Éxodo 8 - Papang Yulni

¹ Dawan yaklauwi Moses yakat kalyulna: —Fero yakat yawa tala kalyultah: ‘Dawan aput yulwi: Yang tawanki adika datang kiwi ayangki nuhni yakwang.

² Man datang kiwas karang kat, man sauma bitik akat pikpik karak wah maki ki.

³ Was murwa kidika pikpik manah bung karang, bahang kidika kalahwi ūma yakat kakana karang, payahtaman pāni yakat bik, pama yakat bik, man tunan muihni nunuhni balna dawak wanaihma balna bitik ūnina yakat bik pikpik manah karang, dawak plawar bubuswa pāni yakat bik, dawak plawar lakwi titikwa pāni yakat bik.

⁴ Pikpik balna kidika man mamat yakat kikilna karang, man tāmatuna nunuhni balna dawak wanaihma balna minitna yakat bik.’

⁵ Dawan yaklauwi Moses yakat kalyulna: —Aarón yakat kalyultang tulninah kidika was murwa balna minitna yakat, wastuna balna yakat, dawak was dakni balna minit yakat bik yuwang, dawak kidika kaupak pikpik balna kalahwi Egipto sauni kidika bitik bangwang.

⁶ Aarón witing tulninah kidika was balna minit yakat dulauna dai, dawak Egipto sauni kidika bitik laih bahngna dai pikpik manah, was yakaupak kilwi.

⁷ Kaput kaunah, sukyah balna bik sihm yayamna dai, Egipto sauni kaupak pikpik yayakna dai.

⁸ Kaput dawak fero yaklauwi Moses dawak Aarón yakat yulwak uina dai dawak diyulna: —Dawan yakat kalyultanang kat pikpik balna kidika yang mikit yakat dawak wanaihki balna minitna kaupak bik yakwang, dawak kaput laih man muihma balna kidika dating uiwi Dawan yakat sakripais yayamwarang.

⁹ Moses yaklauwi fero yakat nangnitlana: —Yayultah, mampat mani yang lawik man, dima yamyang muihni balna nunuhni dawak muih balna dutaman kidika yulnina yulnik dukih mawih, man dawak ūma kaupak bik pikpik balna kidika kalahwi naikau uiwi waspa yakat witingna manah watna atninna.

¹⁰ Fero yaklauwi kalyulna: —Yahan mani. Dawak Moses yaklauwi kalyulna: —Kaput yamna karang, bahang man amanglana atnam muih as bik Dawan maPapangki kapat dis kidika.

¹¹ Pikpik balna kidika ūma kaupak kalahwi waspa yakat manah uina karang. Watwi mauhuswas karang man yakat, tama tuna nunuhni balna yakat, dawak wanaihma balna yakat bik.

¹² Moses dawak Aarón karak king ūni kaupak kalahwi uina. Usnitkat Moses yaklauwi Dawan yakat kalyulna, pikpik balna kidika fero kaupak yakna atnin.

¹³ Dawan yamna dai, Moses yulna kidika, bahang pikpik balna ū yakat bangdai kidika bitik dadauna dai, watak yakat, dawak asangpas kau dai kidika balna bik.

¹⁴ Muih balna yaklauwi pikpik dadauna kidika anawi ududuhna, pa bitik yakat wayāni manah dai.

¹⁵ Kaput kaunah, fero laih kidika dutni kaupak yamni kalahna dai, kaput kaunah kulnin dutni yamwi Moses dawak Aarón yulni dakawas dana dai, Dawan yulna dai kaput.

Wah sihna, sasah

¹⁶ Dawan yaklauwi Moses yakat kalyulna: —Aarón yakat kalyultang kat tulninah kidika dulauwi sau yahamni yakat wiswang, kaput laih Egipto sauni bitik kidika sasah manah kalahna karang.

¹⁷ Kaput yayamna. Aarón witing tulninah dulauwi sau yahamni yakat wisna, dawak Egipto sauni yahamni bitik kidika sasah kakalna dai, dawak muih balna dawak tinglau balna kakasna dai.

¹⁸ Sukyah balna bik witingna kaput yamnin kukulna parasnina kau, kaunah sip-awas kakalna dai. Bahang sasah balna kidika muih dawak tinglau balna yakat bik kakasna.

¹⁹ Kaput dawak sukyah balna yaklauwi fero yakat kalyuyulna: —¡Kidika laih Dawan yaklauwi yamna! Kaunah fero kulnin dutni yamna, yulnina dakawas dana, Dawan yulna dai kaput.

Wah sihna kakating

²⁰ Dawan yaklauwi Moses yakat kalyulna: —Yahan mani mapiris palni fero witing was yakat yaklakkiwarang ki, kaput bahang pukta kau lawa yawa kalyultah: ‘Dawan aput yulna: Tawanki kidika datang kiwang, yang akat ayangki nuhni yamna atnin.

²¹ Man datang kiwas karang kat, man mamat yakat kakating dating kiwarang, man tunan nunuhni dutaman minitna yakat dawak wanaihma balna minitna yakat bik, dawak ūma minit yakat bik. Egipto muihni balna ūnina kidika bitik laih kakating manah bahngna karang, dawak sau kidika bitik.

²² Adika dini kalahwarang kat, di as yamna awaki, kidika laih Gosén pāni yakat laih kalahwas karang kakating, yang tawanki minit yakat. Kidika yakat laih kakating as bik diskarang. Kaput laih amanglama, yang Dawan, adika sauni akat sakyang adika.

²³ Satuk yamna awaki yang tawanki dawi man tawanma karak. Bahang adika laih yahan mani yamna awaki.’

²⁴ Dawan yaklauwi kaput yamna, kakating kidika mukus kapat aiwi king uni yakat kakana, witing tunan muihni balna duwa ūnina yakat bik kakana, kaput bik Egipto sauni bitik yakat kaput kalahna dai. Kakating yaklauwi Egipto sauni kidika daukalpapamna dai bitik palni.

²⁵ Kaput dawak fero yaklauwi Moses dawak Aarón balna yakat yulwak uina, dawak diyulna: —Yawa Papangmana yakat sakripais yamtanauh, kaunah adika sauni paskaupak laih kalahnin-awas ki.

²⁶ Dawak Moses yaklauwi nangnitlana: —Kaput yamnin laih yamni-awas karang, kat Dawan yangna Papangkina yakat sakripais yamtayangna balna tingnilau kidika laih maisihni diski Egipto muihni balna niningna yakat. Egipto muihni balna tinglau balna kau minitna yuyulwa dini balna kidika sakripais bustining kat tatalwarang yanaihiwarang kipala kau yanababahrwi.

²⁷ Kauhmak wanilang yakat yawinikna ki, ma bas lapaknin praisni kat, kidika yakat Dawan Papangkina yakat sakripais yamnikna yulni, witing yaklauwi amput yapakwarang kidika kaput.

²⁸ Kaput laih fero yaklauwi kalyulna: —Manadating kauhmak wanilang yakat yawa Dawan Papangmana yakat sakripais yamna atnamna yulni, kaunah manna naikau laih kiunin-awas ki. Dawak yang yulki bik kalyultanauh.

²⁹ Dawak Moses yaklauwi nangnitlana: —Yang akaupak alahwaki yakat, yang Dawan kau kalyulting man dima yamyang balna nunuhni kidika dawak tawanma minit kaupak kakating balna kidika naikau uina karang, man Israel balna yakat alas diyulta laihwattas awama kat witingna Dawan yakat uiwi sakripais yamnin kidika.

³⁰ Moses witing king uni kaupak kalahwi kiuna kidika yakat, Dawan kau minit yulna,

³¹ dawak Dawan yaklauwi yamna dai Moses yulna kidika kaput: kakating balna kidika fero kaupak kalahwi uina dai, dawak tanituna nunuhni balna duwa kidika kaupak bik dawak witing wanaihni balna kaupak bik.

³² Kaunah fero kidika watwi kulnin dutni yamna dai, dawak Israel balna kidika dawak kalahwi uiwas dai.