Éxodo 10 - Papang Yulni

Wah sihna sisin

¹ Dawan yaklauwi Moses yakat kalyulna: —Fero yakat yawa talah, kat yang lawik yamna yang witing dawak tunan nunuhni balna kidika bik witingna kulninna dadasni yamna atnin, dawakat kaput laih yang di taldas nunuhni kidika yamtik niningkana atnik,

² dawak kaput bik man walamabis balna, māma balna yakat bik diyulna atnam, yang amput Egipto muihni balna yakat sarahni diyamki kidika, dawak bik witingna pasyakat taldas dini balna yamnayang kidika. Kaput laih manna amanglatanama yang laih Dawan yang kidika.

³ Moses dawi Aarón karak uina dai fero yakat bahang aput kalyuyulna: —Dawan yaklau aput yulwi, hibru balna Papangnina kidika: ‘¿Mampat kat yang nikingyakat sau yak buknam yultas awamayah? Yang tawanki kidika datang kiwi ayangki nuhni yamwang;

⁴ kat man datang uiwas kat ban laihwatta duma laih, yahan mani sisin sihting aiwarang man sauma minit yakat,

⁵ kidika balna yaklauwi sau minit yakat uiwi bubukna karang mahni palni, bahang kaput laih sau kidika sipawas karang talna atnin. Di minik balna kapat uhwi sau minitkau di ukusna balna kidika yakat daukakalna kaunah as as wawatna balna kidika bitik laih daukakalna karang, dawak asangpas kau pan nunuhni balna kidika bitik laih daukakalna karang.

⁶ Man ūma kidika pasyakat bunghdana karang dawak tunan nunuhni balna dutaman balna ūnina yakat bik kaput karang, kaput bik laih Egipto muihni balna ūnina bitik bahngna karang. ¡Di as papangmana dawak kukungmana balna bik tatalwa dai kidika warmani kat!’ Moses kidika yulni balna yulwi dawi fero uni kaupak kalahna watak yakat.

⁷ Kaput dawak fero tunan nunuhni balna duwa kidika balna yuyulna: —¿Mampatkat adika alni dutni maiyamwa kidika dawarangyah? King datang kat adika muihni balna uiwi witingna Papangnina Dawan yakat ayangni nuhni yayamwang. ¿King man baisa amanglatasmahn Egipto bitik laih daukalna kidika?

⁸ Fero yaklauwi diyulwak watwi uina Moses dawak Aarón karak, diyulna: —Manna Dawan Papangmana yakat yawa ayangni nuhni yamtanauh. Kaunah yayultah, wais balna kidika uiwarangyah.

⁹ Dawak Moses yaklauwi nangnitlana: —Yangna yawinikna ki, walakinabis balna, dawak muihbararak balna, walabis ahal dawak yayal, tinglau balna, sīp, turuh balna, kat yangna nikingna yakat laih alasna nuhni as ki, Dawan alasnina.

¹⁰ Kaunah fero yaklauwi kalyulna: —¡Kulnin dutni dutaman kidika lāih ki! ¿Dawak manna kultamanah Dawan kidika mamakna dawarang dawak yang bik manadating walamanabis balna karak yawanama?

¹¹ Kaput awas karangki. Yawanauh, manna ahal muih bararak balna Dawan yakat ayangni nuhni yamna atnin, kat manna kaput dukih manawa bahang. Dawak fero yaklauwi pakna, witing nuhni kaupak kangwi yakmukna atnin.

¹² Kaunah, Dawan yaklauwi Moses yakat kalyulna: —Egipto minit yakat tingma dulautah, kaput laih sisin balna kidika Egipto yakat uiwi pan balna bitik dahn yayamna karang, di minik kapat uhwi daukalmumukna pasyakat baisa wawatna balna dai kidika bitik.

¹³ Moses witing tingni dulauna dai Egipto minit yakat, dawak Dawan yaklauwi kalawak wing wauhna tingpal niningkaupak Egipto sauni bitik yakat, ma as dawak pukta as, kidika wingni yaklauwi sisin balna kidika duaina dai,

¹⁴ kidika balna aina kidika Egipto sauni bitik yakat dawi yaklalana. Adika dini baisa kalahwas dai, dawak bik kalahwas karang ki, adika usnit yakat, sisin mahni palni kalahna adika,

¹⁵ sau yakat bahngna dai, bahang sip awas dai sau kidika talna atnin, bahang di minit kapat uhwi dibasta sang balna kidika daukalmukna dai kaunah buas daukakalwas dai kidika balna bitik laih kakasna dai pan balna dawak, minit balna kidika bik, Egipto sauni kau dibasta sang kidika bitik laih dis kalna dai: pan balna bitik kaput kalna dai.

¹⁶ Fero yaklauwi sirihni palni diyulwak uina Moses dawak Aarón karak, dawak diyulna: —Dawan Papangma niningyakat dutni yamnayang, dawak manna namangna yakat bik,

¹⁷ kaunah manayultayang waradika manah dutki datanang diswang, bahang manna yang yulki mamatna yultanauh Dawan Papangmana yakat, kaput laih adika wahni dutni adika yang kaupak naikau yakwang.

¹⁸ Moses kidika fero uni kaupak kalahkiwa minitni yakat, Dawan kau minit yulna.

¹⁹ Kaput laih Dawan yaklauwi wing wauhwa kidika kalawak pirini yakauh kiuna dai, dawak wing parasni kalawak wauhna dai ma kāwa kaupak, kaput laih sisin balna kidika bitik wauhwi duwi kiuna dai Kuma Pauni yakat. Kaput laih Egipto sauni yakat sisin as bik watwas dai.

²⁰ Kaput kaunah Dawan yaklauwi fero kidika kulnin dadasni kalna atnin, dawak Israel balna kidika didawak uinin-awas.

Wah sihna, puksani lakna

²¹ Kaput laih Dawan yaklauwi Moses yakat kalyulna: —Man tingma dulautah ibis yakat, kaput laih Egipto sauni adika puksani lakna karang, bahang kidika laih rahm palni puksani karang, bahang kidika puksani laih sipkarang laihwi dakana atnin.

²² Moses witing dulauna tingni, ibis yakat, dawak puksani lakna nuhni palni Egipto sauni bitik yakat,

²³ ma bās kapat sipawas dai di talna atnin, wanaihni yakat talnin dawak kal-itiknin bik sip-awadai, kaput kaunah Israel balna ūnina yakat laih yaringni duwa dai.

²⁴ Kaput laih fero yaklauwi Moses yakat kalyulna witing yakat kiuna atnin, dawak kiwakat kalyulna: —Yawa Dawan ayangni tanit nuhni yamtanauh, dawak walamanabis balna bitik duyawanauh, kaunah sīpmana dawak tumanaruh balna kidika laih data yawanauh.

²⁵ Kaunah Moses yaklauwi nangnitlana: —Nawatkauh laih man lawa tinglau kidika mayama ki sakripais yamna atnin Dawan Mapapangki risnipik kau.

²⁶ Baisa minit yakat, yangna tingkinalau balna bitik yangna karak uiwarang ki. Tinglau as bik watnin-awaski, kat kidika balna paskaupak bik as as waltik yaktanaki ki Papang yakat mikitna yulnikna yulni. Baisa pāni yakat yawas yangna kat amanglatasyangna ais kidika yangna want awanakipa Dawan yakat ayangni nuhni yamnikna kidika.

²⁷ Kaunah Dawan yaklauwi yamna fero kidika kulnin dadasni yamwi dawak uiwas atnin kidika.

²⁸ Fero yaklauwi Moses yakat kalyulna: —Akaupak yawah, dawak yamni kalmaintalah akat kaiwi yatalnin-awaski, kat watta yang muhni yakat aiwama kat dauma.

²⁹ Dawak Moses yaklauwi nangnitlana: —Yamni yultada, wattik nawattik aiwas awaki.