik yakat ira awaihtaman kidika; dawak kaput bik kulnam daukalwak sau muihni balna yakat ataktaman.

¹³ Man alahwanaman tawanma ilpni dawak man silp king as yakta dunaman dai kidika. Dawak muih dutni ūnibasta kidika daukalpamna man, dawak rahni kipala balna ukna dai kidika bik kuhrta yakat lāih danaman.

¹⁴ Tunan muihni kidika man īnaman witing silp sinibang yakauna, witing ahalni balna kidika wing parasni kapat muih miniknakunni tanitna daknin sip-awas muihni balna niningna yakat uiwi uswi ruruhna kidika, kaput dawi malnikau īnin.

¹⁵ Amaras balna kau kuma yakat ilwa ira awaihtaman, was panuhni as luhusni manah yakat.

¹⁶ Adika dini balna bitik dakik yamadunayang. Kungkimak balna yukna, dawak kalki balna bik sip ataktik sakawasyang dai muihki bitik paraski dis dana dai. Kaput kaunah isinglak tahana awaki, Papang yaklauwi kaidinin kidika duaiwarang kat kalbauyang muihni maitaihyang balna yakat.

^17-18 Kaput dawak alasna manah alahwaki, Papang yalaihwi yakyang yamwada kidika yulni. Ayangni nuhni unbauna awaki, ani damni kidika puluwas karang bik, wain minikwas karang bik, olib bik minik yakwas karang bik, sau kidika bik di minik yakwas karang bik sīp balna dahn kalwarang bik, dawak turuh balna kidika pan yakat dahn kalwarang bik.

¹⁹ Kat Papang laih paraski yawa bahang, kalki balna yakat sirihni yawi sihm sana kapat, dawakat mayakat yadu'kilkiwarang, bahang kidika yakat laih yalaihwi yakna sak-awaki.