Génesis 21 - Papang Yulni

Isaac batahnna

¹ Pramis yamna kaput, Dawan yaklauwi Sara'kat kaltalna, dawak witing yaklauwi kalyulna dai yakat yamna,

² kaput bahang Sara kidika muih karuk dana, dawak Abraham yakat walanibis as kalana, Abraham kidika muih barak kalna mani kat. Dawak muihbin kidika batahnna, Papang yaklauwi kalyulna dai kaput.

³ Sara yaklauwi Abraham yakat walanibis as kalana kidika ayangni pakna Isaac;

⁴ dawak ma tiaskaubās laihwak Papang sainni kalana, Papang yaklauwi paknadai kaput.

⁵ Abraham witing kurih andat laihna kat, walanibis Isaac kidika batahndana dai.

⁶ Kaput laih Sara witing kulna: “Papang yaklauwi yayamwak aranayang; dawak muihbin dunayang kidika muih bitik yadakakawarang kat yang karak kakararang.

⁷ ¿Wais yaklauwi Abraham yakat kalyulnin sipdaih, yang lawik witing yakat walanibis as kalanik? Kaput kaunah yang lawik walanibis al as kalanayang witing muihbarak kalna kaunah.”

Agar dawak Ismael karak Abraham ūni kaupak yakmukna

⁸ Muih albin Isaac kidika barakna, dawak ta dakyayakna. Ta dakyayakna mani kidika Abraham witing alasna nuhni as yamna.

⁹ Kaunah Sara talna, Abraham walanbis Egipto yal Agar kaupak yakna kidika yaklauwi witing walanibis Isaac yakat sarahni kalyamwadai.

¹⁰ Dawak Abraham yakat kiwi kalyulna: “¡Muih dinina yamyang yal kidika mahka walanbis karak kalahwi uiwang! Yang walakbis Isaac kidika sip-awas ki muih dinina yamyang yal walanibis yakarak dipahni kidika sahyakwi dunin.”

¹¹ Adika yulni Abraham yakat rahm dalani kalana, kat witing walanibis dai bahang.

¹² Kaunah Papang yaklauwi kalyulna: “Kaunah muihbin kidika yulni kulwi kalbauwinih, dawak dima yamyang yulni bik. Sara ais mayulwa kidika bitik yamtah, kat sulama balna kidika laih Isaac munah kaiwarang ki.

¹³ Dawak dima yamyang walanbis al kidika laih yang lawik yamtingkat witing munah nisan nuhni as kalahwarang, kat man walambis bahang.”

¹⁴ Bahang kidika kaupak payahlawak mapiris Abraham yaklauwi plawar busna dawak was di-utak buhng puwi kalana, kidika bitik laih dangni yakat ilwi kalana, dawi muihbin kidika kalawi dawi mahka yakpamwak kiuna. Dawak witing mahka kalawi kiuna, pini lapakwi kiuna Beerseba kauhnimak wanilang pasyakat.

¹⁵ Di unitak kau was duwalik kidika dahn kalna, dawak muihbin kidika damasni dinit yakat laktusna

¹⁶ dawak kidika kaupak naikau iskalahwi kiwi yalahna, kat witing talwasak kat dauwarang kidika sip-awas kaldakana. Witing kidika mahka yalah dawakat muihbin kidika kaidana.

¹⁷ Dawak Papang dakana muihbin kaida kidika, dawak makau kisang kaupak Papang innisal kidika kalyulna Agar yakat: “¿Agar ampatdawih? Yamaduwinih, kat Papang uman dakana muihbin kaida kidika.

¹⁸ Muihbin kidika walta yawah, tingma kaupak dawinih, kat witing munah yamting kat nisan nuhni as kalahwarang ki.”

¹⁹ Kaput laih Papang yaklauwi yamwak Agar witing was pa kuhrna as talna. Dawak witing kiwi di unitak dai kidika kau was buhng puwi duna, dawak Ismael yakat kalawak dina.

^20-21 Papang yaklauwi muih albin yakat ilp kalana, bahang witing kidika barakwi Parán kauhnimak wanilang yakat yalahna, dawak witing kidika las ruhmyang yamni palni kalnadai. Kaput laih nanangni yaklauwi Egipto yalni as karak kalawak duna dai.

Abraham dawak Abimelec karak pramis yayamna

²² Adika mani balna kapat yakat, Abimelec witing kiwi Abraham karak yul bauna. Dawak Ficol kalbauyang balna taninatuna kidika karak minikdawak uina. Dawak Abimelec yaklauwi Abraham yakat kalyulna: —Mayang taldi di bitik yamtaman kidika Papang yaklauwi ilp mawi.

²³ Kaput bahang Papang ayangni kau yakta yultah, adika pāni akat, man dutni as bik yamtas awama, yang akat, walakibis balna yakat, dawak bik sulaki balna kalahwi kaiwarang kidika balna yakat bik. Papang ayangni kau yakta yayultah, yang man yakat kulnik yamni kau amput mayamnayang kaput birita kaput kulnam yamni kau yāyamna, dawak kaput bik adika pāni muih balna yakat bik kaput diyamna, man yalahtaman pāni yakat bangkidika.

²⁴ Dawak Abraham biriwi kalyulna: —Papang ayangni kau yaktik mayultayang.

²⁵ Kaunah Abraham yaklauwi Abimelec yakat isningpakna, witing pa as kuhrna dai kidika was dunin yulni, bahang kidika pāni laih Abimelec dini yamyang balna yaklauwi dakyayakna dai bahang kidika yulni kalyulna.

²⁶ Dawak Abimelec yaklauwi nangnitlana: —Yang warmani kat kidika yulni dakasyang, kat man lawa yayultasman dai. Yang amanglatasyang wais yaklauwi kaput yamnin sipdai pa.

²⁷ Kaput laih Abraham witing sīp dawak turuh yayal balna yakwi Abimelec yak kalana; dawak kidika mani witingna albu pramis as yayamna.

²⁸ Kaunah Abraham witing tingnilau balna kaupak sīp tiaskaubu yaihnit yak lana,

²⁹ dawak Abimelec yulwi dakana: —¿Ais yamta sīp balna tiaskaubu kidika yaihnit yakat lataman?

³⁰ Dawak Abraham biri kalyulna: —Adika sīp tiaskaubu matayang adika tanka laih pa kuhrna kidika yang yamnayang.

³¹ Kaput bahang kidika pāni ayangni laih pakna Beerseba, kat kidika yakat, witingna albupak pramis as yayamna dai bahang.

³² Beerseba yakat pramis yayamna usnit kat, Abimelec dawak Ficol karak witingna saunina yakat nawatwi uina dai filisteo balna saunina yakat.

³³ Beerseba yakat Abraham witing tamarisco panan as dahna dawak Dawan yakat minityulna, Papang ban kaput yakat.

³⁴ Ma mahni Abraham filisteo balna saunina yakat yalahna dai.