Éxodo 20 - Papang Yulni

Lā salap

¹ Papang yulbauna, adika yulni balna bitik:

² “Yang kuduh Dawan yang, man Papangma, Egipto kaupak mayakna kidika, dawak muih dini yamyang man dai kidika, kidik pāni yakat.

³ “Dawan dauh balna duduwinih.

⁴ “Kisang kau di balna bangkidika, dawak sau akat di balna bangkidika balna wayani yamwi damawan duwinih, dawak kuma kau di balna bangkidika, dawak sau dinit kau di balna bangkidika wayani balna bik.

⁵ Kidika balna muhnina yakat abukwinih, dawak prininaias yamwinih, kat yang kuduh Dawan man Papangma, Papang as minit anyang kidika, dawak bik papang balna dutni yayamna balna kidika yulni wah diawa kidika, walaninabis balna, manina balna dawak buhnina balna kau bik;

⁶ kaput kaunah dalani lani witingna yakat dutayang kidika, sulani balna tausin kaiwa kidik yang akat dalani yatatalwa kidika, dawak bik lāki balna yakat yayamwa kidika.

⁷ “Man Dawan Papangma ayangni kidika di dauh balna yakat yusyamwinih, kat angdika muihni witing ayangni kidika dutni yusyamwarang kat wah kalawas laih dawas karang ki.

⁸ “Yakurupdinin mani kidika ismang aitah, Dawan dini yaknin kidika.

⁹ Ma tiaskauas wark alahwah, dawak kidika yakat ais yamnin kidika balna bitik yamtah,

¹⁰ kaunah ma tiaskaubu kidika laih yakurupdinin mani dawak Dawan dini, man Papangma. Kidika mani wark as bik yamwinih, dawak walamabis ahal dawak yayal balna kidika bik sihm kaput, dawak dima yamyang ahal, yayal balna kidika bik, tingmalau balna, dawak man ūma yakat tringsar balna kidika bik.

¹¹ Kat Dawan laih ma tiaskauas pasyakat makau kisang kidika dawak sau bik yamna, kuma dawak kidika pasyakat di balna bangkidika bitik, dawak ma tiaskaubu yakat wingnita puhna. Kidika bahang Dawan yaklauwi yakurupdinin mani kidika blis yamna, dawi witing dini yakna.

¹² Nanangma dawak papangma risnipik kalatah, kaput laih sau akat māma naini karang, Dawan Papangma sau mana kidika.

¹³ “Muih iwinih.

¹⁴ “Marid lani bahwinih.

¹⁵ “Di malwinih.

¹⁶ “Alas yulta wanaihma yakat dutni kalyamwinih.

¹⁷ “Wanaihma ūni kidika tumwinih: yalni kidika bik tumwinih, dini yamyang muihni balna kidika bik, warkni tuniruh balna kidika bik, biriniku balna kidika bik, dawak witing dini as bik tumwinih.”

Israel balna Papang yamaniduduwi

¹⁸ Israel balna bitik laih tatalna dai alwana ruhmwa kidika dawak lapwa kidika bik, trumpit yulwa kidika bik, dawak asang mukus manah kidika bik; bahang witingna yamaduduna dawak nailuih kau watna bangdai.

¹⁹ Kaput bahang Moses yakat kalyuyulna: —Man lawa yulyanabautah, bahang yangna man yulma dakik yamtanaki; kaunah Papang laih yulyanabaunin awaski, kidika awas karang kat dautanaki.

²⁰ Dawak Moses yaklauwi nangnitnalana: —Yamaduduwinih. Papang kaina manalaihwi talna atnin yulnin, kaput laih manna kidika ban yamaniduna atnamna yulni, dawak bik kaput laih manna dutni yamnamna awas yulni.

²¹ Dawak tawan kidika nailuih bangkat, Moses laih mukus puksani duwa yaihnit yakat kiuna, Papang sakkidika yakat.

Sakripais busnin pāni lāni kidika

²² Dawan yaklauwi Moses yakat kalyulna: “Israel balna yakat adika diyultah: ‘Uman manna talnamana, kisang kaupak manna yakat yulmanabauting kat.

²³ Gol dawak lalah kau bik dawan dauh wayani yamwi mamatna yuyulwinih, yang kau yamtamana kapat.

²⁴ Sakripais busnin pāni as yamta yatanauh sau kau, dawak kidika pāni yakat, manna tingmanalau kaupak duyawa yatanauh yang akat, sakripais karauni kauna buswa kidika dawak, wanaihni karak watwi yamni kalahnin sakripais buswa kidika bik yamtanauh. Yang aiwik blis yamki yamtanama pāni balna bitik yakat, dawak kidika pāni balna yakat yang dukih yawa kidika, ayangki kidik manna ismangnakatta atnamna.

²⁵ Sakripais busnin pāni kidika kipala kau yamta yatanama kat, kinipala sahna kau laih atnin awas ki, kat kinipala balna kidika sahwarang kat, kidika sakripais busnin pāni laih risnipik dis kalwi.

²⁶ Yang kau sakripais busnin pāni yamwi yana kidika laih tani kilitna yamnin awas ki, kat manna ilwanangkat wahmana kidika talnin awas yulni.’