Ester 5 - Papang Yulni

Ester king muhni yakat kiwi

¹ Ma bās bayakwak usnit kat, Ester king yal prakni kana, dawi, king watakni pasyakat kawi yaklana, dawi kiwi watna, king sinini kau yalahna sakkidika muhnit kau pa panuhni pakyakat, kidika laih dūr muhnit tani kat sakdai.

² King witing yalni Ester kidika watak yakat sakkat talwi dalani kaltalna dawak, tingni kau tulnina gol kidika niningyakat yakwi yuna. Ester īskiwi tulnina yakat laihna,

³ dawak king yaklauwi kalyulwi dakana: —¿King yalni Ester ampat mawih? ¿Ais dukih mawih? ¡Yang king awayang sauni adika papuswayah yulma bik maki! Dawak Ester yaklauwi nangnitlana:

⁴ —Man, king man kidika yamni kapat talaman kat, kalma dinit yakat buktik yultayang. Yawah warmani kasnin alasna as yamtayang man ayangma nuhni kau, dawakat Amán bik duyawama. Kaput laih king yaklauwi dipakna:

⁵ —Amán waltanauh, kaput laih king yalni Ester kulnin dukih kalawa kidika kat karang. Kaput laih king dawak Amán karak uina king yalni yaklauwi kasnin alasna yamna yakat.

⁶ Kidika alasnina pasyakat king yaklauwi Ester yakat kalyulna: —¡Yayultah dukih mawa kidika, dawakat maki, yang king awayang adika papuswayah karang bik!

⁷ Ester yaklauwi nangnitlana: —Adika dukih yawa kamanah mayultayang:

⁸ king man adika yang akat ismang awa kat, yang dukih yawak yultayang kidika yatah, yahan mani watta aiwah, kaunah Amán karak aiwanama, kasnin alasna uk yamnayang kidika man rismapik nuhni usnit yakat. Kaput laih king man yayultaman kidika yakat yamna awaki.

Amán yaklauwi Mardoqueo sitwi inin pani yamwi

⁹ Amán laih kidika kasnin kaupak alasna isninglak kalahwi kiuna; kauna Mardoqueo kidika king ūni dūrni yakat sakkat talwi kulnin daukalna, kat yaklauwas dawak bik kalitikwas dai bahang bayakkiwak talwa bik.

¹⁰ Kaput kauna, kidika minitni yakat, kulnin daukalwa kidika lāih yakwasdai, kaunah ūni yakat kiwi kawi dawi witing kaltalyang balna yamni kidika yulwi duwi kiuna, Zeres dawak yalni karak,

¹¹ dawak kidika balna yakat diyulna witing ritsni nuhni kidika, dawak walabis bik mahni duwa kidika bik, dawak amput king yaklauwi muih nuhni kalyamna kidika tunan nunuhni ūk balna pasyakat, wark tanit nuhni kalana kidika bik,

¹² dawak baisa minityak lakwi yulna: —Yang akat manah king yalni Ester yaklauwi yayulwi duwi kiuna kidika kasnin alasnina as yamna yakat warmani, dawak yahan mani yamwarang kidika yakat bik watwi yayulnaki yawana atnik.

¹³ Kaput kauna yang, Ju muihni Mardoqueo witing kidika king ūni dūrni yakat yalahna sakkat talayang kat, kidika balna bitik laih dauh manah kalwi yang nikingyakat.

¹⁴ Kaput laih yalni dawak kaltalyang yamni balna ūk bik witing yakat kalyuyulna: —Sihtangkat sitwi inin pani as yayamwang, maluihni metros 20 as, dawak yahan mani king yakat kalyultangkat Mardoqueo kidika kidik pani yakat sitwi ilwang. Kaput laih king karak kasnin alasnina yakat ismanglak yawama. Kidika kulnin lani yamni talna Amán, dawak sihwak sitwi inin pani kidika yayamna.