Éxodo 11 - Papang Yulni

Isningna pakna walaninabis tatuna balna dadauwarang kidika yulni

¹ Dawan yaklauwi Moses yakat kalyulna: —Baisa wah as duaiki ki fero minit yakat dawak Egipto muihni balna minitna yakat bik. kidika usnit yakat, fero kidika mana dawak yawanamna manh laih awaskarang kaunah manakangwi yakwarangki adika kaupak.

² Kaunah waralaih, Israel balna yakat diyultah, ahal dawak yayal balna bik, witingna yaihnitna kau muih balna yakat, gol dawak lalah balna kidika yulwi duduwang.

³ Dawan yaklauwi yamna Egipto muihni balna kidika yamni atnin Israel muihni balna karak. Kidika minit yakat, tunan nunuhni balna kidika kulwa dai Moses laih al as satuk ki, Egipto muihni balna bitik kaput kukulwa dai.

⁴ Moses yaklauwi fero yakat kalyulna: —Dawan aput yulna: ‘Pukpapus kat Egipto munah bayakki ki,

⁵ kaput laih Egipto muihni balna walaninabis tatuna balna kidika bitik laih dadauna karang, fero walanibis tatuna witing yalahwa pāni kau yalahwa kidika bik dauna karang, kaput bik laih muih dinina yamyang kiwatak tikwa kau wark kalahwa kidika walanibis barakni kidika bik dauna karang. Kaput bik laih tinglau walaninabis tatuna yakna balna kidika bik dadauna karang.

⁶ Egipto sauni bitik yakat kaidi sararahna dai, kidika dini kalahwak taldas dai, dawak bik watwi kalahwas karang ki.’

⁷ Manna amanglanamna yulni Dawan laih satuk dikulwi Egipto muihni balna dawak Israel muihni balna karak, sul bik ahauhwas karang Israel balna niningna yakat dawak tingninalau balna yakat bik.

⁸ Kaput laih tunan nunuhni balna dutaman balna kidika aiwi yatatalwarang, dawak limbabahwi yayuyulwarang: ‘Yawanauh, man dawak usmat uhuiwa balna bitik.’ Baisa kidika tanitkauh laih yawas awaki. Moses kulnin daukalwi kalahwi kiuna, fero muhni kaupak.

⁹ Usnit kat Dawan yaklauwi Moses yakat kalyulna: —Fero laih man yulma dakawas karang ki, bahang kaput laih di taldas dini kidika baisa yamki Egipto yakat.

¹⁰ Moses dawi Aarón karak, adika dini taldas balna kidika singka yayamna dai fero muhni yakat, kaunah Dawan yaklauwi yamwak kulnin dadasni kalna dai bahang, fero witing Israel balna kidika dawak kalahwi uiwas dadana.