Éxodo 37 - Papang Yulni

Pramis lani baksni yayamna kidika

¹ Bezaleel laih acacia panani kau la baksni kidika yamna dai, naini niningkauh laih metro as minitkau centímetro salap duwadai, pirihta niningkauh laih centímetro 65 duwadai dawak maluihni niningkauh laih centímetro 65 duwadai.

² Paskau kidika gol witing manah kahwi lana dawak ahni niningkauh kidika bik sihm kaput, dawak yaihnit yakat lain as gol kau -awi lanadai.

³ Gol kau tuyulna kidika arungka yamna dai kalni balna arungka kidika dini, bu kidika nakas dini dawak bu kidika laih nakas ūk kidika dini.

⁴ Acacia panani kuswi karauna balna bik yamna, kidika balna laih minityakat gol kau kahwi lanadai,

⁵ dawak usnit kat gol tuyulna la baksni pirini kau bangdai kidika munah uhrlana dai, kaput duwi kiuna atnin yulni.

⁶ Gol witing manah kau putnin as yamna dai, naini niningkauh laih metro as minitkau centímetro salap duwadai dawak pirihta niningkauh laih centímetro 65 duwadai,

⁷ kidika putnin sutni balna yakat gol amar kau tiswi labanwi di lawani bu yayamna dai.

⁸ Putnin kidika dawak di lawani wayani balna kidika laih libitni aslah dai: witingna kaupak as kidika putnin sutni nakas kaupak kalahwadai dawak ūk kidika laih sutni ūk kaupak kalahwadai,

⁹ kaput bahang biri biri muhnitna kat kat wawatwa dai, kaunah muhnina kidika laih putnin kidika niningyakat dai dawak lawanina balna kidika laih putnin kidika minityakat dulauwi duduwadai.

Tibil kidika yamwi plawar busna ilna atnin

¹⁰ Bezaleel bik acacia panani kau tibil as yamna dai, naini niningkauh centímetro 90 duwadai, dawak pirihta niningkauh laih centímetro 45 duwadai dawak maluihni niningkauh laih centímetro 65 duwadai.

¹¹ Minityakat gol witing manah kau kahna dai dawak yaihnit yakat bik lain as gol -awi lanadai;

¹² rahni balna walsah pirihta niningkauh kidika laih centímetro tiaskaubu yamna dai, dawak rahni balna walsah yakat lain as kidika gol kau -awi lanadai.

¹³ Gol kau tuyuyulni arungka bik yamna, dawak kalni balna kau sipintang balna arungka yakat ana dai,

¹⁴ rahni balna walsah yakat libitni watna atnin, pan kuswi karauna balna kidika, kidika munah bayakna atnin dawak kaput karak tibil kidika pa ūk kau duwi kiuna atnin.

¹⁵ Tibil pa ūk kau duwi kiuna atnin yulni pan kuswi karauna balna kidika laih acacia panani dai, dawak usnitkat minityakat gol kau kahna dai.

¹⁶ Tibil yakat dunin dini balna bang-atnin dai kidika bik gol witing manah kau yamna dai, yuldarangkat, plit, ispun nunuhni, sau sunitak dawak minitdis kalanin dini was utuhnin sunitak balna kauna.

Awas ilnin pāni gol kau yamna kidika

¹⁷ Bezaleel bik awas ilnin pāni kidika gol witing manah amar kau tiswi labanwi yamna dai. Rahni, panani, sutak balna, dipulu kalni dawak dipulu kapat kalni kidika aslah libitni dai;

¹⁸ pirini balna kaupak tingni balna tiaskauas kalalahwa dai, nakas as kaupak bas dawak nakas ūk kaupak bas.

¹⁹ Panani kaupak tingni balna tiaskauas kalalahwa kidika kaupak as kidika, sunitak bas duwadai sihm almendro puluni kapat, dipulu kalni as dawak dipulu balna kapat bik,

²⁰ dawak panani kidika bik sunitak balna arungka duwadai, kidika bik sihm almendro puluni kapat, dipulu kalni dawak dipulu balna kapapat bik.

²¹ Awas ilnin pāni kaupak tingni balna tiaskauas kalalahwa dai kidika, tingni balna sau kauh kidika yakat dinipulu kalni as as duduwadai.

²² Dinipulu kalni balna dawak tingni balna kidika karak aslah libitni dai awas ilnin pāni kidika karak, kidika laih gol witing manah amar kau tiswi labanwi yamna dai.

²³ Awasni balna tiaskaubu kidika, sunitak balna dawak wisnin plitni balna kidika, gol witing manah kau duwi yamna dai.

²⁴ Awas ilnin pāni dawak dunin dini balna kidika kauna yayamna kat, gol witing manah paun 96 karak duwi yayamna dai.

Sakripais walapni busnin pāni yayamna kidika

²⁵ Bezaleel laih sakripais walapni busnin pāni kidika acacia panani kau duwi yamna dai. Kidika laih rabutni dai, naini niningkauh kidika centímetro 45 duwadai dawak pirihta niningkauh kidika laih centímetro 45 duwadai, dawak naini niningkauh laih centímetro 90 duwadai. Sakripais busnin pāni tamni balna kidika laih sihm sakripais busnin pāni kidika karak aslah dai

²⁶ Usnit kat makau kidika, pirini arungkapak dawak tamni balna kidika gol witing manah kau kahna dai, dawak yaihnit kidika lain as gol kau -awi lanadai.

²⁷ Gol tuyulna bik buas ana dai lain as gol kau -awi lana kidika dinityakat, bu kidika laih sipintang nakas yakat dawak ūk balna bu kidika laih sipintang nakas ūk kidika yakat, kidika munah pan kuswi karauna balna kidika uhrlawi sakripais busnin pāni kidika pa ūk kau duwi kiuna atnin.

²⁸ Pan kusna karauni balna kidika laih acacia panani kau yamna dai, dawak usnitkat minit kidika gol kau kahna dai.

Papang dini yakwi tunan yakat utuhwa diani wasni dawak busnin walapni ridi yayamna kidika

²⁹ Bezaleel witing Papang dini yakwi tunan yakat utuhwa diani wasni holi kidika dawak kahnin dini walapni kau busnin walapni kidika bik yamna dai, sihm di walapni duyang balna yayamwa kapat.