Éxodo 39 - Papang Yulni

Sumalyang balna praknina yayamna kidika

¹ Wahmak buhrwi asna yamna kidika holi pāni yakat kawi wark yamna atnin, kidika laih asna paisa sa, paisa dawak pauni kau yamna. Aarón prakni kidika kidika bik sihm kaput yamna dai, Dawan yaklau Moses yakat yamnin kalyulna dai kaput.

² Prak tingni kakahlni minittang kau kawa kidika yamnin kat gol, asna paisa sa, asna paisa, asna pauni dawak linin asnina wirna kidika kau bik duwi yayamna dai.

³ Gol pis buas amar kau tiswi labanwi uhulna, kidika balna laih bikikisni dadakna dai pasyakat banawi bina atnin, sihm karna kapat atnin, asna paisa sa, asna paisa, asna pauni dawak linin asnina yakat bik.

⁴ Prakni tingni kakahlni minitkau kawa dini kidika sutni balna bu yakat wahni libitni bu ana dai.

⁵ Prakni tingni kakahlni minitkau kawa dini kidika minitkau banimak sitnin wahni duwadai kidika, sihm kaput yamna dai; gol kau, asna paisa sa, asna paisa, asna pauni dawak linin asnina wirna kau bik, Dawan yaklau Moses yakat amput yamnin kalyulna dai kat kaput.

⁶ Kipala pauni sa balna kidika laih ilnin dini gol kau yamna kidika minityakat ihilna dai, Israel walanibis balna ayangnina karak, kidika balna minitna yakat sihm tamp kau taihna kapat.

⁷ Usnit kat Bezaleel yaklau prak tingni kakahlni minitkau kawa dini kidika minitkau wahni bu dulkidika minityakat ilna dai, Israel walanibis balna yakat isningnakatna atnin yulni, Dawan yaklau Moses yakat amput yamnin kalyulna dai kidika kaput.

⁸ Pasni awa dini kidika bik bikisni karna dai sihm prak tingni kakahlni minitkau kawa dini kidika karak kapat: gol kau, asna paisa sa, asna paisa, asna pauni dawak linin asnina wirna kau bik.

⁹ Kidika laih bu dai dawak bik rabutni dai, dawak sutni balna arungka kidika centímetro 22 duduwadai.

¹⁰ Kipala minit nunuhni yayamni balna kidika kau lain arungka nandakna dai: lain tatuna kidika laih kipala pauni as, lalahni sang kapat as dawak sangni dibasta kapat as;

¹¹ lain bu kidika laih, kipala pauni sa as, sangni minit nuhni as dawak sangni dibasta kapat parah as;

¹² lain bas kidika laih, kipala pauni sa as, bulni yaringni as dawak paisa as;

¹³ dawak lain arungka kidika laih, kipala lalahni as, paisa sa as dawak kipala dadasni pukni as. Kipala balna kidika laih gol minityakat ilna bangdai, dawak

¹⁴ kidika balna laih 12 dai, Israel walanibis balna 12 kidika ayangnina; kidika balna laih sihm tamp kau taihna kapat duduwadai witingna sulanina balna kat kat ayangnina kidika.

¹⁵ Pasni -awa dini kidika minityakat gol witing manah kau sin buas yayamna dai, sihm wahni balna wirna kapat.

¹⁶ Ilnin dini balna dawak tuyuyulni balna bu gol kau yayamna dai; gol kau tuyuyulni bu yayamna kidika laih pasni ānin dini sutni balna makau bu yakat ahana dai,

¹⁷ dawak sin balna kidika laih tuyuyulni balna kidika minityakat lalakna dai.

¹⁸ Sin balna sutnina kidika laih ilnin dini gol kau yamna kidika minityakat ihilna dai dawak prak tingni kakahlni minitkau kawa dini muhnitkau wahni balna kidika minityakat dadanadai.

¹⁹ Gol kau tuyuyulni bu yamwi pasni kau āwa dini sutni saukauh balna yakat ahana dai, kung pastawa niningkauh prak tingni kakahlni minitkau kawa dini karak aslah libitni kidika yakat.

²⁰ Baisa gol kau tuyuyulni bu yamwi prak tingni kakahlni minitkau kawa dini muhnitkau wahni balna dulyakat ahana dai, kaunah sauyakat laih, prak tingni kakahlni minitkau kawa dini bina balna kungyakat ahana dai.

²¹ Usnitkat pasni āwa dini tuyuyulni balna kidika dawak prak tingni kakahlni minitkau kawa dini tuyuyulni balna karak libibitna dai wahni paisa sa as karak, pasni kidika prak tingni kakahlni minitkau kawa dini kidika banimak kaupak minityakat watna atnin yulni dawak kidika kaupak dakwi kalahwas atnin, Dawan yaklau Moses yakat amput yamnin kalyulna dai kat kaput.

²² Prakni nuhni tingni kakahlni minitkau kalmukwa kidika laih wahmak buhrwi asna paisa sa kau yamna dai.

²³ Ahlna kung papuskau kidika laih pakat'āna dai, biswas atnin yulni.

²⁴ Muklakwa asnina kung balna kidika laih granadas wayani yamwi awaih dana dai asna paisa sa, asna paisa, asna pauni dawak linin asnina wirna kau bik.

²⁵ Gol witing manah kau bil binina yamwi wirih dadana dai granadas wayani balna karak, kidika balna pasyakat kung balna kidika bitik ahana dai

²⁶ Kalmuknin dini kidika yamni talna atnin yulni: bil bin as dawak granada wayani as, bil bin ūk dawak granada wayani ūk, Dawan yaklau Moses yakat yamnin kalyulna dai kaput.

²⁷ Linin prakni nanaini Aarón dawi walanibis balna karak dinina dai kidika laih wahmak buhrwi asna yamyang muihni as yaklau yamna dai,

²⁸ tunan balakwa asnina, tunan paknin dini balna dawak linin asnina wirna kau ip yamna balna;

²⁹ linin asnina wirna kau banimak sitnin dini yamna balna, asna paisa sa, asna paisa, asna pauni kau karwi yayamna dai, Dawan yaklau Moses yakat amput yamnin kalyulna dai kat kaput.

³⁰ Gol pis witing manah amar kau tiswi labanna kidika bik yayamna dai, kidika laih sumalyang yaklau Papang dini yakwadai, dawak kidika yakat sihm tamp kau kapat tataihna dai, “Dawan dini yakna.”

³¹ Usnitkat wahni paisa sa as sisitnadai, gol pis amar kau tiswi labanna kidika, tunan balakwa asnina makau yakat ilna atnin, Dawan yaklau Moses yakat yamnin kalyulna dai kidika kaput.

Holi pāni yamwi yayakna kidika

³² Holi pāni yamnin kidika dawak Papang karak kalpaknin -uni labanni yamnin kidika laih witni kat kiwi watnadai. Israel muihni balna laih Dawan yaklau Moses yakat amput yamnin kalyulna dai kidika kaput yayamna dai,

³³ dawak Moses tingni yakat ahana dai holi pāni kidika, kalpaknin -uni labanni kidika dawak dunin dini balna kidika bitik: panan rahni balna, tat, pan kuswi karauna, ū rahni dawak uknin panan balna kauna,

³⁴ sīp ahalmuk uninatak nandaknin dini pauni yamna kidika, di unitak nandaknin dini tanit yayamni kidika, la baksni muknin asnina,

³⁵ pramis lani baksni dawak panan kararauni kusna balna, putnin,

³⁶ tibil dawak dunin dini balna kauna, plawar busna Papang dini yakwa kidika,

³⁷ gol witing manah kau awas ilnin pāni dawak awasni balna yamna kidika kauna, yuldarangkat awas balna ihilna bang-atnin dai kidika, dawak dunin dini balna kauna; awas dahlnin wasni kidika,

³⁸ sakripais busnin pāni gol kau yamna kidika, Papang dini yakwi tunan yakat dia utuhnin wasni kidika, busnin dini walapni kidika, kalpaknin -uni labanni kiwikawa rinin asnina kidika,

³⁹ sakripais busnin pāni bras kau yamna kidika dawak bras panani lakwi parwi birna kidika, panani balna kuswi karauna kidika dawak dunin dini balna kidika bitik, ting suhnin dawak uknin panani kauna,

⁴⁰ watak rinin asnina balna, ūni rahni dawak uknin panani balna kauna, watak kiwikawa kau rinin asnina, watak yakat sitnin wahni dawak uknin panani subangni balna, holi pāni yakat wark yamwi dunin dini balna bitik kau, kalpaknin ūni labanni,

⁴¹ wahmak buhrwi asna yamwi holi pāni yakat yusyamwa kidika, Aarón kanin prakni kidika dawak sumalyang balna praknina walanibis ahal balna dinina kidika kauna.

⁴² Israel muihni balna laih Dawan yaklau Moses yakat amput yamnin kalyulna dai kidika kaput yayamna dai,

⁴³ dawak Moses talwak witingna laih kidika dini kaput yayamwakat, blis diyamna dai.