Génesis 39 - Papang Yulni

José dawak Potifar yalni karak

¹ José kidika Egipto yakat duwi uina kat, Egipto alni as ayangni Potifar kidika yaklauwi bakanwi duna ismaelita balna kaupak. Potifar kidika laih Fero dini yamyang nuhni as dai, dawak kalbauyang balna taninatuna dai.

² Kaunah Dawan kidika José karak dai, bahang witing daniwan ūni yakat yalahwa mani kat witing laih yamnidai.

³ Witing daniwan kidika amanglana dai José laih Dawan karak kidika, dawak kaput bahang José niningyakat di bitik kidika yamni manah dai.

⁴ Kidika yulni José yakat witing daniwan yaklauwi yamni kaltalna, dawak bik witing yaihnit palni yakat duna, dawak bik witing ūni kidika José tingni yakat āna maintalna atnin, kaput laih di bitik kidika witing tingni yakat danadai.

⁵ Potifar yaklauwi witing ūni kidika José tingni yakat āna mani kaupak, Dawan yaklauwi Potifar yakat blisin kalana dai dawak ūnipas bitik yakat dawak yanimak balna bik.

⁶ Potifar witing dini balna kidika bitik José yaklauwi maintalna kat, Potifar witing kulwi kalbauwasdai witing ais kaswarang kidika. José kidika witing al as yaksihn dai bahang yamni bik kaltatalna dai,

⁷ kaput bahang ma as as bayakna usnit kat, witing daniwan yalni kidika yaklauwi José yakat kalwalna, bahang ma as kat kalyulna: —Aiwang malangwang.

⁸ Kaunah José witing yulwasdana dawi aput nangnitlana: —Talah man, yang dakiwan yaklauwi witing di duwa bitik kidika tingki yakat āwi dana, bahang yang akat sakyangkat, witing kulwi kalbaunin dini as bik diski.

⁹ Adika ūnipas akat muih ūk diski yang manah yang; yang dakiwan witing niking yakat dikah lani kidika diski, kaunah man manah laihtakat sip-awaski, kat man laih witing yalniman bahang, kaput bahang, ¿amput di as dutni kidika yang yamkiyah, dawak Papang niningyakat bik dutni yamkiyah?

¹⁰ Yal kidika yaklauwi José yakat wat wat yulna witing karak kalangna atnin, dawak bik yaihnit yakat sak-atnin, kaunah witing dakawasdai kalyulwa kidika.

¹¹ Kaunah ma as kat José witing ūpas yakat kawi kiuna wark yamna atnin, dawak bik kidika minitni yakat muih as bik disdai bahang kidika yakat,

¹² yal kidika yaklauwi parakni yakat laihwi kalyulna: —Yang karak alangwah. Kaunah witing kiri kalahwi kiuna dawak prakni kidika laih yal tingni yakat watna.

¹³ Yal kidika talwak, witing tingni yakat prakni kidika dawi kalahwi kiwak,

¹⁴ dini yamyang balna yakat yulwak diyulna: —Talnauh yang alki laih hibru muihni as duaiwak sarahni maitalwi mayang akat. Kai'kawi yatalna dawak yang karak kalangnin kulna, kaunah yang parasni sarahtingkat;

¹⁵ yang paraski bitik sarahtingkat witing dakawi, kiri kalahwi prakni bik dapamwi kiuna.

¹⁶ Usnit kat José prakni kidika witing apakna daniwan kidika ūni yakat kaiwak kat.

¹⁷ Dawak sihm yulni kidika kalyulna yulna: —Man hibru alni muih dinina yamyang duaita yananaman kidika, payahtayang yakat kawi yang akat riskipik dis yamkuh atna,

¹⁸ kaunah yang paraski bitik sarahtingkat kiri kalahwi kiuna dawak prakni bik dapamwi kiuna akat.

¹⁹ Man dima yamyang kidika kaput yayamna. José daniwan kidika uba kulnin daukalna yalni kalyulwak dakawa kidika,

²⁰ kaput laih José kidika laihwi pakwak silak ūni yakat ahana, bahang kidika yakat king dini yamyang balna bik silak yakat bangdai. Kaunah silak ūnipas yakat bik

²¹ Dawan laih José karakdai dawak witing minikun talnin lani duwa kidika niningkana, bahang yamwakat silak ūni tanituna kidika José yakat yamni kaltalna,

²² silak ūni kau bangkidika bitik witing tingni yakat danadai. José yaklauwi diyulwak yayamwadai, di bitik yakat ais yamnin dini kidika,

²³ silak ūni tunan muihni kidika witing laihwi talwas dai José witing di balna yamwa kidika, kat Dawan witing karakdai bahang, dawak witing yaklauwi yamwak di balna kidika bitik laih yamni manah kalahwadai.