Filemón 1 - Papang Yulni

Kalparaswi

¹ Yang, Pal, Krais Jisas yulni silak kau sakyang, adika wauhnitaya maultayang wirah Timoti karak, man yakat Filemón, kaltalyang yamni wark aslah malahwa kidika,

² dawak suts muihni balna ū yakat kalududuhwa kidika, sihm kaput bik wirah yal Apia dawak Arquipo, mayang karak kalpakwi kalbauwa kidika.

³ Mayang Mapapangki dawak Madakiwan Jisaskrais tingnikih dawak kulnin aslah kidika utuhwang mamatna yakat.

Dalani lani dawak kasak kulnin Filemón duwa kidika

⁴ Nining Papang kau tingkih kalatayang, man yakat makultayang kat mikityultayang kat,

⁵ kat yul dakanayang, man dalani lani dawak kasak kulnin bik dutaman kidika Dawan Jisas yakat dawak tawan holi muihni balna bitik kau.

⁶ Dawak Papang yakat yultayang, kasak kulnin dutaman kidika madukiwak amanglanam Krais Jisas dalani lani duwa kidika munah di yayamni bitik yamnin sipmayang kidika.

⁷ Isinglak ki, dawak kulnik bik dulauwi dalani lani dutaman kidika yulni, wirah, walaniānin isningna yakat bahngnaman kidika tawan holi muihni balna yakat.

Pal, Onésimo silak kau tuskidika ilpni yulwi

⁸ Kidika bahang, yang Krais aposnitel yang kapat rahmki dutayang mapakting yamnam, ais yamnam dini kidika,

⁹ kalma dinit yakat buktik yulkih yawi dalani lani ayangni kau. Yang, Pal, uman muihbarak kalnayang, dawak waralaih Krais Jisas yulni silak yakat yang.

¹⁰ Ilp as yultayang, walakibis Onésimo yulni, yang witing papangni kalnayang kasak kulnin kidika munah silak ūni akat.

¹¹ Ma ūk balna yakat, man namangyakat Onésimo kidika laih silak muihni as ilp as bik disdai, kaunah waradika laih mayang maniking yakat ilp as ki.

¹² Wattik nawattik masihtayang: kidika laih walakibis bakipas kaupak kaina.

¹³ Sipdai yang dukih yanin witing kidika akat yang karak watnin, kaput laih man pama yakat wark yamnin, yang laih silak akat tusyang kat, yul wisamni yamni kidika yulni.

¹⁴ Kaunah di as bik yamkih yāwaski, man lawa yamni talasman kat, kaput laih ilp yataman kidika man yamnam dini kaput laih atnin awaski, kaunah man alas kulnam lani.

¹⁵ Sip kat Onésimo kidika man kaupak isyaklana ma as as, kaput laih warmani ban yaihmat yakat dunam,

¹⁶ muih dinina yamyang kapat laih awaski, kaunah waralaih tanit yamni ki: wirah dalani as kapat. Yang dalani kaltalayang, kaunah man laih tanit dalani talnamki, muihni nuhni kidika manah laih awaski, kaunah Krais niningyakat wirah as kapat.

¹⁷ Kaput bahang, kasak kulnin yakat wirah kapat yadutaman kat, dutah yang apat kultinah.

¹⁸ Di dutni as mayamna, kidika awaskat lauwi manin duwa kat, yang akat minit yakultah.

¹⁹ Yang, Pal, tingki kau laihtik ultayang wauhnitaya adika: Yang lautik maki. ¡Man launam wauhnitaya yakat ānin yultasyang, kat man muihma nuhni palni bik yanin dutaman bahang!

²⁰ Agha, wirah, man yakat ilp as yultayang, Dawan dalani lani karak; kulnik adika walaniatah Krais yakat kalwirah mayang kapat.

²¹ Maultayang, kat yamni amanglatayang yul kidika daka yamtaman bahang, dawak bik amanglatayang, mayultayang adika baisa minitkau yamma.

²² Baisa minityakat, payahnik pāni ridi yamtah; kat tahatayang, manna mamatnayultamana yulni, Papang yaklauwi yāwak yawik manatalki.

Witni yakat paraswi

²³ Epafras paraswang, silak akat aslah yangna dai kidika Krais Jisas yulni,

²⁴ Marcos, Aristarco, Demas dawak Luk bik, witingna wark yakat ilp yayawa dai kidika.

²⁵ Dawan Jisaskrais witing tingnikih kidika mamatna yakat utuhwang.