Éxodo 17 - Papang Yulni

Kipala kaupak was kalahna

¹ Israel muihni balna bitik Sin kauhnimak wanilang kaupak dawi kalahwi uina, bahang kidika tani yakat kalahwi tani tani uina, Dawan yaklauwi diyulna dai yakat dakawi. Refidim yakat uiwi wawatna, kaunah was disdai muih balna kidika dina atnin,

² kaput laih muih balna kidika Moses yakat kalyuyulna, aput: —¡Was yanatang kat ditanakuh! —¿Ais yamta yang akat kidika yayultamanah? ¿Ais Papang yakat traini tala manah? —Moses yaklauwi kaput diyulna.

³ Kaunah tawan kidika was dikih kalana dai, dawak Moses niningkauh yulwi, aput yuyulna: —¿Ais yamta yanayamtang kat Egipto kaupak alahwanayangnah? ¿Ais yulni was dikih yanawa kidika yulni dautanakiyah walakinabis balna dawak tingkinalau balna bik?

⁴ Moses yaklauwi Dawan yakat kalyulwi, aput kalyulna: —¿Ais yamta yanayamtang kat Egipto kaupak alahwanayangnah? ¿Baisa bin-apis karang kat kipala kau yabahrwi yaihiwarang?

⁵ Dawak Dawan yaklauwi nangnitlana: —Tawan muhni yakat yawah, dawak Israel muih bararak balna kidika mamakdadawang. Dawak tulnah was yakat wisnaman dai kidika bik dutayawah, kaput laih mahka lapakta yawama.

⁶ Yang Horeb asangni yakat tama tahaki, kipala minit yakat. Dawak kipala yakat wistang kat was kalahwak muih balna kidika didina karang. Dawak Moses kaput yamna, Israel muihni bararak balna muhnina tani yakat,

⁷ dawak kidika pāni laih ayangni pakna dai Meriba kat Israel balna yaklauwi rahmnina yulni parasni kalyuyulna dai bahang, dawak kaput bik ayangni ūk bik papakna dai Masah kat Papang yakat traini talna dai bahang, yuldarang kat: “¿Dawan kidika mayang karak sakyah, kidika awaskat mayang karak sak-awasyah?”

Amalecita balna niningyakat kalbauna kidika

⁸ Amalecita balna kidika Refidim yakat uina Israel balna niningna yakat kalbauna atnin.

⁹ Kaput laih Moses yaklauwi Josué yakat kalyulna: —Ahal buas duta alahwa amalecita balna niningna yakat kalbautah. Yang yahan mani asang tuna kau yakat sak-awaki, Papang tulninah kidika tingki yakat dutik.

¹⁰ Josué laih witing yamna Moses yaklauwi pakna kaput, kalahwi kiwi amalecitas balna niningna yakat kalbauna. Dawak Moses, Aarón, dawak Hur kidika balna laih asang yakat kilwi uina.

¹¹ Moses witing tingni dulauwak, Israel balna yaklauwi minit bayakwi; kaunah witing tingni kidika lakwakat, amalecitas balna yaklauwi minit bayayakwi.

¹² Kaunah Moses witing tingni balna kidika kalsuhwa bahang kipala as duwi uiwak kidika minit yakat yalahna. Usnit kat Aarón dawi Hur karak Moses tingni yakat laihwi dulalauna tingni nakas nakas ki. Kaput laih Moses tingni kidika lakwas barangni duwa sak dai ma kidi kakawi kiuna kat,

¹³ Josué yaklauwi amalecitas balna yakat minitna bayakna isparah kau kalbauwi.

¹⁴ Kaput dawak Dawan yaklauwi Moses yakat kalyulna: —Adika wauhtaya yakat ultah, kaput laih muih kidika isningkatwa karang; dawak Josué yakat bik kalyultah amalecitas balna kidika kulnin bitik kau ustik yakpamki.

¹⁵ Moses sakripais busnin pāni as yamna, bahang kidika laih ayangni pakna “Dawan laih yang plakikin”,

¹⁶ dawak bik yulna: “¡Dawan planikin kidika tingni yakat! ¡Dawan kidika war kalbauwi Amalec karak sulani balna ūk ūk kaiwa yakat!”