Éxodo 29 - Papang Yulni

Sumalyang balna Papang dini kalalahwa kidika

¹ “Yang sumalkiyang kapat kalahnin kat, aput diyamnam ki witingna yakat: turuh almuk bin as duma dawak sīp ahalmuk bu, kidika balna laih sakahwa atnin awaski;

² plawar tanit yamni kidika karak laihta busma dawak ulangta bik busma pupuhnin dini atas busma, kaunah disala kau laih āta laihma, dawak bik laihta baini data kisma dawak minit yakat disala kau rasma kaunah pupuhnin dini laih ānin awaski,

³ dawak di punin dini bin kau awi duwi kiunin karang holi pāni yakat, kidika laih turuh almuk bin dawak sīp ahalmuk bu kidika karak libit dawi duwi kiwarang.

⁴ Kidika usnit kat Aarón dawak walanibis balna kidika karak kalpaknin ūni labanni kiwi kāwa yakat duta yawama, dawak paktang was kakawarang;

⁵ kidika usnit kat sumalyang prakni kidika duta Aarón yakat āma, prakni nuhni naini kidika dawak prakni tingni kakahlni minitkau kāwa kidika bik, dawak bik sihm prakni tingni kakahlni dawak pasni kau alahwa dini kidika bik āma, dawak prakni tingni kakahlni kidika banimak kidika laihta amungni sitma;

⁶ dawak tunan sitnin kidika sitma, dawak tunan sitwa asnina kidika minit yakat gol kau labanni yamnam kidika bik āma, bahang kidika yaklauwi laih sumalyang kalyamwi yang diki.

⁷ Kaput laih disala kidika yaklauwi yang diki yakwa salani kidika, Aarón tunan yakat utuhta yang diki sumalyang yakma.

⁸ Kaput bik laih walanibis balna kidika bik yamtang kat yaihmat yakat uiwak, prakni nuhni barangni aslah kidika kau āma.

⁹ Aarón dawak as balna kidika bik witingna baninamak kidika yamni sitma, dawak tunanina asnina kidika bik yamni pakta diama. Kaput yamta witingna parasnina bitik kidika diama, dawak witingna sumalninayang lani kidika laih ban kaput karang lā as.

¹⁰ “Kidika usnit kat turuh almuk bin kidika kalpaknin ūni labanni kiwi kāwa yakat duyawah, kaput laih Aarón dawak walanibis balna bik witingna tingnina kidika tinglau tunani minit yakat yuyuwang,

¹¹ Dawan muhni tani kidika yakat, dawak kalpaknin ūni labanni kiwi kāwa yakat, turuh almuk bin kidika itah.

¹² Kaput laih tingma kau ā apis duta sakripais busnin pāni tamni balna yakat kahma, dawak ā baisa sutni watwa kidika laih sakripais busnin pāni kalni sar yakat bitik utuhma.

¹³ Bani bikis balna, isning dawak kihnimak balna kidika minit kau salani balna duwa kidika yaktah, dawak sakripais busnin pāni minit yakat ilta bustah;

¹⁴ kaunah muihni kidika, unitak, dawak turuh bani balna kidika, ū lababanni balna paskaupak naikau yakta bustah, kat kidika laih muih dutni yamna kidika yulni sakripais buswa bahang.

¹⁵ “Dawak sīp almuk balna kidika as dutah, Aarón dawak walanibis balna kidika bik witingna tingnina yuyuwang, tingnilau kidika tunani minit yakat.

¹⁶ Kidika usnit kat itah, dawak kidika āni kau sakripais busnin pāni yaihnit pirini balna yakat rastah;

¹⁷ usnit kat bikikisni binina daktah, bani bikisni balna, kalni balna kidika suhtah, dawak dakna bangkidika dawak tunan kidika karak libitta laktah.

¹⁸ Dawak sīp almuk kidika sakripais karauni kauna buswa kidika yamtah, Dawan risnipik kau, minitdis kalanin dini walapni yamni as.

¹⁹ “Dawak kaput bik laih sīp almuk as kidika dutah, dawak Aarón dawak walanibis balna bik tingnina yuyuwang tinglau kidika tunani minit yakat.

²⁰ Sīp almuk kidika itah, āni kidika apis duta Aarón yakat kahtah dawak walanibis balna yakat bik, tapanina sutni sau niningkauh yakat, tingninapal niningkauh kidika, tingnina bikisni nuhni, kaunah tingninapal niningkauh kidika yakat, kaput bik laih kalnina bikisni balna nuhni kidika, kaunah yakabik tingpal niningkauh kidika yakat bik kahma. Kidika usnit kat ā sutni bayakna kidika kau, sakripais busnin pāni pirini balna yakat rasma.

²¹ Dawak sakripais busnin pāni minitkau ā watna kidika, dawak Papang dini yaknin dini kidika bik apis duta Aarón prakni minit yakat rasma, dawak walanibis balna minitna yakat bik, kaput bik praknina minit yakat bik rasma. Kaput laih Aarón dawak walanibis balna bik yang diki kalalahna karang, dawak praknina balna bik.

²² “Usnit kat sīp almuk mamahni kau salani duwa kidika duma, bani bikisni minit kau salani balna kidika, isning, dawak bik kihnimak bu kidika bik duma salani balna kidika, barahnimak tingnipal niningkauh kidika bik, kat kidika laih sumalyang balna yang diki yaknin sīpni almuk bahang.

²³ Di punin dini paskau plawar pupuhnin dini dis āwi busna balna, Dawan muhni kau bangkidika kaupak, plawar busna tuyulni kat as duma, dawak plawar disala kau awi laihwi busna kidika, dawak plawar baini laihwi kiswi dawi minit yakat damni kahna kidika bik as duma;

²⁴ kidika dini balna bitik Aarón tingni yakat dawak walanibis balna tingnina yakat bik atah, dawak amput Dawan yakat duwi kiunin yamwa balna kidika yamna karang.

²⁵ Usnit kat, witing tingni kaupak yakta sakripais busnin pāni yakat ilta bustah, sakripais karauni kauna walapni buswa kidika Dawan yakat. Kidika laih minitdis kalanin dini as busna karang, Dawan risnipik kau.

²⁶ “Aarón kidika Papang dini yaknin kat, sīp almuk pasni kidika dutah, dawak Dawan kau amput dukiunin kidika yamtah. Bahang kidika yamnin balna kidika laih man yakat bukwarang.

²⁷ Pasni duyawanaman kidika laih silp yaktah, minitdis kalanin as tanit yamni yakna kidika, dawak barahnimak kidika bik yakwi kalawa kidika, bahang kidika pīsni balna kuduh yakwa kidika Aarón dawak walanibis balna karak dinina.

²⁸ Kidika laih Aarón dawak walanibis balna dinina. Kidika laih lā ban kaput karang Israel balna pasyakat: kidika dini laih Israel balna yaklauwi diayawarang Dawan karak watwi yamni kalahnin sakripaisni as.

²⁹ “Aarón prakni Papang dini yakna kidika laih sulani balna dinina karang, witingna kidika Papang dini kakalwarang mani kat, dawak bik parasni kidika bitik palni duduwarang kat sumalyang kapat.

³⁰ Dawak Aarón sulani balna kidika witing pāni sumalyang kakawarang kat, dawak kalpaknin ūni labanni yakat kawi holi pāni yakat wark yayamwarang kat, kidika prakni balna kidika kakana karang ma tiaskaubu.

³¹ “Kidika usnitkat sīp almuk kidika kau Papang dini yakwa kidika, muihni balna kidik pa as holi kat duyawa laktah.

³² Aarón dawak sulani balna kidika dinimuihni kidika kakaswarang, dawak di punin dini kau plawar busna puna bangkidika bik kakaswarang, kalpaknin ūni labanni kiwi kāwa kau yakat.

³³ Witingna kakaswarang, kat dutnina dawak disnin yulni duwi uina bahang, kidika uiwi kalalana kat, witingna laih bitik palni parasni kidika duduna dai sumalyang atnin. Kaunah muih pini as bik sip-awas karang kasna atnin, kat Papang dini yayakna bahang.

³⁴ Dawak, dimuihni, plawar busna balna kidika bik baisa watna dai kat, kidika balna busma, kat muih as bik kaswas karang, Papang dini yakna dai bahang.

³⁵ “Adika dini balna bitik Aarón dawak walanibis balna yakat bik diyamtah, amput yamnin yulna kaput. Ma tiaskaubu kat yamma parasni diama kidika,

³⁶ dawak ma balna kaiwa bitik yakat turuh almuk as kalama sakripais yamna atnin dutni dawak disnin yulni; sakripais busnin pāni kidika maisihni dis yamma, kidika minit yakat dutni dawak disnin sakripaisni as busma, dawak kidika minit yakat dia utuhma, Papang dini yaknin yulni.

³⁷ Ma tiaskaubu kidika pasyakat, ma payuh sakripais yamna karang dutni yamna kidika yulni, kaput laih Papang dini yakna karang, dawak sakripais busnin pāni kidika holi palni kalkulna karang: ais ais karang bik sakripais busnin pāni kidika yakat laihwarang kat Papang dini kalna karang.

Ma payuh minitdis dini kalanin kidika

³⁸ “Ma payuh sakripais buswa pāni yakat sīp kurih as duwa kidika ilwi sakripais yamna karang.

³⁹ As kidika mapiris yakat sakripais yamna karang, dawak ūk kidika laih ma ulahu yakat sakripais yamma.

⁴⁰ Sīp tatuna sakripais yamwarang kidika yakat plawar tanit yamni kidika kilo bu dukiwi kalawarang, bahang kidika laih olib salani karak banawi yamni laihna karang, dawak minitdis kalanin dini as wain litro as utuhma minityakat.

⁴¹ Ma ulahu yakat bik sihm kaput yamma sīp as kidika karak, minitdis kalanin dini plawar dawak wain karak, kidika laih minitdis kalnin dini busna walapni as karang Dawan yakat.

⁴² Adika minitdis kalanin dini buswa kidika yang riskipik kau, papangnina kaupak walaninabis kat bik ban yayamna karang yang muhkit yakat, kalpaknin ūni labanni kiwi kāwa yakat, kidika pāni yakat sak-awakiki man yakat yulmabaunik.

⁴³ Kidika yakat, Israel balna karak kalpakki, dawak kidika pāni laih yang diki kalahna karang yang sakyang bahang.

⁴⁴ Kalpaknin ūni labanni kidika dawak sakripais busnin pāni kidika laih yang diki kalna karang, dawak Aarón walanibis balna bik yang diki kakalna karang, sumalkiyang balna.

⁴⁵ Yang Israel balna pasyakat yalahki, dawak witingna Papangnina awaki.

⁴⁶ Kaput laih amanglalawarang yang adika witingna Daninawan, dawak Papangnina bik yang, Egipto kaupak diyaknayang kidika witingna pasningna yakat yalahnik yulni. Yang kuduh Dawan yang, witingna Papangnina.