Éxodo 14 - Papang Yulni

Israel muihni balna Kuma Pauni dakyaklalana kidika

¹ Dawan Moses yak yulkalbauwi kal tulna:

² “Israel balna yakat diyultang nawatwi aiwi, Pi-hahirot yakat wawatwang, Migdol dawak kuma kidika karak walsah yakat, Baal-zefón muihni yakat. Witingna ūnina lababanni balna kidika adika pāni muhnit yakat yayamwang, kuma kung yakat.

³ Kaput laih fero kidika kulwarang: ‘Israel balna kidika amanglalawaski angkut uininna kidika. kauhmak wanilang yakat ta didisna.’

⁴ Kaunah yang lawik yamtingkat fero kidika kulnin dadasni kalwarang dawak manauiwi kiwarang; kaput dawak witing yakat yang paraski kidika niningkaki, dawak kalbauyang muihni balna bitik niningna yakat, dawak Egipto muihni balna amanglalawarang yang laih Dawan kidika.” Israel balna kaput yayamna.

⁵ Dawak Egipto kingni yakat kalyulna, Israel balna laih kikirana. Kaput laih king dawak tunan nunuhni balna dai kidika kulninna satuk wirlalana dawak yuyulna: “¿Ais yamdi Israel balna kidika didamukdakat uina yah, mayang mawarkki yamwas dawi?”

⁶ Kidika usnit yakat fero witing yaklauwi pakna mahka kalbaunin kārni kidika ridi yamna, dawak kalbauyang muihni balna bitik duwi kiuna.

⁷ Kār tanit yayamni balna kidika 600 duna, Egipto kārni balna kidika bitik pasyakat, dawak kalbauyang muihni taninatuna balna muihnina kat kat duwi uiwa kidika kauna.

⁸ Dawan yaklauwi yamwak fero kidika kulnin dutni kalna, bahang Israel balna yakat uiwi kiuna witingna kidika parasnina nuhni karak kalahwi uina karang bik.

⁹ Egipto muihni balna, witingna kalbauyang muihni balna bitik, kār kau, aras kau, kalahwi uiwi uina Israel bang yakat, kuma kung yakat uiwi kukuihna, Pi-hahirot yakat, dawak Baal-zefón muhnit yakat, bahang kidika yakat laih uiwi wawatna bang dai.

¹⁰ Israel balna amanglalana fero dawak Egipto muihni balna uiwi atwak, kasak yamaduduna dawak Dawan yakat ilp yuyulna.

¹¹ Dawak Moses yakat kalyuyulna: —¿Egipto yakat sau ū dis dai kat pah, yanayakta duaitang kat kauhmak wanilang akat dautayangna adika? ¿Ais yamta aput yanayamtamahn? ¿Ais yamta Egipto kaupak kaput yanayaknamahn?

¹² Adika kuduh yangna Egipto yakat yulta yangna dai kidika: ‘Yanadatang kat Egipto muihni balna dinina yamtanakuh. ¡Witingna dinina yamyang atnin kidika tanit yamni ki, kauhmak wanilang akat daunin karak dawakat!’

¹³ Kaunah Moses yaklauwi nangnitnalana: —Yamaduduwinih. Yamni talnauh Dawan di yamwarang kidika warmani manalaihwi yaknin yulni, kat watta Egipto muihni balna kidika talas awanama, warmani talamana kidika.

¹⁴ Manna kulwi kalbabauwinih, Dawan manna yulmana kalbauwarang ki.

¹⁵ Kaput laih Dawan yaklauwi Moses yakat kalyulna: —¿Ais yamta ilp yayultamahn? ¡Israel balna kidika paktang tanitna yakat uiwarang!

¹⁶ Dawak man laih, tulmanah kidika dulauta dawak kuma kidika bu sahyakta, kaput laih Israel balna kidika buhni dakyaklalawarang.

¹⁷ Yang lawik yamtingkat Israel balna kidika kulninna dadasni kakalwarang, dawak uiwi uiwarang; kaput laih fero yakat paraski kidika niningkaki, kaput bik laih kalbauyang duwa balna kidika bitik yakat, kārni balna dawak aras kau kikilwa balna bitik yakat.

¹⁸ Fero yakat paraski kidika niningkaki usnit kat, kārni balna, aninaras balna yakat bik Egipto muihni balna amanglalawarang yang laih Dawan yang.

¹⁹ Kidika minitni yakat, Papang innisal, mukus dai kidika Israel muihni tanina yakat kiwadai kidika waralaih dangnitna yakauh yaklalana.

²⁰ Kaput laih mukus dai kidika, Egipto muihni balna dawak Israel muihni balna karak walsah yakat kana; Egipto muihni balna niningna yakat laih puksani as dai kaunah Israel balna niningna yakat laih kidika yaringni as dai. Kidika bahang Egipto muihni balna kidika sip lalaihwas dadana Israel balna yakat pukta bitik yakat.

²¹ Moses witing tingni dulauna kuma nining yakat, dawak Dawan yaklauwi wing parasni sihna makilwa yakaupak, bahang pukta bitik wing kidika wauhna dawak kuma kidika bu sahyakna dai. Kaput laih Dawan yaklauwi kuma dai kidika buhni manah yamna dai,

²² dawak sau buhni dakyaklalana Israel balna kidika, kuma was kidika daklana bu rau dai as laih tingpal dawak ūk laih wadah nining yakat.

²³ Aras kau kilna muihni balna kidika bitik, fero kārni balna bitik dangnitna yakat kawi uina dai, kuma papus yakat uiwi uina dai;

²⁴ kaunah ma payahlanin manah yakat, Dawan yaklauwi Egipto muihni kalbauyang balna yakat talna dai mukus dawak kuhpau dai kidika kaupak, dawak witingna pasyakat pini kaupak kiri yaklalauna;

²⁵ kārnina wīlni balna daukakalna, dawak witingna sip-awas dai baisa uiwi uinin. Kaput dawak Egipto muihni balna yuyulna: —Israel balna kaupak mairanang, kat Dawan laih witing laih witingna yulnina kalbauwi mayang manikingkauh.

²⁶ Dawan yaklauwi Moses yakat kalyulna: —Tingma kidika kuma yakat yatah was kidika nawatwi kaiwi, Egipto muihni balna minitna yakat bukwang, aninaras balna dawak kārnina balna minit yakat.

²⁷ Moses tingni dulauna kama yakat dawak, payahlanin manah kat was kidika watwi pāni yakat kaiwi kana. Egipto muihni balna kidika maīrang atwak, kuma karak kalpapakna, kaput laih Dawan yaklauwi kuma yakat āmukna.

²⁸ Was kidika watwi pāni yakat kaiwi kana kat, kar dawak aras balna kidika bitik laih āmukna dai, dawak kalbauyang muihni balna uiwi auina dai kidika Israel balna yakat kidika balna bitik āmukna dai. Fero kalbauyang muihni duwa kidika as bik sangka yaklawas dai.

²⁹ Kaput kaunah Israel balna laih sau buhni dakyaklalana dai, was daklana rau kidika papus munah, as laih tingpal niningyakat, dawak ūk laih wadah nining yakat.

³⁰ Kidika mani, Dawan yaklauwi Israel balna kidika laihwi yakna dai, Egipto muihni balna parasnina kaupak, dawak Israel ban tatalna dai, Egipto muihni balna kidika kuma kung yakat dauwi kikilna kat.

³¹ Israel balna witingna, Dawan parasni nuhni yakna kidika tatalna kat, Egipto muihni balna niningna yakat Dawan nining yakat rispik nuhni kalalana dai, dawak witing yakat kulninna kidika āwi duduna, kaput bik Moses yakat bik.