Génesis 27 - Papang Yulni

Isaac yaklauwi Jacob dawak Esaú yakat blisin diawi

¹ Isaac kidika uman muihbarak kalna dai, dawak minikpa bik di talwas dana dai. Bahang ma as kat Esaú yakat kalyulwak kiwak aput kalyulna: —¡Walakbis! Esaú biri kalyulna: —Papang yayultah.

² Dawak Isaac yulna: —Talaman, yang laih uman muihbarak kalnayang, adika mani balna akat sipki daunik.

³ Kaput bahang dukih yawi man asangpas yakat yawah, lasma dawak simabang balna duta, dawak di as īta aiwah.

⁴ Usnit kat man yamni auhni lahta wasnibin bik apis datah, yang kaskihyawa kaput, dawak duaita yatang kaskuh. Kaput laih yang dautas yang kau blisin maki.

⁵ Kaunah Rebeca laih dakawasakdai Isaac yaklauwi Esaú yakat kalyulwa kidika. Kaput bahang witing asangpas yakat di īna kiudawak papangni yakat duaiwi kalanin yulni,

⁶ yal kidika yaklauwi walanibis binkauh Jacob yakat kalyulna: —Talah, yang warmani dakanayang papangma kidika wirahma Esaú yakat aput kalyulwak:

⁷ ‘Man di as īta aiwah auhni lahta wasni karak utuhta yatang kat kaskuh, dawak kaput laih dautasyang kau Dawan muhni tani yakat blisin māki' dautas yang tanityak.’

⁸ Kaput bahang, walakibis, yamni dakah mayulki kidika:

⁹ Man yawah tinglau bangkidika yakat, dawak kuts binina tanit yayamni kidika bu duaita yatah; papangma yakat lahtik kalaki auhni palni wasnibin bitik, witing yamni dakawa kaput.

¹⁰ Man duyawa kalatang kat kaswarang, dawak kaput laih blisinni kidika man yakat mawarang witing dauwas tanitkauh.

¹¹ Kaunah Jacob yaklauwi nanangni yakat kalyulna: —Wirahki laih unitak yakat butuni mahni duwi, kaunah yang laih butuki diski.

¹² Papang ki yalaihwi dakawi amangkilawarang kat, witing kulwarang yang lawik sarahni kaltalayang; kaput laih yang akat layatuhwarang blisin yanin pāni yakat.

¹³ Kaunah nanangni yaklauwi nangnitlana: —Walakbis la tuhnin kidika yang mikit yakat bukwang. Man laih yamtah yang mayultayang kidika, kuts binina kidika duaiyatah.

¹⁴ Jacob witing kiwi kuts binina kidika duaiwi kalana nanangni yakat. Witing yaklauwi di lahna auhni yamni dawak wasnibin bitik apis dana, Isaac kaskih kalawa kaput,

¹⁵ dawak Esaú asnina tanit yamni kidika yakna, bahang kidika asnina laih ūni yakat apakna bangdai, dawak witing walanibis binkauh Jacob yakat āna.

¹⁶ Usnit kat, kuts unitak yakau Jacob tingni dawak dinimak yakat bik muklakna dai, butuni dis pāni balna yakat,

¹⁷ dawak di auhni lahna dai kidika dawak plawar bik busna dai kidika karak kalana.

¹⁸ Kaput laih Jacob witing papangni sakyakat kawi aput kalyulna: —¡Papang! Isaac biri kalyulna: —Akat sak yang. ¿Walakibis balna bu kidika angdikamahn?

¹⁹ —Yang kuduh Esaú man walamabis barakni —kaltadai Jacob yaklauwi—. Man yayulnaman kidika yamnayang. Bahang plisma lawa yalahda di īnayang adika kastah, dawak man blisinma kidika yatah.

²⁰ Kaput laih Isaac yaklauwi yulwi dakana: —¿Amput sirihni kalpaktadah yang walakibis? —Man Damawan Papangma yaklauwi ilp yana waltik yaknik —kalatna Jacob yaklauwi.

²¹ Kaunah Isaac yaklauwi yulna: —Īs aiwang malaihtik dakakuh, kaput laih amanglaki rahm man kidika walakbis Esaú man pa.

²² Dawak Jacob iskiuna papangni Isaac laihwi dakana atnin. Kaput dawak Isaac yulna: “Dinit yulwa kidika Jacob dinit, kaunah tingni balna laih Esaú tingni.”

²³ Kaput laih sip amangnilawas dana, kat tingni balna kidika butuni kasak duwadai bahang, witing wirahni Esaú kapat. Kaunah witing mahka blisin kalawarang kat,

²⁴ watwi kalyulwi dakana: —¿Rahm man kidika walakbis Esaú manh? —Agha yang Esaú —Jacob yaklauwi kalyulna.

²⁵ Kaput laih papangni yaklauwi kalyulna: —Bahang walakbis, kasnik kidika yatah, man di īnaman kidika, dawak kaput laih blisin māki. Jacob yaklauwi papangni yakat di kalawak kasna, dawak wain bik uiwi kalana. Isaac witing kasna dawak bik dina,

²⁶ usnit kat kalyulna: —Walakbis, yaihkit yak aiwah yaumtah.

²⁷ Jacob kidika yaihnit yakat kiuna umna atnin dawak Isaac witing asna wayani duwa kidika dakana. Kaput laih adika yulni karak blisin kalana: “Walapni as purwa kidika laihwalakibis kaupak purwi. Kidika laih asangpas kau purwa kapat ki Dawan yaklauwi blisin kalana kidika.

²⁸ Papang yaklauwi was mawarangmakau kisang kaupak, sau akat di minik tanit yamni kidikamawarang, plawar minik manas dawak wain bikmanas mawarang.

²⁹ Muih mahni dima yayamwarang; nisan balna kidika man muhma yakatlimbabahwarang. Man wirahma balna kabamintni awama; ¡man muhma tani yakat limbabahna karang! Wais lamatuhwarang kat, kidika muihni laih la tuhna karang, dawak blisin mawarang muihni kidikayakat laih blisin kalana karang.” ,

³⁰ Isaac yaklauwi Jacob yakat blisin kalawi dahn dawakat, Jacob kidika papangni sakkidika kaupak kalahwi kiwak, Esaú kidika di iwi kaikalahna dai.

³¹ Dawak witing bik di auhni lahna dai wasnibin bik apis danadai lahna kidika pasyakat, dawak papangni yakat dukiwi aput kalyulna: —Papang, lawah; bahang man walambis di īna kidika kastah, dawak blisin kidika yatah.

³² Isaac yaklauwi yulwi dana: —¿Man kidika wais manh? —yang kuduh Esaú, man walambis barakni —kaltadai.

³³ Isaac witing kasak isning-aina, dawak dinit dalah kalyulna: —Kaput kat, ¿wais daih kiwi di iwi duaiwi lahwi yana kidika? Yang bitik kasnayang man aiwasman tanit kauh, dawak yang lawik blisinki kidika kalanayang, bahang waralaih witing kidika blisin duna.

³⁴ Esaú, witing papangni yulwa kidika dakawi tapalhni palni kaidana, dawak sarahwi yulna: —¡Yang akat bik man blimasin kidika yatah, papang!

³⁵ Kaunah Isaac yaklauwi nangnitlana: —Uman wirahma kaiwi alas yuyulwi, man blimasin dai kidika duwi kiuna.

³⁶ —¡Kidika bahang aitani witing ayangni kidika Jacob papakna! —kaput Esaú yulna—. ¡Uman wat bu alas yayamwi! Tatuna witing yaklauwi walanbis tatuna rahmni kidika yadakyakna, dawak waradika laih yang blisin dunik dai kidika yadakyakna. ¿Blisin ūk dismanh yang diki?

³⁷ Kaput laih Isaac yaklauwi kalyulna: —Talah, yang lawik wirahma Jacob yakat la parasni kidika kalanayang man mamatyakat atnin, witing wanaihni balna bitik kidika witing dini yamyang atnin kalanayang, dawak bik kalanayang plawar minik kidika bik mahni palni duna atnin dawak wain bik. ¿Yang ais yamnik sipyah man dima atnin kidika, yang walakibis?

³⁸ Esaú watwi yulna: —¿Blisin as bik yanam sip-awasyah, papangki? ¡Yang akat bik blisin yatah! Dawak watwi parasni sarahwi kaidana.

³⁹ Kaput laih Isaac yaklauwi kalyulna: “Sau yayamni kidika kaupak naikau yawama dawak makau kisang kaupak was lauwa kidika bik.

⁴⁰ Man ismaparah kaupak namatdakma dawak man wirahma dini yamyang awama; kaunah man parasni alahwama kat, witing kaupak dakta alahwama.” ,

Jacob kiri wirahni Esaú muhni kaupak

⁴¹ Kidika kaupak Esaú yaklauwi Jacob yak waihla talna, papangni blisin kalana kidika yulni kaupak, dawak bik kulwadai: “Sirihni makulnik bukna karangki papangki dauwarang mani kat, kidika kaupak usnit kat Jacob kidika ipamki ki.”

⁴² Rebeca witing dakana kat walanibis Esaú yamnin kulwa kidika, Jacob yakat kalyulwak kiwak aput kalyulna: —Talah, man wirahma Esaú kidika maīnin yamwi.

⁴³ Kaput bahang, walakbis dakah; Harán yakat īra yawah, yang wirahki Labán ūni yakat.

⁴⁴ Witing karak ma apis wattah, man wirahma kulnin daukalna kidika bayakwarang kat

⁴⁵ dawak datang damatkahwang kalyamnaman kidika. Kaput laih ismang pakting kat aiwama. ¡Yang walakbis bu dutayang kidika ma aslah pasyakat bupak disnik kidika dukih yāwaski!

⁴⁶ Usnit kat Rebeca yaklauwi Isaac yakat kalyulna: —Yasuhdana sangkika adika Esaú witing hitita yalni as duna kidika yulni. Dawak Jacob bik sihm hitita yalni as karak kalduduwarang kat, Canaán akat yalalahwa balna kidika, tanit yamni karang dauki kat.