Génesis 16 - Papang Yulni

Agar dawak witing walanibis Ismael karak

¹ Sarai witing sip-awasdai alni Abram yakat walanbis kalana atnin, kaunah Egipto kaupak warauni yal as duwa dai kidika ayangni Agar.

² Bahang kaput laih Sarai yaklauwi Abram yak aput kalyulna: —Talah, Dawan yaklauwi walabis yakwaski yakna atnik, kaunah kalma dinit yakat buktik yultayang, diki yamyang Agar karak kalpaktanauh bahang kaput laih witing munah sip awakipa walabis dunik. Abram laih Sarai ais kalyulna kidika yamni talna,

³ bahang Sarai yaklauwi Egipto yalni Agar kidika duwi kiwi Abram yakat kalana yalni duna atnin, bahang witing kidika laih uman kurih salap duduwadai Canaán sauni yakat yalalahna kaupak.

⁴ Abram Agar karak kalpapakna mani muih karuk kalna, dawak witing muih karuk kalna kidika amanglana kat, Sarai yakat di dauh kapat as kaltalna dai.

⁵ Bahang Sarai Abram yak kalyulna: —¡Man pātma dutaman, Agar yaklauwi yang kauh di dauh kapat yatalwa kidika! Yang palni lawik manayang man yalma atnin, dawak waralaih walabis as duwarang bahang, yang karak dawak witing kauh tanit nuhni kaldakawi. Bahang Dawan yaklauwi yulwarang wais kidika pātnipa, man kidika awaskat yang.

⁶ Abram yaklauwi biri nangnitlana: —Talah man warauma yal kidika tingmayak ki; bahang witing yakat ais kalyamnam kulma kidika kalyamma. Kaput laih Sarai yaklauwi Agar yakat uba dutni kalyamna, kidika bahang Agar witing kirana.

⁷ Kaunah Dawan innisal kauhmak wanilang yakat kalpakna, Shur tani kau wastuna sakkidika yaihnit yakat,

⁸ dawak kalyulwi dakana: —Agar, Sarai dini yamyang, ¿angkaupak aiwamahn dawak angkat yawamahn? Agar biri nangnitlana: —Yang dakiwan yal Sarai kaupak irayang.

⁹ Dawak Dawan innisal kidika yaklauwi aput kalyulna: —Damawan yal yakat nawatta yawah, dawak witing ais yulwa kidika bitik daka yamtah.

¹⁰ Kidika minityak Dawan innisal kidika aput kalyulna: “Sulama balna kidika mahni palnimāki, bahang muih as bik sip kulwi yakwaskarang.

¹¹ Man muih karukman, bahang walambis al as duma, ayangni Ismael pakma, kat kulnam bukna kidika Dawan tapani kat kana bahang.

¹² Witing kidika minikratni karang sihm aras wail as kapat; muih bitik nining yakat kalbauwarang, dawak muih bitik yaklauwi bik witing niningyak kalbabauwarang; kaunah witing ūni duna karang, wirahni balna kidika witing nining kauhyaklalauwarang bik.”

¹³ Agar kidik Dawan karak yulbauna bahang kalyulna: “Papang talwa kidika”, kat aput yulwadai bahang: “Papang yatalna, kaunah yang baisa sangkayang.”

¹⁴ Kidika bahang was kuhrna pāni yak bik ayangni pakna: “Pa kuhrna sangka kidika, dawak bik yatalwa kidika”. Adika pāni kuhrna laih sakki Cades dawak Bered kidika walsah yakat.

¹⁵ Agar yaklauwi Abram yakat walanbis al as yakwi kalana, dawak Abram yaklauwi ayangni Ismael pakna.

¹⁶ Ismael batahnna mani, Abram laih kurih 86 duwa dai.