Éxodo 21 - Papang Yulni

Muih dinina yamyang balna yulnina lā āna kidika

¹ “Adika lāni balna diatanama

² “Muih dinina yamyang hibru muihni kat bakanma kat, kurih tiaskauas wark kalahwarang, kaunah kurih tiaskaubu laihwak pri kalahwarang, kaunah witing minit lauwas karang ki pri kalahwa kidika yulni

³ Witing alas kiwi kana karang kat; kaput laih alas kalahwi kiwarang; yal duwadai kat, yalni bik kiuna karang witing karak;

⁴ kaunah daniwan yaklauwi yal as kalana karang kat, yal kidika yaklauwi walanibis yakna karang kat al pa, yal pa, dawak yal kidika walanibis balna bitik kidika daniwan duna karang, dawak kaput laih muih dinina yamyang kidika alas kalahwi kiwarang.

⁵ Kaunah al kidika pri kalahnin kidika dukih kalawas karangkat yalni kidika, walanibis balna, dawak daniwan kidika bik dalani ditalwa kidika yulni,

⁶ kaput laih daniwan kidika yaklauwi Papang muhni yakat duwi kiwarang, dawak dūrni yaihnit yakat dukiwarang, dawak di subangni kau tapani ahlwarang. Kaput laih witing dini yamyang kidika ban karang.

⁷ “Muih as kat witing walanibis yal as wauhwi bakanwarang kat, yal kidika sip pri kalahwas karang, ahal muih dini yamyang pri kalalahwa kapat.

⁸ Daniwan kidika yaklauwi witing yalni dunin kulwas karang kat, sirau yakat yaksihn talwas kidika yulni, dawakat minitlauwi laihwi yayakwarang; ting yaksihn talwa karang kaunah sip awas karang tringsar balna yakat wauhwi bakannin.

⁹ Witing walanibis al yakat yalni kalawarang kat, witing walanibis yal kapat kalyamna karang.

¹⁰ Dawak yal ūk duwarang kat, tatuna kidika dauh kalkulnin awas karang, kasnin niningyakat, asnina niningyakat, dawak yalni kapat rahmni kidika bik.

¹¹ Kaunah adika di bās kidika kalawas karang kat, yal kidika pri kalahwarang, witing di as bik launin awas karang pri kalahwa kidika yulni.

Muih kalbibilwa kidika niningyakat lā balna āna kidika

¹² Muih as yaklauwi muih ūk yakat dakwarang, kidika awaskat iwarang kat, kidika muihni laih daunin yakat wirlana karang.

¹³ Kaunah kidika muihni ting yamwasdai karang kat, kaunah Papang yaklauwi kaput yamna dai kat, dauna atnin, kidika usnit kat yang yulki, angdika pāni yakat kiwi yakmaldinin kidika.

¹⁴ Kaunah witing wanaihni niningyakat kulnin daukalwi īna karangkat, walma yang kau sakripais buswa pāni yakat yakmaldarang karang bik, dawak daunin yakat wirlana karang.

¹⁵ “Wais kat papangni dawak nanangni muihni yakat dakwarang kat, daunin yakat wirlana karang.

¹⁶ “Wais kat muih malwi laihwi duwi kiwarang kat, wauhwi bakanpamna karang, kidika awas bik baisa witing tingni yakat duwa sakkarang bik, daunin yakat wirlana karang.

¹⁷ “Nanangni dawak papangni yakat dutni kalyulwarang kat, daunin yakat wirlana karang.

¹⁸ “Kalbabauna karangkat, al as yaklauwi ūk yakat kipala kau bahrwi dakwarang kat, kidika awaskat bauwi dakwakat siknis kalahwi pa yakat kalangwarang kat, kaunah dauwas karang kat,

¹⁹ dakna muihni kidika laih pātni dis kulna karang, kalina muihni kidika yaklauwi ahni yakat tulnah kau kalahwarang kat, kaunah witing launa karang kaliwak yamna balna kidika, dawak mani balna dauh bayakwi kiuna kidika bik.

²⁰ “Muih as kat witing dini yamyang as al kidika awaskat yal karangpa kat pan kau wiswak dauwarang kat, witing muih īna kidika minitlauna karang.

²¹ Kaunah ma as kidika awaskat minitkau sangka karang kat, wah kalawas karang, kat muih dinina yamyang kidika laih witing dini bahang.

²² “Muih ahal bu kalbauwi muih yal as muih karuk kat dalani kalalawarang, dawak walanibis kidika dauwi kalahkiwarang, kaunah yal sangnika kidika yamadangni yakat āwas karang kat, witing dutni yamna muihni kidika minitlauna karang, yal kidika alni yaklauwi yulwarang kidika yakat, dawak wihta balna la yayamwarang kaput.

²³ Kaunah yal sangnika kidika yamadangni yakat āna karang laih, sangnika minit kidika sangnika kau launa karang,

²⁴ minikpa kidika biri minikpa, anani kidika biri anani, tingni kidika biri tingni, kalni kidika biri kalni,

²⁵ busna kat biri busnin, dakna kat biriwi daknin, bauna kat biriwi baunin.

²⁶ “Muih as kat witing dini yamyang al pa, yal pa kat minikpa yakat bauwakat bahbukna karang kat, pri dapamnin karang ki minikpa kidika minit.

²⁷ Anani as bauwi bahna karang kat, kidika yulni pri kaldapamnin karang.

Muih as di kaliwarang kat kidika lāni balna

²⁸ “Turuh almuk as muih pawarang kat, al pa, yal pa, iwarang kat, tuniruh almuk kidika iwarang kipala kau bahrwi, dawak muihni kidika laih kasnin awaskarang, kaunah turuh dawan yakat laih wah kalanin awas karang.

²⁹ Kaunah turuh almuk kidika nining muih pawa karang kat, ma as kat muih iwarang kat, kipala kau bahrwi īna karang, dawak daniwan yakat bik sihm bahrwi īna karang, turuh daniwan kidika amanglawa bik, di as bik yamwasdai kat.

³⁰ Daunin yakat wirlanin karak dawak, pakwak minitlaunin karang kat, kidika muihni sangnika minit ampus kalkulwarang kidika launa atnin karang.

³¹ Adika lāni bik sihm kaput karang, wahmabin as dawak siraubin as kau pana karang bik.

³² Kaunah turuh almuk kidika muih dinina yamyang al pa, yal pa kat pana karang kat, tuniruh almuk kidika kipala kau bahrwi īna karang, dawak muih dinina yamyang daniwan yakat laih lauwi kalana karang lalah 30.

³³ “Muih as kat pa kuhrna kidika apahni dasakwarang kat, kidika awasbik pa as kuhrwi putwas dasakwak kidika yakat turuh almuk pa kidika awaskat biriku pa kawarang kat,

³⁴ pa kuhrna daniwan kidika yaklauwi tinglau daniwan yakat lauwi kalana karang tingnilau dauna kidika minit, dawak tinglau dauna kidika laih lalah launa muihni kidika duwarang.

³⁵ “Muih as tuniruh almuk kidika yaklauwi muih ūk tuniruh yakat pawi iwarang kat, turuh almuk sangka kidika bakanpamwi lalahni kidika papus wayahwi duduwarang, dawak turuh almuk dauna kidika muihni bik.

³⁶ Kaunah turuh almuk kidika nining pawi iyang dai bik daniwan kidika pini kulwasdai kat, tuniruh dauna kidika muihni yakat turuh ūk kalana karang, dawak turuh almuk dauna kidika laih witing duna karang.