Génesis 34 - Papang Yulni

Dina risnipik disna kidika yulni biriwi diyayamna kidika

¹ Dina Lea yaklauwi Jacob yakat walanbis as kalana dai kidika; witing kiunadai kidika pāni yak yayal sirarau balna yakat awaihwi talna atnin yulni;

² kaunah Siquem witing talna dai, heveo muihni Hamor walanibis dai kidika, bahang witing laih kidika pāni yakat tunan muihni dai, dawak Dina yakat witing parasni kau laihwi laktuswi witing karak kalangwi risnipik dis kalyamna dai.

³ Kaput kaunah, Dina yakat dalani palni talna bahang witing walna amput dawi kulnin laihnin kidika.

⁴ Kaput laih witing papangni Hamor yakat kalyulna: —Yawa yulta yatah yal sirau kidika. Witing kidika yalki dukih yawi.

⁵ Jacob witing amanglana walanbis yal Dina kidika Siquem yaklauwi laihwi dutni kalyamwi risnipik dispamna kidika. Kaunah witing walanbis ahal balna kidika tinglau maintalwa bangdai bahang walang yakat, witing di as bik yulwas dai walanbis balna kidika aina kat.

⁶ Kaput laih Siquem papangni Hamor kidika Jacob yakat kiwi kaltalna witing karak yulbauna atnin yulni.

⁷ Dawak Jacob walanbis balna kidika walang kaupak aiwi dakakana di kalahna kidika, bahang witingna kulninna daukakalna, kidika laih dutni kalyamna nuhni as bahang Israel yakat, kat Siquem yaklauwi Jacob walanibis yal yakarak kalalangna kidika yulni. ¡Kidika laih yamnin dini awasdai bahang!

⁸ Kaunah Hamor yaklauwi yuldibauna dai witingna karak, bahang aput diyulna dai: —Walakibis Siquem kidika manna wirahmana yal yakat uba dukih kalawi, kaput bahang, plismana datanang kat duwang witing karak

⁹ dawak manna kidika yangna karak kalwanaih malahwang; kaput laih yangna, manna walamanabis balna karak kaldutanaki dawak biri manna yangna walakinabis yayal karak kaldutanama.

¹⁰ Manna watta yalahtanauh yangna karak. Yangna saukina adika laih man tingmana yakat karang; bahang kidika yakat yalahtanauh, di wauhta bakantanauh, sau bik bakanta dutanauh.

¹¹ Siquem bik yaklauwi diyulna Dina wirahni ahal balna dawak papangnina yakat bik: —Yang manna kalmana dinit yakat buktik yultayangna, agha tinauh. Dawak manna ais yultanama kidika manana karang.

¹² Yang ising kultas yang minit kalnin as tanit nuhni kaunah, dawak bik di manas dauh kalaki, yang lawik; kaunah datanang kat sirau kidika dukuh.

¹³ Kaput kaunah, Siquem yaklauwi Dina yakat risnipik dispamwi kalana bahang, Jacob walanbis balna yaklauwi biriwi nangnitlalana witing dawak papangni Hamor yakat bik, alas lani kau,

¹⁴ dawak witingna yakat diyuyulna: —Yangna wirahkina kidika al as kau sip kalatasyangna, witing Papang sainni duwas kidika, kaput bahang yangna nikingna yakat asalni as karang.

¹⁵ Yangna agha atnikna sipki aput karang kat: manna kidika yangna apat awanama kat; yuldarang kat, manna pasmangna yakat muih ahal balna kidika bitik Papang sainni duduwarang kat.

¹⁶ Kaput laih manna, yangna walakinabis balna karak kaldutanama, dawak biri manna walamanabis balna karak kaldutanaki; dawak manna pasmangna yakat yalahtanaki dawak mayang laih tawan aslah malahwarang.

¹⁷ Kaunah manna yamtas awanama kat, Papang sainni dunin kidika, yangna akaupak yawanaki pa ūk, dawak wirahkina yal kidika duyawana ki.

¹⁸ Hamor dawak walanbis Siquem karak witingna yamni tatalna dai witingna yuyulwa kidika.

¹⁹ Ma balna didiswas, wahma kidika Papang sainni duna, kat Jacob walanibis yal kidika dukih kalawa bahang. Kat Siquem kidika kalwanaih balna pasyakat tanit nuhni kalkukulwadai bahang,

²⁰ witing, dawak papangni Hamor karak uina dai, tawan nuhni kiwi kawa yakat, kidika pāni yakat di ais ais balna yulbauwi tatalwadai bahang, dawak kidika pāni yakat muih balna yakat diyuyulna:

²¹ —Adika ahalni balna laih mayang karak kaltalyang yamni balna ki, dawak witingna akat watwi yalahwi wark kalalahwarang, adika pāni akat, kat sau laih manas palni ki witingna niningna yakat; bahang mayang sipmayang witingna walaninabis karak kaldunin, dawak witingna bik mayang mawalakibis balna karak kalduduwarang.

²² Kaunah, waralaih mayang tawan aslah malahwang, kaunah witingna adika dukih diawi mayang yamdarang kat witingna akat watna atnin, kidika laih mayang ahal mayang bitik Papang sainni duna atnin, witingna yayamwa kaput.

²³ Witingna dinina balna bitik, tingninalau balna bitik mayang madiki karang. Bahang mayang laih agha atnin manah ki, bahang kaput laih witingna watwi yalalahwarang mayang karak.

²⁴ Tawan nuhni pasyakat wawahma, kalbaunin sip balna kidika kurihnina, witingna bitik laih yamni tatalna dai Hamor yulwa kidika, dawak walanibis Siquem karak bik, dawak uiwi Papang sainni duduna.

²⁵ Kaunah Simeón dawak Leví, Jacob walanbis ahal kidika, Dina wirahni ahal balna, bahang witingna tawan nuhni yakat uina ma bās bayakwak, muih ahal balna kidika baisa witingna muihnina Papang sainni duduna kidika dalani dakakawa kauna dai, bahang tingnina yakat isparah duduwa bahang bitik ihina dai, niningna kauh yaklaunin sip-awasdai bahang.

²⁶ Isparah kau Hamor kidika ihina dawak walanibis Siquem kidika bik; usnit kat witingna wirahnina yal Dina kidika Siquem ūni kaupak yakwi duwi uina.

²⁷ Dawak Jacob walanbis ahal ūk balna kidika bik uinadai, dawak muih dadauna balna minitna munah bayakwi tawan yakat di balna kidika bitik duduna, wirahnina yal risnipik dispapamna kidika biriwi kalyamnin yulni.

²⁸ Duwi uinadai, sīp, biriku dawak turuh yayal bik, tawan pasyakat bangdai kidika dawak walang yakat bangdai kidika balna bitik;

²⁹ ū balna yakat di balna kidika bitik laih mamalna dai, dawak laihwi duwi uinadai silak yakat walabis balna dawak yayal balna bitik.

³⁰ Kaput dawak Jacob yaklauwi walanbis balna Simeón dawak Leví balna yakat: —Man lawa yang akat dutni yayamna mana. Waralaih adika pāni muihni balna yang akat dutni yakukulwarang, cananeo dawak ferezeo balna bik. Witingna aslah kalahwi nikingkauh yaklalauwarang, kat yang laih muih ahal bulah dutayang bahang, mai-ihiwarang dawak wanaihki balna bitik yakat bik ihiwarang.

³¹ Kaunah witingna biriwi kalyulna: —¿Witing kidika yangna wirahkina yal yakat pini yalni as kapat kaldunin dai katpah?