Génesis 29 - Papang Yulni

Jacob Harán yak

¹ Jacob witing tani yakat kalahwi mahka kiuna, makilwa niningkauh muihni balna saunina yakat.

² Dawak walang yakat was pa kuhrna as talna, dawak kidika yaihnit yak sīp uduhna bās talna, kat kidika yakat tinglau balna kidika was diwa bangdai. Dawak pāni kuhrna tinpas yakat kipala nuhni as bik taihna sakdai,

³ tinglau balna kidika bitik kaluduh dadawakat, sīp maintalyang balna yaklauwi kipala kidika yayakwadai sīp balna kidika was bayahna atnin yulni, was bayayahwa usnit kat watwi kipala kidika āwi taihsasakna dai was pa kuhrna kungnimak yakat.

⁴ Jacob yaklauwi sīp maintalyang balna yak yulwi dakana: —¿Manna angkaupak manah? —Yangna laih Harán kaupak yangna —kalatwadai.

⁵ —¿Manna Labán kidika talyang manah, Nacor walanibis kidika? —watwi diyulwi dakana. —Agha, amangnilatayangna —kalatwadai.

⁶ —¿Witing muihni yamni sakyah? —Jacob watwi yulwi dakana. —Agha, Labán laih yamni sakki —kalatwadai sīp maintalyang balna—. Man akat talah, witing walanbis yal Raquel kidika akat sīpni balna duwi kaiwi.

⁷ Kaput laih Jacob yulna: —Baisa madah ki, ma baisa ki sīp balna kidika ūnina yakat āwi putnin. ¿Ampadawak was bayahta data sīp balna kidika duyawanang sihrsihr kakaswasyah?

⁸ Kaunah witingna yaklauwi nangnitlalana: —Yangna sip yamtas yangna. Tahanikna ki sīp balna kidika bitik kaluduh dawak, sīp maintalyang balna kidika bitik kalpaktik kipala kidika yaknikna, kaput laih sīp balna kidika was bayahnikna.

⁹ Jacob kidika baisa witingna karak yulbauwa sakkat Raquel kidika papangni sīpni balna duwi kiwadai, kat witing kidika maintalwādai bahang.

¹⁰ Jacob witing kanni Labán sīpni balna talwa minitni yakat kiwi pa kuhrna tinpas kau kipala sakkidika yakna, dawak sīp balna yakat was bayahna;

¹¹ usnit kat kiwi umdawi parasna Raquel yakat, kaput bik laih witing kaidana.

¹² Jacob yaklauwi kalyulna witing laih Rebeca walanbis dawak Labán āniwalas, Raquel kidika dakawi kiri kiwi papangni yakat kalyulna.

¹³ Labán, witing Jacob yulni dakawi, witing wirahni ya walanbis, kalahwi kiri kiwi kalpakna, wakaihna, dawak parasna umwi dawak ūni kau dukiuna. Usnit kat Jacob yaklauwi ais kalahna kidika bitik kalyulna.

¹⁴ Dawak Labán yaklauwi kalyulna: “Rahm palni, man laih yang āki duyang as palni man.” Jacob kidik Labán karak watna waiku as.

Jacob wark kalahna Raquel dawak Lea karak yulnina

¹⁵ Kidika mani bayakna usnit kat Labán yaklauwi aput kalyulna: —Minitdis yang warkki kalahwinih, yang wanaihkiman kidika yulni. Yayultah ampus lautik manik kultamanh.

¹⁶ Labán walanbis yayal bu dauh dai: barakni kidika ayangni laih Lea, dawak bin kidika laih Raquel.

¹⁷ Lea minikpa balna laih yayamni palni dai, kaunah Raquel laih kalni kaupak tunan kat yamni yaksihn dai.

¹⁸ Bahang Jacob laih Raquel yakat isning-āna dai bahang, nangnitlana: —Walambis binkauh Raquel yulni kurih tiaskaubu warkma alahwaki.

¹⁹ Kaput laih Labán yaklauwi nangnitlana: —Tanit yamniki man yakat manik dawak muih ūk yakat kalanik karak dawakat. Yang karak wattah.

²⁰ Kaput laih Jacob wark kalahna dai Raquel yulni kurih tiaskaubu, kaunah witing niningyakat laih ma bulah kapat kaldakana dai kat uba dalani talwadai bahang.

²¹ Kurih tiaskaubu bayakna kat, Jacob yaklauwi Labán yak kalyulna: —Yalki kidika yatang dukuh, kat witing yulni wark alahwinik pramis yamnayang kidika uman mani balna bayakkiuna bahang.

²² Kaput laih Labán witing yaklauwi yaihnitkau muih balna kidika bitik yulwi duwi kiuna kalduduwa alasnina yamwa kidika yakat.

²³ Kaunah pukta yakat, Labán yaklauwi walanibis Lea kidika duwi Jacob yakat uiwi kalana, dawak Jacob witing Lea karak payayahna.

²⁴ Baisa minit yakat Labán yaklauwi walanibis Lea yakat dauh kalana dini yamyang as, ayangni laih Zilpa, bahang kidika laih witing dini yamna atnin yulni.

²⁵ Payahlawak mapiris Jacob talna, witing Lea karak bayayahna kidika amanglana, dawak Labán yakat kalyulna: —¿Man ais yayamnamahn? ¿Man karak wark alahwanayang awasyah Raquel yulni? Kaput kat, ¿ais yamta alas yayamtamahn?

²⁶ Labán yaklauwi nangnitlana: —Yangna akat kaput yamtasyangna walanbis yal bin kidika tatuna al dunin, walanbis yal barakni karak dawakat.

²⁷ Lea dunaman kidika alasnina ma tiaskaubu kidika laihta, kaput dawak laihtak Raquel kidika bik matanaki, kaunah man yang karak watta kurih tiaskaubu wark alahwinik pramis yamma kat.

²⁸ Jacob witing kaput yamnin kulna, bahang Lea karak kalduduna alasnina kidika bayak dawak, Labán yaklauwi walanibis Raquel yakabik kalana yalni duna atnin.

²⁹ Kaput laih Labán yaklauwi Raquel yakat kalana witing dini yamyang kidika kaupak as, ayangni laih Bilha, bahang dini yamna atnin yulni.

³⁰ Dawak Jacob laih Raquel karak bik payayahna, kaput laih Lea karak dawak Raquel yakauh tanit dalani talna dai, Labán karak baisa kurih tiaskaubu wark kalahnin dai kaunah.

Jacob walanbis balna

³¹ Dawan talwak, Jacob yaklauwi Lea yak dalani talwaskat, kalana witing kidika walabis yakna atnin, kaunah Raquel laih kalawak muih duwas dana.

³² Lea muih karuk kalna, bahang walanbis as duna, ayangni laih Rubén pakna, kat yulna dai bahang: “Dawan laih kulnik bukna kat talna. Kaput bahang waralaih yang alki kidika dalani yatalwarang.”

³³ Kidik usnit yak Lea walanbis ūk duna, dawak ayangni pakna Simeón, dawak yulna: “Dawan dakana dauh yakukulwa kidika, kidika bahang baisa walabis as yana.”

³⁴ Dawak watwi walanibis al ūk yakna, kidika ayangni laih pakna Leví, kat yulna bahang: “Waradika laih alki kidika baisa yang karak payahwarang, kat uman walanibis bās kalanayang bahang.”

³⁵ Lea baisa walanibis ūk duna, kidika laih ayangni pakna Judá, kat yulna bahang: “Waradika laih Dawan ayangni nuhni yamki.” Kidika kaupak watwi walabis duwas danadai.