Génesis 32 - Papang Yulni

Jacob Esaú karak kalpapakwi

¹ Dawak Jacob mahka yaklauwi ta munah kiuna, dawak Papang innisal balna witing yakat kalalahna.

² Dawak Jacob witing talwi yulna: “Adika balna laih Papang kalbaunin muihni balna duwa kidika ki.” Kidika bahang ayangni pakna Mahanaim kidika pāni.

³ Dawak Jacob yaklauwi yul sihna, Seir sauni yakat, kidika laih Edom sauni pīsni, bahang kidika laih witing kiwa kidika wirahni Esaú yakat isningpakna,

⁴ dawak adika yulni diawadai: “Yang wirahki Esaú yakat adika kalyultanauh: ‘Man wirahma Jacob laih man tingma yakat kawi ais yulma kat yamna atnin, bahang adika yulni masihwi: Yang Labán karak yalahnayang dai adika mani balna bitik yakat,

⁵ bahang dutayang turuh yayal, biriku, sīp diki yamyang ahal dawak yayal bik. Adika yulni sihtayang wirahki yakat witing kulnin yamni kidika laihna atnik yulni.’ ”

⁶ Muih sihna dai kidika balna nawatwi aiwi kalyuyulna Jacob yakat: —Yangna wirahma Esaú yakat yawik talnayangna, dawak witing muihni palni yaklauwi kaiwi man karak kalpakna atnin yulni, witing karak aiwi muih alah 400.

⁷ Jacob kidika yulni dakawi uba yamaduna dawak kasak kulwi kalbauna. Dawak muih duwa likkidika uduhna bu sahyakna dawak turuh yayal balna, kiamil, kuts sīp balna bik;

⁸ kat witing kulna: “Esaú kidika uduhna as nining yakat kalbauwarang kat uduhna ūk kidika laih sip karang kiri yaklana atnin.”

⁹ Usnitkat witing minit yulna: “Dawan, yang kukungki Abraham Papangni dawak papangki Isaac Papangni bik, man lawa yayulnaman wattik nawattik aiwinik sauki akat, dawak wanaihki balna pasyakat, dawak man yamtang kat yang akat yamni manah kalahwarang:

¹⁰ man kulnam yamni dawak barangni man kidika yang dunik sip-awaski yang kau yamnaman kidika. Adika Jordán wasni di dis daklawanayang tulkinah manah, kaunah waralaih ū lababanni bu dutayang.

¹¹ ¡Plisma, yang wirahki Esaú tingni kaupak yalaihta yakta! Yamadutayang witing kaiwi yakalbauwarang, dawak yalki balna, walakbis balna bik iwarang.

¹² Man barangni lāih yulnaman man lawa yamtang yakat yamni manah yakalahwarang, dawak kaput bik yang sulaki balna kidika kuma kauhnimak kapat kalna karang, kulwi talnin sip-awas kapat.”

¹³ Kidika pukta Jacob yakat kamana, dawak witing tingkau duwa balna kidika yakwi duna wirahni Esaú yakat kalana atnin:

¹⁴ kuts yayal 200, kuts ahalmuk 20, sīp yayal 200, dawak sīp ahalmuk 20,

¹⁵ kiamil wisam walaninabis yayakna kidika 30 walanibis binina kauna, turuh yayal 40, turuh ahalmuk wawahma 10, biriku yayal 20 dawak biriku ahalmuk 10.

¹⁶ Usnit yakat diniyamyang balna yakat uduhna as as tingnina yakat diawi aput diyulna: —Tamatna yakat mahka yawanauh, uduhna balna kidika apis naikau yawanauh.

¹⁷ Tatuna yakwi sihna kidika aput yamnin pakna: —Yang wirahki Esaú kidika kalpaktang mayulwi dakawarang kat waisyah man damawan kidika matarang kat, dawak bik mayulwarang kat wais diniyah tinglau balna duyawaman kidika matarang kat,

¹⁸ nangnitlama: ‘Adika laih minitdis dini as ki man dima, yang dakiwan Esaú, Jacob yaklauwi sihwi, man dima yamyang kidika. Witing kidika dangkitna yakat kaiwi.’

¹⁹ Kidika kaupak uduhna bu kidika, dawak uduhna bās kidika dawak tinglau uduhna duwi uiwa balna bitik yakat, diyulna: —Manna Esaú kalpaktanama kat sihm yulni kidika kalyultanama,

²⁰ dawak bik kalyultanama: ‘Jacob man dima yamyang kidika, yangna dangkitna yakat kaiwi.’ Dawak Jacob kidika kulna dai bahang: “Witing kulnin daukalna kidika dawarang adika dini balna witing yakat sihtayang kidika munah, dawak usnit kat witing karak kalpakna awaki. Sipkat kaput laih yamni yaduna karang.”

²¹ Kaput laih, minitdis kalawa dini balna kidika tatuna sihna, dawak witing laih uni labanni yakat watwi payahna.

Jacob insal karak kalbauna

²² Sihm kidika puknita Jacob yaklauwi yalni balna bupak, dini yamyang yayal bu kidika dawak walanibis 11 kidika balna duwi Jaboc wasni kidika daklana,

²³ di duwa dai kidika balna bitik.

²⁴ Dawak Jacob alas watna kat, muih al as witing karak kalbabauna ma payahlana kat;

²⁵ kaunah al kidika talwak Jacob yakat sip minit bayakwas kat, Jacob banisar kalrikwa yakat wisna, dawak Jacob witing kalbukahna.

²⁶ Kaput dawak muih al kidika yaklauwi kalyulna: —Yadatah, kat uman payahlawi. Dawak Jacob kalyulna: —Man blisin yatasman kat sip madatasyang.

²⁷ Kidika alni yaklauwi kalyulwi dakana: —¿Man ayangma ais yah? —Yang ayangki laih Jacob —kalatna.

²⁸ Kaput dawak al kidika yaklauwi kalyulna: —Man baisa Jacob mayuyulwas karang. Man ayangma kidika laih Israel karang, kat Papang karak kalbaunaman, muih al karak kalbautasman dai bahang, dawak bik minit bayaknaman bahang.

²⁹ —Waralaih yayultah ayangma aisyah —Jacob yaklauwi kalyulwi dakana. Kaunah muih al kidika yaklauwi nangnitlana: —¿Ais yamta yang ayangki yulta dakamahn? Usnit kat kidika lani yaklauwi Jacob yakat blisin kalana.

³⁰ Dawak Jacob yaklauwi kidika pāni ayangni pakna Penuel, kat yulna bahang: “Papang kidika talnayang apat muhkina biri biri, dawak kaput kaunah yang baisa sangkayang.”

³¹ Dawak Jacob witing mahka Penuel kidika kaupak bayakwi kiwalikkat ma kidika kalahna dai; kaunah witing banisar kalrikwa dalani kidika yulni lutwinah kiuna.

³² Kidika bahang warmani kat Israel sulani balna kidika di banisar kakaswas ki, kat Jacob banisar kalrikwa yakat wisna dai bahang.