Génesis 50 - Papang Yulni

¹ Kaput laih José witing papangni yakat wakaihna, kaidīnah muhni yakat umna.

² Dawak usnit kat witing yaihnit kau daktar balna duwadai kidika yakat diyulna, witing papangni Israel muihni kidika daukalwas atnin sinika kahnin diyulna, bahang witingna kaput yayamna dai.

³ Bahang witingna kidika sinika kakahna kidika ma 40 kat kahwi dadanadai, kat ma kaput praisni kat warkni kidika yamwi danin dai bahang. Dawak Egipto muihni balna kidika kulninna bukna dudunadai ma 70,

⁴ dawak kulninna bukna kidika bayak dawakat, José witing yuldibauna dai fero ūnikau muih bangdai kidika balna yakat:

⁵ —Yang papangki daunin manah yakat yayulwak pramis yamnayang, witing kidika nuna atnik witing silp sau-ū yamna yakat, bahang kidika laih Canaán sauni yakat sakki. Kaput bahang yang manna yakat manayultayang yadatanang kat yawik papangki kidika nukuh; kidika nuki usnitkat yang aiwaki.

⁶ Dawak Fero yaklauwi nangnitlana: —Yawa papangma kidika nutah, witing yaklauwi mayulna kaput.

⁷ Dawak José witing kiwi papangni nuna, dawak Egipto yakat fero ūni kau tunan muihni balna bangkidika bitik José yakat minikdawi uinadai,

⁸ Jacob sulani balna, José sulani balna, wirahni balna bik. Gosén yakat walabis manah dawak tinglau balna bik damukwi uinadai.

⁹ Kaput bik laih muih balna ūk bik aras kau kar sitwi murwa kapatnah kau bik uinadai José yakat minikdawi, kaput bahang muih kidika laih mahni palni dai.

¹⁰ Goren-ha-atad yakat uiwak, bahang kidika laih Jordán wasni makilwa niningyakauh ki, kidika yakat watwi kakaidana, dawak José laih witing ma tiaskaubu kulnin bukna dai.

¹¹ Dawak cananeo balna kidika pāni yakat yalalahwadai kidika talwi yuyulna: “Egipto muihni balna muih dauna kat nunin yulni risnipik nuhni karak yayamwi.” Kaput laih kidika pāni ayangni papakna Abel-mizraim kidika pāni laih Jordán wasni kidika makilwa niningyakat pakki.

¹² Jacob walanbis balna papangnina ais diyulna yakat yayamna,

¹³ Canaán yakat duwi uina dawak Macpela sauni kau pasulihni yakat nununa, Abraham bakanna dai Hitita muihni Efrón kaupak, kaput laih kidika pāni sulihni kidika witing sulani balna bitik dinina atnin. Kidika sauni dawak pāni sulihni kidika laih Mamre kaupak makilwa niningyakauh sakki.

¹⁴ Dawak papangni nuwak usnit kat, José watwi wirahni balna karak nawatwi Egipto yakat kiuna, witing karak kalpakwi uina muihni balna bitik karak.

José mani witni yakat

¹⁵ Jacob kidika dauna bahang José wirahni balna kidika kukulna: “Sipki José kidika mayang akat dutni maikulnin, bahang kaput laih mayang malawi dutni kalyamnamayang kidika bitik yulni biriwi maiyamnin.”

¹⁶ Kaput laih aput yul kalsisihna: “Papangma dauwas tanitkauh witing yaklauwi yanapakna

¹⁷ mayulna atnikna: ‘Plisma wirahma balna dutnina kidika datang diswang, dutni mayayamna kaunah.’ Kaput bahang man kalma dinit yakat bukdi mayuldi dutkina datang diswang, yangna laih papangma Papangni dini yamyang yangna.” Yul dukiwa muihni kidika kalyulwi dawas baisa kalyulwasak kat, José kaidana dai.

¹⁸ Kaput laih wirahni balna palni uiwi witing muhni yakat limbabahwi muhnina sau kat lakwi, dawi kalyuyulna: —Man yanadutaman akat. Yangna laih man dima yamyang yangna.

¹⁹ Kaunah José biriwi diyulna: —Yamaduduwinih. Yang sip-awasyang Papang pāni yakat awinik.

²⁰ Manna dutni yamnin kulnamana, kaunah Papang yaklauwi dutni kidika yamni yakat wirlana, kidika laih yamna atnin warmani talda kidika: muih mahni sangnika laihwi yakna atnin yulni.

²¹ Kaput bahang yamaduduwinih. Yang lawik manabayahki ki dawak manna walamanabis balna kidika bik bayahki ki. Kaput laih José yaklauwi walanina āna, kat minikun talnin yulni karak yuldibauna dai bahang.

José dauna

²² José dawak witing papangni sulani balna karak ban Egipto yakat yalalahna dai. José witing kurih 110 sangka dai,

²³ dawak Efraín buhni balna bik talna dai. Kaput bik laih witing mani Maquir walaninabis balna bik laih duna dai, kidika laih Manasés walanibis dai.

²⁴ Mani as kat José yaklauwi wirahni balna yakat diyulna: “Yang laih daunik manah ki, kaunah Papang kaiwi ilp manawarang, dawak adika sauni kaupak manayakwi pramis sauni yakat maduwi kiwarang, Abraham, Isaac dawak Jacob yakat pramis diyamna dai kidika.”

²⁵ Dawak kaput laih diyamna Israel walanibis balna kidika pramis kalyamna atnin, bahang diyulna: “Rahm kidika laih Papang kaiwi ilp manawarang ki. Kidika kaput kalahwarang mani kat manna yang wakalki balna kidika duyawanamna karang.”

²⁶ José Egipto yakat dauna kurih 110 laihna mani kat, dawak witing muihni kidika, muih dauwak dia kakahwa dini kidika kau muihni bitik kakahna dai, dawi baksni payakat ahana dai.