Éxodo 9 - Papang Yulni

Wah sihna tinglau balna yamahnina

¹ Kaput dawak Dawan yaklauwi Moses yakat kalyulna: —Fero yakat yawa tala kalyultah: ‘Dawan yaklau aput yulwi, hibru balna Papangnina kidika: Yang tawanki kidika datang kiwi ayangki nuhni yamwang.

² Datang uiwas karang kat, baisa laihwatta duma kat,

³ Dawan parasni kidika man tumaruh balna minitna yakat sihna karang, bahang kidika laih yamahni dutni laihna karang. Aras balna kidika dadauwarang, biriku, balna kiamil balna, turuh yayal dawa sīp balna bik.

⁴ Kaunah Dawan yaklauwi Israel balna tingninalau dawak Egipto muihni balna tingninalau kidika karak satuk kulna karang, kaput laih, Israel balna tingninalau kidika as bik dauwas atnin.’

⁵ Baisa minit yakat, Dawan yaklauwi mani as āna dai dawak yulna: —Yang yamna awaki yahan mani.

⁶ Payahwakat, Dawan yaklauwi yamna dai, witing yulna kaput. Egipto muihni balna tingninalau bitik laih dadauna dai, kaunah Israel balna tingninalau laih as bik dauwas dai.

⁷ Fero yaklauwi muih sihwak tatalna dai Israel balna tingninalau yakat, bahang tinglau as bik dauwas kat tatalna. Kaput kaunah kulnin dutni yamwi dawak aiwas dai Israel balna.

Wah sihwak, muihnina karatna

⁸ Kaput dawak Dawan yaklauwi Moses dawak Aarón yakat diyulna: —Plawar bubuswa pāni kaupak wan tingkurus bung dutanauh, dawak Moses yaklauwi wanan balna kidika mayakat ruhmwang, fero muhni tani yakat.

⁹ Wan kidika sau yahamni kalna karang dawak Egipto sauni bitik minit yakat kiuna karang, dawak muih balna minitna yakat, kaput bik tinglau balna minitna yakat bik kiuna karang muihnina kidika karatna karang.

¹⁰ Moses dawak Aarón witingna plawar bubuswa pāni kaupak wan buas duwi dawi fero yakat uina. Kidika yakat Moses yaklauwi wan dai kidika mayakat ruhmna, dawak muih balna kapat dawak tinglau balna kapat bitik kidika muihnina bitik kidika karatna dai.

¹¹ Sukyah balna kidika Moses niningyakat sip yaklauwas dadana, kat witingna bik muihnina kidika karatna dai bahang, muih ūk balna kapat.

¹² Kaunah Dawan yaklauwi yamwak fero kidika tunan dutni kalna, kaput bahang Moses dawak Aarón yuyulwa kidika dakawas dana, Dawan yaklauwi Moses yakat kalyulna dai kaput.

Wah sihna, ma yakaupak di minik kapat uhna

¹³ Kaput dawak Dawan yaklauwi Moses yakat kalyulna: —Yahan mani mapiris palni lawa yawa fero yakat kalyultah: ‘Dawan aput yulna, hibru balna Papangnina: Yang tawanki kidika datang kiwi ayangki nuhni yamwang;

¹⁴ waradika laih wah balna kidika bitik sihkiki man namang yakat, tāmatuna balna nining yakat dawak wanaihma balna niningna yakat bik, kaput laih man amanglana atnam, sau bitik yakat yang apat ūk diski.

¹⁵ Sipyang dai paraski kidika namangkatik wah bik manik man yakat, tawanma yakat, dawak kaput laih sau kaupak disna awama;

¹⁶ kaunah yang madanayang sangka atnam, kaput laih yang paraski talnam, dawak bik sau bitik yakat dating talna atnin kidika.

¹⁷ Kaput kaunah, yang tawanki niningkauh man, datang kalahwi kiwas ki.

¹⁸ ¡Yamni ki! Yahan mani adika awarni kat di minik dating uhna karang parasni palni, Egipto yulni bayakna balna yakat ūk diski, kapat.

¹⁹ Kaput bahang tingmalau balna kidika panina yamni datah, dawak ahni kau di dutaman balna kidika bitik, kat di minik kapat uhwarang kidika laih muih balna dawak tinglau balna bitik īna karang ki ūnina kau kakawas karang kat.’

²⁰ Fero, witing tunan nunuhni balna duwa balna buas laih yamaduduna Dawan yaklauwi yulwa kidika, bahang witingna dinina yamyang balna dawak tingninalau balna bitik ūni dinit yakat ahana dai;

²¹ kaunah buas laih rahm kukulwas dai, bahang ahni yakat dadana dai.

²² Kaput laih Dawan yaklauwi Moses yakat kalyulna: —Man tingma dulautah makau kisang yakat, kaput laih Egipto sauni bitik yakat di minik kapat kidika uhna muih balna minitna yakat dawak tinglau balna minitna yakat bik, dawak kaput bik pan balna minitna yakat bik uhna atnin, Egipto sauni minit yakat.

²³ Moses tingni dulauna makau kisang yakat, dawak Dawan yaklauwi kalawak alwana yulna, lapna dawak di minik kapat kidika sau minit yakat uhna. Kalwak dini kidika Egipto sauni bitik yakat uhna,

²⁴ di minit uhwa kidika dawak alwana lapwa kidika laih watwas dai. Egipto yulni uman bayakna bitik yakat di minik kapat parasni uhna kidika kalahwas dai.

²⁵ Di minik kapat uhna kidika di balna bitik laih dakwi disyamna dai, Egipto sauni bitik yakat, muih, dawak tinglau balna, pan balna bitik daukalmukna dai, pan nunuhni balna tingnina kidika bitik laih bahwi bubukna dai.

²⁶ Kaput kaunah, Gosén sauni kau, Israel balna bangdai kidika yakat laih was dadasni as bik uhwasdai.

²⁷ Kaput dawak fero yaklauwi yulwak uina Moses dawi Aarón dawak diyulna: —Yang amanglatayang dutni yamnayang. Adika pātni laih yang, dawak yang tawanki bik pātni ki, Dawan laih pātni-awas ki.

²⁸ Alwana dawak di minik kapat uhwa kidika uba minit bayak dunamayang, kaput bahang yang baisa laihwattas awaki. Yangna yulkina Dawan kau yultanauh, dawak yang dating uiwarang.

²⁹ Dawak Moses yaklauwi nangnitlana: —Adika tawanni nuhni akaupak alahwik minit yakat, yang tingki dulautik mikit yulki Dawan yakat. Kaput laih di minik kapat uhwa balna kidika laih watwarang, dawak alwana kidika bik, kaput laih man amanglama sau adika laih Dawan dini.

³⁰ Kaunah yang, yamni amanglatayang, man dawak yaihmat kau tunan nunuhni balna dutaman balna kidika bik Dawan yakat yamaniduduwas ki.

³¹ Lino dahna balna kidika dawak cebada balna dai kidika bitik laih daukakalna dai, kat cebada balna kidika laih uman minik laihna dai bahang, dawak lino kidika bik uman puluna dai bahang.

³² Kaunah plawar kidika dawak centeno kidika laih witni kau kalahwa bahang di as bik daukalwas dai.

³³ Moses kidika tawan nuhni kaupak kalahwi kiuna. fero karak yulbabauna usnit kat, dawak witing Dawan yakat tingni dulauwi minit yulna. Kidika minitni yakat di minit uhwa kidika laihwatna dai dawak waslauwa dai kidika, dawak alwana yulwa kidika bik laihwatna dai.

³⁴ Kaunah fero witing talwak waslauwas, di minik uhwa kidika laihwatna, dawak alwana bik yulwa kidika dana dai, dawak fero watwi dutni yamna dai. Witing manah kulnin dadasni yamwas dai, kaunah tunan muihni nunuhni balna bitik laih kaput kalna dai.

³⁵ Fero kulnin dadasni yamwi Israel balna kidika didawak uiwas dai, Dawan yaklauwi Moses yakat pakwak yulna dai kaput.