Génesis 4 - Papang Yulni

Caín dawak Abel

¹ Al kidika yalni karak kalpakna kat, Eva kidika muih duna, dawak walanbis Caín kidika yakna, dawak aput yulna: “Uman walakibis al as dunayang. Dawan yaklauwi yana.”

² Kidika usnit kat walanibis ūk duna kidika laih Abel, Caín wirah. Abel laih witing wark yamna tinglau sahnin, dawak Caín laih yamak warkni yamna.

³ Ma balna bayakna, dawak ma as kat Caín witing Dawan yakat minitdis kalanin dini as duwi kiuna, yanimak minik balna bahna kidika kaupak.

⁴ Dawak Abel bik duwi kiuna sīpni balna walanibis tatuna yakna yayamni kidika. Kaput laih Dawan witing yamni talna Abel witing minitdis dini duwi kiwa kidika,

⁵ kaunah Caín yakat laih kaput yamni talwasdai, dawak minitdis dini balna duwi kiuna yakat bik, kidika yulni Caín kasak kulnin daukalna, dawak muhni bik dutni yamna.

⁶ Kaput laih Dawan yaklauwi kalyulna: “¿Ais yamta kulnam daukalta dawak muhma bik dutni yamta manh?

⁷ Man yamni yamma kat, sipman muhma maluih dulaunam; kaunah kaput yamtasman bahang, dutni kidika tahawasakki mamat bayakna atnin. Kaput kaunah man sipman minit bayakna atnin.”

⁸ Ma as kat, Caín yaklauwi wirahni Abel yakat kalyulna, witingna awaihna uina atnin, dawak witingna albulah dadawak, Caín yaklauwi wirahni Abel yakat īna.

⁹ Bahang Dawan yaklauwi Caín yak yulwi dakana: —¿Man wirahma Abel kidika angkat sakyah? Caín yaklauwi nangnitlana biri: —Amanglatasyang. ¿Witing maintalnik kidika yang warkki katpah?

¹⁰ Dawan biri kalyulna: —¿Ais yamta kaput yamnamanh? Man wirahma āni sau yak utuhnaman kidika parasni sarahwi yayulwi yang akat, lani kidika barangni yamnik.

¹¹ Kidika bahang, la matuhna karang, man wirahma ani dina sauni kidika kaupak mayakpamna karang, man lawa īna man kidika.

¹² Sau yakat di dahma bik watwi minik yakwas karang. Pini sau yakat awaihma sip man wingmata puhtas awama.

¹³ Kaput dawak Caín yaklauwi biri Dawan yakat kalyulna: —Yang kaput wah nuhni kidika sip wauhtasyang.

¹⁴ Warmani adika sauni kaupak yakangta yaktaman, bahang pini awaihtik lik-awaki sau yakat man muhma kaupak naikau, wattik sip yamni urupdas awaki. Kaput laih wais yatalwarang kat yaīwarang.

¹⁵ Kaunah Dawan yaklauwi nangnitlana: —Angdika muihni maiwarang kat witing wat tiaskaubu wah duna karang. Kaput laih Dawan yaklauwi Caín yak sain as kalana, kaput laih wais karak kalpakwarang bik īnin awas yulni.

¹⁶ Caín witing mahka kiuna Dawan karak yulbauwa sakdai kidika kaupak, bahang Nod pāni yakat kiwi yalahna dai, Edén kaupak makilwa niningyakat.

Caín sulani balna

¹⁷ Caín witing yalni karak kalpapakna, dawak muih duna, kaput laih witing muihbin as yakna ayangni laih Enoc. Kidika usnit kat Caín witing tawan nuhni as yamna bahang ayangni laih Enoc paknadai walanbis ayangni kaput.

¹⁸ Enoc kidika Irad papangni dai, dawak Irad kidika Mehujael papangni, dawak Mehujael papangni laih Metusael, dawak Metusael papangni laih Lamec.

¹⁹ Dawak Lamec laih yal bu duna, as kidika ayangni Ada dawak ūk kidika Zila.

²⁰ Ada walanibis as duna kidika laih Jabal, bahang kidika sulani balna kuduh ū lababanni kau manah yalalahwa kidika dawak bik witingna tinglau sasahwi.

²¹ Jabal witing wirahni al as duwadai ayangni laih Jubal, bahang witing sulani balna kuduh pasnin dini pasyang balna dawak bik bara puhyang balna kidika.

²² Dawak Zila laih walanibis as yakna ayangni Tubal-caín, bahang witing kidika laih ayan kau diyamyang dai, bahang bras kau dawak ayan kau bik di manas yamwadai. Tubal-caín witing wirahni yal as dai ayangni Naama.

²³ Ma as kat Lamec yaklauwi yalni balna Ada dawak Zila yakat diyulna: “Manayultayang kidika yamni dakanauh: muih as īnayang yatuswakat, dawak wahmabin bik as īnayang yabauwak.

²⁴ Bahang Caín yakat wat tiaskaububiri kalyayamna karang kat, kaunah yang laih biriwi yayayamna karangwat muihasluih bās minitkau salap minitkau tiaskaubu.”

Adam dawak Eva karak walaninabis bāswa kidika yakat

²⁵ Adam wat yalni karak kalpapakna kat walaninabis al as duna, ayangni pakna Set, pakna, dawak yulna: “Papang yang akat watwi walakibis al ūk as Abel pāni yakat, Caín yaklauwi īna kidika.”

²⁶ Dawak Set bik walanbis al as duna, bahang ayangni pakna Enós. Kidika kaupak dawak Dawan ayangni yulwi minitna yuyulna.