Filipos 4 - Papang Yulni

Alasna ban awanauh Dawan yakat

¹ Kidika bahang, wirah balna, kidika balna yakat talkih yawa kidika; manna dalani manatalayang kidika, alaskina mana dawak di yamni duki kidika, kaput ban awanauh, Dawan yakat parasni awanauh.

² Evodia kalni dinit yakat buktik yultayang, Síntique yakat bik, wirah yayal Dawan kau balna kidika karak yamni awanauh.

³ Dawak man yakat laih, kaltalyang yamni mayang kidika wark pasyakat, mayultayang wirah yayal balna akat ilp diatah, kat witingna yang yaihkit akat kalbabauna yul wisam yamni kidika sumalnin yulni, Clemente karak kalpakwi dawak ūk balna bik yang karak wark kalalahwa kidika. Witingna ayangnina kidika laih sangka wauhnitaya yakat uman ulna ki.

⁴ Dawan yakat ban alasna awanauh. Wattik yultayang: ¡Alasna awanauh!

⁵ Muih bitik amangmanalalawang, manna laih minikun talnin dutamana kidika. Dawan laih ulis akat sakki.

⁶ Kulnamna buknin awaski di dauh yulni, nawatkauh laih di bitik kidika Papang muhni yakat duyawanauh makatyulna munah; yultanauh dunin, dawak tingkih bik kalatanauh.

⁷ Kaput laih Papang yaklauwi kulnin aslah kidika manawarang, kidika laih tanit nuhni ki, muih al amanglawarang kidika karak dawakat; waradika laih kulnamna maintalwarang, ismangna Krais Jisas munah.

Di yayamni bitik kidika kultanauh

⁸ Witni yakat wirah balna, di rahm kidika manah kultanauh, rispik dini kidika manah, di bitik barangni kidika, maisihnidis kidika, walapni yamni kidika, ayangni nuhni yamni duwa kidika bik. Kultanauh di balna yayamni yakat dawak ayangni nuhni yamnin kidika yakat bik.

⁹ Manasumalnayang kidika bitik laihta yamtanauh, yulting dakanamana kidika, kulnin aslah Papangni kidika manna karak karang.

Filipos muihni balna lalah uduhwi Pal yakat sisihna

¹⁰ Uba alasna dutayang Dawan yakat, manna yang akat yakulnamana kidika. Yultasyang damatnakahna dai yang adika, kaunah sip awasmana dai kidika ilp yanamna.

¹¹ Yang yultasyang dukih yawa kidika yulni, kat lan alahwanayang ais dutayang kidika karak isinglak ki.

¹² Amanglatayang mamikunni yalahnin kidika, dawak di duyang yalahnin kidika bik. Ma satni balna niningnayakat lawinik kidika lan alahwanayang, isinglak dawak yuh wauhnik bik, di minit bayak dunin dawak di dis atnin bik.

¹³ Di bitik niningyakat lawinik sipyang, Krais yakat tingkih kalatayang paraski yawa kidika.

¹⁴ Kaput kaunah, manna yamni yamnamana, wauhtayang kidika apis dunamana yulni.

¹⁵ Macedonia kaupak yawik mahka yul wisam yamni kidika sumalnayang mani kat, manna, Filipos sutsni muihni balna, manna manah dai tingkih kalanin yulni minitdis kalanin dini balna yasihnamana dai kidika spirit niningkauh ilp dunamana dai kidika yulni.

¹⁶ Tesalónica yakat sakyang dai kidika, watas kapat manna lalah yasihnamana, yang dukih yawa balna kidika yulni.

¹⁷ Manna yatanauh yulni manayultasyang; dukih yawa kidika laih manna Papang muhni yakat di yamni manas yamnamna.

¹⁸ Dunayang dini kidika wauhnitaya manasihtayang, di manas bik dutayang. Epafrodito kaiwak yasihnamana kidika, bahang di manas dutayang. Prisant dini yasihnamana kidika laih walapni busna as kapat ki, sakripais as Papang dukih kidika.

¹⁹ Kaput bahang, Papangki yaklauwi manna dismana kidika manana karang, Krais Jisas kau ritsni balna duwa kidika.

²⁰ ¡Alasnina yaksihni kidika ban kaput karang mayang Mapapangki! Amén.

Witni yakat parasna kidika

²¹ Jisaskrais tawan holi balna kidika bitik pararaswang yang kaupak. Wirah balna yangkarak balna kidika bik parasnin sisihwi.

²² Kaput bik parasnin sisihwi holi tawanni muihni balna bitik, dawak tanit kidika laih Roman kingni nuhni dini yamyang balna kidika.

²³ Dawan Jisaskrais tingnikih kidika manna mamatna yakat utuhwang.