Éxodo 33 - Papang Yulni

Dawan yaklauwi dipakna tanitna yakat uina atnin

¹ Dawan yaklauwi Moses yakat kalyulna: —Yawah, Egipto kaupak tawan as yaknaman kidika karak. Yawah, Abraham, Isaac dawak Jacob sulanina balna yakat sau dianik yulnayang sauni yakat.

² Yang inkisal kidika sihtingkat tāmatuna kawi madukiwarang, kaput laih cananeo muihni, amorreo muihni, hitita, ferezeo, heveo dawak jebuseo kidika balna bitik, kidika sauni kaupak yakmukwarang.

³ Yawanauh, amak dawak tāwas kidika was kapat kira sauni yakat. Kaunah yang laih manna pasmangna yakat yawas awaki, tapas yakat manainik awas yulni, kat manna laih muih dudutni mana bahang.

⁴ Adika yulni dadasni adika tawan dakawi kulnin bukna, dawak muih as bik gol dini duduwadai kidika ahawas dai,

⁵ kat Dawan yaklauwi Moses yakat kalyulna dai bahang: —Israel balna yakat diyultah: ‘Manna laih muih dudutni mana bahang. ¡Yang manna pasmangna yakat minit as bik awaki kat, manadismukki bahang! Warminitni gol dini dutamana kidika yaktanauh, ahawinih, kaput laih yang talki manna yakat ais manayamnik kidika.’

⁶ Dawak kaput laih, Horeb asangni kaupak kalahwi uina kidika, Israel balna witingna gol dini duduwadai kidika alalahwas dadana.

Papang karak kalpaknin ūni labanni

⁷ Moses yaklauwi ū labanni kidika dulauwi nailuih kau duwi kiuna, muih balna bangkidika kaupak, dawak ayangni pakna, Papang karak kalpaknin ūni labanni. Muih as kat Dawan yakat di kalyulwi dakanin duwa kat kidika ūni labanni yakat kiwadai, kidika laih muih bangkidika kaupak apis naikau dai.

⁸ Dawak Moses witing ū labanni yakat kiwarang, muih balna kidika bitik laih dūrnina yakat yaklalauwadai, dawak miniknapa kau tatalwadai kalpaknin ūni labanni yakat kiwi kawakat.

⁹ Moses witing kidika ūni labanni yakat kiwi kawakat, mukus kidika kiwi yaklakwi watwadai ū labanni kiwi kawa yakat, Dawan kidika Moses yakat yulkalbauwakat.

¹⁰ Muih balna kidika tatalwak mukus kidika ū labanni kau kiwi kawa yakat watwak, muih balna kidika dūrnina yakat limbabahwadai, nuhni kalkukulwa yulni.

¹¹ Papang kidika Moses karak biri biri muhnina kaltalwinah yulbabauwadai, muih as kaltalyang yamni kat yulbabauwa kapat, dawak kidika usnitkat Moses nawatwi kaiwadai ū lababanni balna bangkidika pasyakat. Kaunah witing tingnisut laihwa wahnima Josué, Nun walanibis laih, kidika ūni labanni paskaupak kalahwasdai.

Dawan, witing alasnina yaksihn kidika Moses yakat niningkawi

¹² Moses yaklauwi Dawan yakat kalyulna: —Talah, man yayultaman adika tawanni balna taninatuna āwinik, kaunah yultasman wais karak yasihnam kidika. Dawak bik yultaman kulnam kidika yang akat āta dutaman, kaput laih man yamni talaman kidika yang dunayang.

¹³ Bahang adika dini laih rahm kat, man warkma yamnam balna kidika nikingkatah, dawak kaput laih yang man yakat kulnik atik dunik, dawak man ilpma balna kidika bik yang talna awaki. Man amanglatah, adika tawanni laih man tawanma.

¹⁴ Dawan yaklauwi kalyulna: —Yang man karak yawaki dawak mating wingmata puhma.

¹⁵ Kaunah Moses yaklauwi nangnitlana: —Man yangna karak yawasman kat, yanayamtang kat akaupak alahwinikna awaski.

¹⁶ Kat man yangna karak yawasman kat, ¿ais amput yang dawak tawanma kidika bik amanglatanakiyah, man yangna ilpkina man kidika? Kaput manah laih yang dawak tawanma kidika bik sip amanglana karang tawan ūk balna karak satuk kidika sau akat.

¹⁷ —Man adika yulnaman kidika bik yamki, kat yang kulnik kidika man yakat kultayang bahang, dawak yang ilpki bik dunaman bahang —Dawan yaklauwi kaput kalyulna.

¹⁸ Moses yaklauwi kalni dinit yakat bukwi kalyulna: —¡Datangkat alasmana yaksihn kidika talkuh!

¹⁹ Kaunah Dawan yaklauwi nangnitlana: —Minikun talnin kulnik yakat dutayang kidika bitik tamat yakat kalating bayakwak talma, dawak man tamat yakat ayangki kidika yulnayang karang. Wais yakat dalani talkih yang kat talki ki, dawak wais yakat minikun talkih yang kat minikun talki.

²⁰ kaunah lāih mayultayang muhki laih talas awama, kat muih al as bik yatalwi sip sangka awaskarang.

²¹ Dawak adika bik Dawan yulna: —Talah, yang yaihkit akat pa as pakki. Kipala nuhni kidika minityakat lawah.

²² Yang alaskina yaksihn kidika bayakwarang kat, kipala sulihni yakat mahaki, dawak tingki kau mamukki angdika mani bayakyawaki kat.

²³ Kidika usnit kat tingki kidika dulauwi mamat kaupak, dawak sip awama dangkipas kidika talnam; kaunah yang muhki laih sip awaski talnam.