Éxodo 26 - Papang Yulni

Holi pāni

¹ “Holi pāni kidika yakat rinin asnina kidika yamtah linin asnina wirna balna kidika kau, asna paisa sa, paisa dawak pauni kidika kau bik; dawak kidika yakat trit kau ultah di lawani duyang balna wayanina kidika bu.

² Dūrni rinin asnina balna kidika bitik kapapat atnin ki; naini kidika metro bu minitkau papusdak, dawak panuhni laih metro bu.

³ Dūr rinin asnina balna kidika singka laihta bitah, minit yakat tilata bima, dawak singka ūk balna kidika sihm kaput yamma,

⁴ dawak minikpa balna kidika yamma wahni uhrlanin tatuna uduhna as kidika yakat, dawak kaput bik uduhna ūk kidika kau dūr rinin witni kau yakat bik kaput yamma.

⁵ Dūr rinin uduhna tatuna dawak uduhna ūk kidika bik sihm kaput yamma, minikpa balna 50 yamma, kaput laih minikpa ahlna balna kidika kalmuhpuk karang.

⁶ kaput bik laih rahni balna kidika bik 50 yamtah gol kau manah, kidika laih dūr rinin balna kidika alahnin, kaput laih holi pāni kidika barangni aslah kalna karang.

⁷ “Kaput bik laih dūr rinin balna kidika yamtah kuts unitak kau, kidika laih ū labanni yamnin, holi pāni kidika muknin yulni

⁸ Dūrni rinin balna kidika laih sihm kapapat atnin ki: naini kidika laih metro 13 minitkau papusbah, dawak panuhni laih metro bu.

⁹ Dūr rinin balna kidika singka libitta bitah, dan ūk yakat laih tiaskauas libitta bitah, dawak dūr rinin tiaskauas kidika laih papusbah yakat lamtah ū labanni niningkauh yakat.

¹⁰ Kidika usnit kat minikpa 50 yamtah dūr rinin kungni balna, uduhna tatuna balna yakat, dawak kaput bik laih minikpa 50 ūk yamtah uduhna bu kidika balna kungni yakat.

¹¹ Kaput bik laih bras kau yamtah rahni balna kidika, dawak minikpa balna yakat alahtah, kaput laih ū labanni kidika barangni aslah karang.

¹² Dawak ū labanni dūrni rinin balna kidika laih nanaini bahang, sutni bayakwa balna kidika laih alahna dulkarang holi pāni dangnit yakat.

¹³ Kaput laih holi pāni kidika asnina rinin sutni bayakwa balna kidika kau mukna karang, kidika laih pirini nabupak mukna karang: pirini nakas kidika centímetro 45 duwarang, dawak pirini nakas ūk kidika bik sihm kaput karang.

¹⁴ “U labanni kidika dini yamtah, sīp ahalmuk unitak pauna kidika, dawak makau dini kidika laih di unitak tanit yayamni balna kidika.

¹⁵ Acacia panan kau tat yamtah, holi pāni kidika dini, dawak yamni papat laktah.

¹⁶ Tatni balna kidika naini atnin ki metro arungka minitkau papusbah, dawak panuhni laih centímetro 65 karang,

¹⁷ sutni balna kidika rahna karang kaput laih biri biri kawi kasnin yamni. Holi pāni tatni balna bitik kidika kaput yamma.

¹⁸ Man yamma kat, wadah niningkauh kidika dini balna tat 20 yamma,

¹⁹ dawak kidika balna dinit yakat rahni 40 āma. Tat as kidika rahni bu duwakarang dinit yakat, sutni rahna balna bu kidika dini.

²⁰ “Sihm kaput bik holi pāni pirini nakaskauh kidika bik, yuldarangkat, tingpal niningkauh kidika bik tat 20 yamma

²¹ rahni balna lalah kau yamna 40 kidika, tat as dinit yakat rahni bu duwarang kidika.

²² Holi pāni dangnitkauh kidika, yuldarangkat ma kāwa niningkauh kidik, tat tiaskauas yamma,

²³ dawak baisa minit yakat tat bu yamma dangnit niningkauh sipintang balna kidika dini.

²⁴ Adika tatni balna laih bu bu atnin karang, ma niningkauh kidika kiwi libitwarang tingni ānin tatuna kidika yakat. Kaput yamnin karang tat bu sipintang kau āwarang kidika.

²⁵ Kaput laih tat tiaskaubās karang, kaput bik rahni balna lalah kau yamna kidika 16 karang, yuldarangkat tat as kidika dinit yakat rahni bu āna karang.

²⁶ “Acacia panan kau uhrlanin panani balna kidika singka yamtah, kidika laih holi pāni pirini nakas kidika dini

²⁷ dawak uhrlanin panan singka ūk yamma kidika laih pirini nakaskau kidika dini, dawak singka ūk yamma kidika laih dangnit niningkauh kidika dini, ma kāwa niningkauh kidika.

²⁸ Uhrlanin panani papus kau kidika laih nakas kaupak nakas ūk yakat uhrlana karang, tatni balna papus yakat.

²⁹ Kidika usnit kat tatni balna kidika gol kau manah kahtah, dawak uhrlanin dini balna tuyuyulni kidika yamtah gol kau, kaput laih uhrlanin panani gol kau manah kahna balna kidika uhrlana atnin kidika sulihni balna munah.

³⁰ Witni kat, holi pāni kidika yamtah, asang kau namangkana dai kidika kaput palni.

³¹ “Yamtah tunan muknin asnina baini kidika asna paisa sa kau, dawak asna paisa kau, asna pauni kau, dawak linin asnina wirna balna kidika kau bik, dawak kidika asnina balna minit yakat trit kau ultah di lawani duwa balna kidika wayani bu.

³² Dawak kidika usnit kat, rahni balna gol kau yamna kidika kau alahtah, acacia panan kau rahni balna arungka ukna kidika yakat, bahang kidika balna laih gol kau manah kahwi lana atnin ki, rahni balna arungka lalah kau yamna kidika minit yakat.

³³ Kaput laih tunan muknin asnina baini kidika rahni balna gol kau yamna dinit yakat alahtah, dawak asnina baini kidika pining yakat pramis baksni kidika laktustah. Kaput laih dūr rinin kidika yaklauwi daklana karang holi pāni dawak holi palni pāni kidika karak, manna namangna yakat.

³⁴ Kidika usnit kat pramis baksni putnin kidika puttah, holi palni pāni yakat.

³⁵ Tibil kidika tunan muknin asnina baini kidika ahni niningyakauh laktah, holi pāni tingpal niningkauh yakat, dawak awas pāni kidika laih wadah niningkauh yakat laktah, tibil kidika muhnit niningyakat.

³⁶ “Ū labanni dūrni kiwi kāwa kidika dini yamtah, asna paisa sa kidika kau, asna paisa, pauni, dawak linin asnina wirna kidika kau bik, trit kau yamni ulma.

³⁷ Dūr rinin asnina kidika pāni yamma, rahni balna singka, acacia panan kau, bahang kidika laih gol kau manah kahna karang, alahnin dini rahni balna yamna kidika bik gol manah karang, dawak rahni balna kidika bras kau arta yamma, rahni singka.