Éxodo 31 - Papang Yulni

Holi pāni kau tingkau diyamna balna kidika

¹ Dawan yaklauwi Moses yakat kiwi kalyulna:

² “Talah, Judá sulani kaupak walyaktik dunayang, kidika laih Bezaleel, Uri walanibis dawak Hur mani,

³ dawak witing kidika Papang spiritni manah kalbung danayang, dawak sinsni tuhni bik, di amanglanin, tanka balna dunin dawak di tanka balna walwi yaknin kidika sip atnin bik kalanayang,

⁴ dawak gol kau di satni balna yamnin kidika, lalah kau, dawak bras kau bik,

⁵ kipala minit nunuhni balna kidika pahrwi dawak pāni kat ilwi birnin, kaput bik laih pan kau wayani balna kidika pahrnin, dawak di ais ais balna yamnin kidika bik.

⁶ Dawak witing kidika laih Aholiab, Ahisamac walanibis kidika tingnisut laihnin kapat ānayang, witing kidika laih Dan sulani as ki. Sins nuhni duyang balna minitna yakat tanit kalanayang, kaput laih yamnin balna mapaknayang kidika bitik yamnin yulni:

⁷ kalpaknin ūni labanni, pramis baksni dawak putnin kidika bik, kaput bik laih kalpaknin ūni labanni paskau di dunin dini balna kidika bitik yamnin,

⁸ tibil dawak minitkau di yusyamwa dini balna kidika, awas ilnin pāni dawak dini yusyamwa balna kidika bitik, kaput bik laih walapni busnin pāni kidika bik,

⁹ sakripais karauni kauna busnin pāni dawak dini yusyamwarang balna kidika, dawak tingsuhnin dini kidika bik,

¹⁰ wahmak buhrna prakni, yuldarang kat, sumalyang Aarón prakni dawak walanibis balna praknina bik, witingna sumalyang kapat wark yayamwarangkat kakawarang kidika,

¹¹ Papang dini kalnin diani, holi pāni yakat busnin walapni kidika. Witingna kidika balna bitik yamnin karang amput yamnin mayulnayang kaput.”

Satadi

¹² Dawan yaklauwi Moses yakat aput kalyulna:

¹³ “Man Israel balna yakat aput diyultah: ‘Yang maki yakurupdinin mani balna kidika rispik yamnamna ki, kat kidika laih sain as karang, yang dawak manna karak, kidika laih kurih andat balna bayakwarang karangbik ban kaput karang, dawak kaput bik manna amanglatanama, yang Dawan yang kat, manna kidika manawaltik yaktik dunayang.

¹⁴ Yakurupdinin mani kidika laih manna namangna yakat yang diki yakna karang, bahang manna rispik kalatanama. Wais kat kidika mani rispik dis karang kat, daunin yakat wirlana karang. Baisa kidika minityakat, wais kat satadi mani wark kalahwarang kat, wanaihni balna paskaupak dispamna karang.

¹⁵ Wark alahwanama, ma tiaskauas pasyakat, kaunah ma tiaskaubu yakat laih yakurupdinin mani karang, Dawan dini yakna kidika. Wais kat yakurupdinin mani wark yamwarang kat, daunin yakat kalwirlana karang.’

¹⁶ Kaput bahang Israel balna laih yakurupdinin mani yakat rispik yamnin kidika lankalninna ki, kurih balna kaiwarang yakat pramis as ban kaput atnin.

¹⁷ Kidika laih sain as ban kaput karang, Israel balna dawak yang karak.” Kat Dawan yaklauwi sau dawak makau kisang kidika yamna, ma tiaskauas pasyakat, dawak ma tiaskaubu yakat laih witing wingnita puhna.

Turuh almuk bin wayani gol kau yamna kidika

¹⁸ Dawan kidika yulbauwi dana kat Moses karak Sinaí asangni yakat, Dawan yaklauwi kipala lababanni bu kalana dai, bahang kidika yakat lā balna kidika Dawan witing tingni palni ulna dai.