Génesis 33 - Papang Yulni

Jacob dawak Esaú karak watwi kulnin yamni kidika duduwi

¹ Jacob witing talwak wirahni Esaú kidika ahal 400 karak kalpakwi aiwakat, walabis binina kidika sahwi yakna Lea, Raquel dawak dini yamyang yayal bu kidika karak.

² Tatuna dini yamyang balna bu kidika walanina karak āna, kidika balna usnit Lea walanbis balna karak āna, dawak witni yakat laih Raquel walanibis José kidika karak āna dai.

³ Kidika usnit kat tanitna yaklawi kiuna, dawak witing limbabahwi muhni sau kat lakna wat tiaskaubu, wirahni kidika yaihnit yakat kiuna kat.

⁴ Kaunah Esaú witing kiri kiwi wirahni yakat wakaihwi umna. Bahang albupak kakaidana.

⁵ Usnit kat Esaú witing yayal balna dawak walabis balna yakat talwi yulwi dakana: —Adika balna, ¿wais yah? —Kidika balna kuduh man dima yamyang yakat Papang yaklauwi walanibis kalana kidika —Jacob kaput yulna.

⁶ Kaput laih dini yamyang balna kidika yaihnit yakat uiwi limbabahwi muhnina sau kat lalakna;

⁷ kidika usnit kat Lea witing walanibis balna karak yaihnit yakat uiwi sihm kaput yayamna, dawak witni yakat Raquel dawi walanibis José karak limbabahwi sihm yayamna.

⁸ Dawak Esaú yulwi dakana: —¿Man ais yamnin kultamanh, kidika uduhna balna karak kalpaktayang kidika? —Kulnam yamni kidika dunik yulni —kalatna Jacob yaklauwi.

⁹ —Dikah, yang wirahki, yang manas dutayang. Man dima balna kidika dutah —Esaú yaklauwi kaput kalyulna.

¹⁰ Kaunah Jacob wat wat kalyulna: —Dikah, plisma. man kulnam yamni kidika dunayang kat, adika minitdis dini adika dutah, kat man muihma nuhni palni talnin laih sihm Papang talnin kapat ki, kat man yamni yadutada bahang.

¹¹ Kalma dinit yakat buktik yultayang, dutah prisant duaitik matayang kidika, kat Papang yaklauwi di duyang yayamna bahang, yang dukih yawa dini diski. Jacob wat wat yulna, witni kat Esaú witing prisantni balna kidika duna dai;

¹² kaunah yulna: —Yamniki, akaupak mahka mawanang. Yang man tamat yakat yawaki.

¹³ Dawak Jacob yaklauwi nangnitlana: —Yang wirahki dalani, man amanglataman muihbinina laih parasninadis ki, dawak bik sīp balna yakat bik kulnik ki, turuh yayal walaninabis yayakna balna kidika bik; ma as pasyakat disuhlakwarang kat sipki bitik dauna atnin, sīp balna kidika.

¹⁴ Tanit yamniki man dima yamyang tanit yakat lawa yawama kat; yang laih tani yawaki, yang takit yakat tinglau balna lapakwi uiwa kaput, dawak bik muih binina uiwa kaput bik, Seir yakat kalpakdarang kat.

¹⁵ Esaú yaklauwi kalyulna: —Yamni ki. Datang kat muih ahal yang karak bangkidika buas makuh. Kaunah Jacob yaklauwi nangnitlana: —¡Dikah plisma! ¿Ais yamta man kalustamahn?

¹⁶ Sihm kidika mani Esaú laih witing Seir yakat kiuna dai.

¹⁷ Dawak Jacob laih Sucot yakat kiuna, dawak kidika yakat witing ūni as yamna, dawak tingnilau balna panina bik yamna. Kidika bahang kidik pāni ayangni pakna Sucot.

¹⁸ Jacob witing Padam-aram kaupak kaina kidika yamni Canaán yakat kaiwi bayakna dai, dawak Siquem muhnit yakat ūni labanni pakna.

¹⁹ Lalah dadasni 100 karak sau pis as bakanna, Hamor balna walaninabis kaupak, Siquem papangni, dawak kidika yakat ūni labanni pakna.

²⁰ Usnit kat sakripais busnin pāni as yamna, dawak ayangni pakna El-Elohe-Israel.