Génesis 11 - Papang Yulni

Makau kilwi talnin pāni Babel

¹ Kidika mani balna yak muih bitik laih yulnina aslah manah yuyulwa dai.

² Dawak ma kilwa sauni kaupak kalahwi uiwi Sinar sauni yak walang as yayakna, dawak yakat watwi yalalahna.

³ Mani as kat witingna biri biri yuyulna: “Sau bibilni kau rabutdi dadi kuhkau busdanang.” Kaput yamwi kipala yus yayamwadai kidika dadana, dawak di ūk karak banawi kuruhwi yusyayamwadai kidika bik dawi tar yusyayamna.

⁴ Kidika usnit aput yuyulna: “Aiwanangkat tawan nuhni as yamdanang, dawak ta kilitna as yamdanang makau kisang kat kilwi kanin praisni kat. Kaput laih mayang adika ma-ayangki nuhni kalna karang, dawak sip pini ruhdi mawaskarang sau pāni bitik yakat.”

⁵ Kaunah Dawan kaiwi yaklakwi talna tawanni nuhni yayamwa kidika, dawak ta kilitna yayamwa kidika, muih balna,

⁶ dawak kulna: “Witingna laih tawan aslah ki, dawak yulnina bik aslah yuyulwi; kaput bahang adika warkni tunan babahna, bahang waralaih sip dadawas karang yayamwa kidika.

⁷ Bahang tanit yamni karang malamawi yulnina kidika satuk wirlamukdarang kat, dawak kaput laih witingna biri yulbabauwa kidika sip amanglalawas karang.”

⁸ Kaput laih Dawan yaklauwi muihni balna kidika sau pāni balna bitik yak pini rawi kiuna kidika, dawak witingna tawan nuhni yayamwa dai kidika dadana.

⁹ Kidika pāni yakat Dawan yaklauwi sau muihni balna yulnina bitik satuk wirlamukna, dawak kidika yakaupak sau pini bitik yakat rawi kiuna. Kaput kalahna dai bahang kidika tawanni nuhni ayangni pakna Babel.

Sem sulani balna

¹⁰ Adika balna dai Sem sulani balna kidika. Was nuhni awi bayakwak kurih bu usnit yak, Sem kidika kurih 100 laihwak, witing walanibis Arfaxad kidika batahndana.

¹¹ Adika usnit kat Sem kurih 500 sangka lik dai, dawak baisa walanbis ahal yayal bik yakna.

¹² Arfaxad kidika 35 duwakat walanibis al Sala kidika batahnna.

¹³ Adika usnit kat Arfaxad kurih 403 sangka dai, dawak walanbis ahal dawak yayal bik ūk duna dai.

¹⁴ Sala witing kurih 30 laihna kat, walanibis Heber kidika batanh dana.

¹⁵ Adika usnit kat Sala witing baisa kurih 403 sangka dai, dawak walanibis ūk bik duna dai, ahal dawak yayal bik.

¹⁶ Heber witing kurih 34 laihna kat, walanibis Peleg kidika batanh dana.

¹⁷ Kidika usnit kat kurihni Heber 430 sangka dai, dawak walanibis ahal dawak walanibis yayal bik duna dai, muihasluih.

¹⁸ Peleg kurih 30 duwa kat walanbis al Reu kidika duna.

¹⁹ Kidika usnit kat Peleg witing kurih 209 sangka dai, dawak witing walanibis ahal dawak yayal bik duna dai.

²⁰ Reu witing kurih 30 duwa kat walanibis Serug kidika duna dai.

²¹ Kidika usnit kat, Reu baisa kurih 207 laihna manikat, walanibis ahal dawak yayal bik ūk duna dai.

²² Serug witing kurih 30 duwa kat walanbis al Nacor kidika batahndana.

²³ Kidika usnit kat, Serug kurih 200 sangka dai, dawak walanibis al dawak yal bik duna dai

²⁴ Nacor kurih 29 duwa kat walanbis al Taré kidika batahndana.

²⁵ Adika usnit kat, Nacor baisa kurih 119 sangka dai, dawak walanbis ahal dawak yayal bik duna dai.

²⁶ Taré witing kurih 70 duwa kat walanibis ahal Abram, Nacor dawak Harán kidika balna batanh dadanadai.

Taré sulani balna

²⁷ Adika balna kuduh Taré sulani balna, dawak bik Abram Nacor dawak Harán balna papangnina. Dawak Harán laih Lot papangni dai

²⁸ bahang Caldea kau Ur yakat dauna, Witing papangni Taré dauwas tanit kauh. Dawak Harán bik sihm witing batanh dana pāni yak dauna.

²⁹ Abram laih Sarai karak kalduduna dawak Nacor laih Milca karak kalduduna. Bahang Milca laih Harán walanbis dai, dawak Isca wirahni yal.

³⁰ Sarai laih walanbis yakwasdai nining kaput dai.

³¹ Taré laih caldeo sauni Ur kaupak kalahna Canaán sauni yakat, kiuna atnin yulni, bahang witing walanbis Abram bik duwi kiunadai, mani Lot kidika bik duwi kiuna. Kaput kaunah, witingna Harán tawanni nuhni yakat uiwi kakana kat, yakat watwi yalalahna dai.

³² Dawakat Taré kidika Harán yakat dauna, bahang witing laih kurih 205 duwadai.