Esdras 8 - Papang Yulni

Nawatwi uina balna kidika ayangnina

¹ Adika balna ki witingna walaninabis balna taninatuna, Artajerjes king kana mani balna yakat Babilonia kaupak Esdras karak nawatwi aiwi wauhtaya yakat ayangnina ahana dai kidika:

^2-3 Finees sulani balna kaupak laih, Gersón; Itamar sulani balna kaupak laih, Daniel; Devid sulani balna kaupak laih, Secanías walanibis Hatus; Paros sulani balna kaupak laih, Zacarías, witing karak laih muih ahal 150 wauhtaya yakat ayangnina ana kat kalpakna bangdai;

⁴ Pahat-moab sulani balna kaupak laih, Zeraías walanibis, Elioenai, muih ahal 200 karak kalpakna bangdai;

⁵ Zatu sulani balna kaupak laih, Jahaziel walanibis, Secanías, muih ahal 300 karak kalpakna bangdai;

⁶ Adín sulani balna kaupak laih, Jonatán walanibis, Ebed, muih ahal 50 karak kalpakna bangdai;

⁷ Elam sulani balna kaupak laih, Atalías walanibis, Jesaías, muih ahal 70 karak kalpakna bangdai;

⁸ Sefatías sulani balna kaupak laih, Micael walanibis, Zebadías, muih ahal 80 karak kalpakna bangdai;

⁹ Joab sulani balna kaupak laih, Jehiel walanibis, Abdías, muih ahal 218 karak kalpakna bangdai;

¹⁰ Bani sulani balna kaupak laih, Josifías walanibis, Selomit, muih ahal 160 karak kalpakna bangdai;

¹¹ Bebai sulani balna kaupak laih, Bebai walanibis, Zacarías, muih ahal 28 karak kalpakna bangdai;

¹² Azgad sulani balna kaupak laih, Hacatán walanibis, Johanán, muih ahal 110 karak kalpakna bangdai;

¹³ Adonicam sulani balna witni kidika laih, Elifelet, Jeiel dawak Semaías, muih ahal 60 karak kalpakna bangdai, witingna laih witni kat nawatwi uina dai.

¹⁴ Bigvai sulani balna kaupak laih, Utai dawak Zabud, muih ahal 70 karak kalpakna bangdai.

Makat yulnin ūni warkni yamyang balna

¹⁵ Esdras, yang lawik sau sahna kudungni Ahava wasni yakat kiwi kalahwa kidika yaihnit yakat witingna bitik kau uduhnayang dai, dawak kidika pāni yakat ma bas watna bangyangna dai. Dawak muih balna yakat dawak sumalyang balna yakat bik awaihtik talnayang kat, libait muihni as bik kalpaktas yang dai.

¹⁶ Kaput bahang Eleazar, Ariel, Semaías, Elnatán, Jarib, Elnatán, Natán, Zacarías dawak Mesulam kidika balna sihnayang dai, witingna laih nuhni dikulna muihni balna dai, dawak sumalyang balna Joiarib dawak Elnatán kidika balna bik sihnayang dai,

¹⁷ Casifia pāni tanituna Ido yakat uiwi kaltalna atninna yulni, Ido yakat dawak witing karak kaltalyang muihni yayamni, Casifia yakat makat yulnin ūni warkni yamwa bangdai kidika yakat diyulninna kidika bitik diyulnayang dai, muih duahaiwakat Papangkina ūni yamnin yakat ilp yanana atnin yulni.

¹⁸ Dawak tingkih Papang, Serebías kidika duaiwi yananana, al as di sip palni kidika, witing walanibis balna dawak wirahni ahal balna kauna duaiwi yanana dai; bitik kat muih 18.

¹⁹ Baisa kidika minityakat Merari sulani balna kaupak Hasabías dawak Jesaías kidika balna bik duaiwi yanana dai, witingna walaninabis ahal balna dawak wirahnina ahal balna kauna bitik kat muih 20 dai.

²⁰ Devid dawi tunan duyang muihni balna kidika karak yaklau makat yulnin ūni warkni yamyang balna kidika kaupak yakwi libait muihni balna dinina yamna atnin ahana dai, bitik kat muih 220 bangdai, witingna bitik kidika muihnina kat kat ayangnina papakna dai.

²¹ Usnit kat yuh wauhna atnin yulnayang dai Ahava wasni yaihnit yakat, yangna dutkina balna kidika amanglana atnikna yulni Papangkina muhni yakat, dawak kalyulnayangna dai yangna, walakinabis balna dawak dikina yayamni balna kidika bik yamni yanadu'kiuna atnin.

²² Bahang king yakat kalyultingkat aras kau kalbauyang muihni balna yawa kat ta yakat nikingnakauh yaklalauwa balna niningna yakat takitna dakna atnin kidika asalni dakanayang dai, kat king yakat uman kalyulnayangna dai bahang Papang laih witing yakat kalwawalwa muihni balna bitik kidika tingni dinit yakat awi duwi, kaunah witing yakat ruhmwi dadawa muihni balna yakat laih witing parasni dawak annin kidika witingna minitna yakat lakwi.

²³ Bahang kidika dini balna bitik yulni yuh wauhtik dawak Papang kalni dinit buknayangna, dawak witing yaklau yanadakana.

²⁴ Usnit kat sumalyang balna taninatuna duna atnin muih 12 yaknayang dai: Serebías, Hasabías dawak witingna karak kaltalyang muihni yayamni 10 yaknayang dai,

²⁵ dawak lalah, gol, makat yulnin ūni yakat dunin dini balna king witing yaihnit kau yul sumalyang balna dawak kalbauyang muihni balna duwa kidika dawak Israel muihni balna bik witingna maPapangki ūni yakat kalalana dini balna kidika paun atik dianayang dai.

²⁶ Lalah manah paun 42,900, lalah kau yamna dini balna 100 dawak gol manah paun 6,600 paun atik dianayang dai;

²⁷ baisa kidika minityakat gol sunitak balna 20, bitik kat paun 16, dawak dunin dini balna bras kau yamni sihm gol kau kapat yamna kidika bu dianayang dai.

²⁸ Usnit kat diyulnayang: “Manna dawak dunin dini balna kidika karak laih Dawan dini manayakna. Lalah dawak gol balna kidika laih mayang mamuihkibararak balna Papangnina Dawan kidika dini.

²⁹ Manna amungtalnauh sumalyang balna taninatuna balna, libait muihni taninatuna balna dawak Israel muihni walaninabis balna taninatuna balna kidika muhnina yakat paun ahawarang usnit kat manna apaktanauh Jerusalén kau Dawan ūni paskau daklana balna yakat.”

³⁰ Bahang sumalyang balna dawak libait muihni balna witingna lalah, gol dawak dunin dini balna paun ahana balna dai kidika duwi Jerusalén kau maPapangki ūni yakat duwi uina dai.

³¹ Waiku tatuna kawa kat ma 12 laihwa yakat Ahava wasni kaupak alahwik Jerusalén niningyakauh yawanayangna dai. Bahang Papangkina yaklau ta yakat yangna nikingnakauh yaklalauwa muihni balna kaupak yanalaihwi yakna dai.

³² Jerusalén yakat yawik āwanayangna mani kat, ma bās urupdanayangna dai.

³³ Ma arungka yakat laih lalah, gol dawak dunin dini balna kidika paun ahana dai Papangkina ūni yakat, dawak Urías walanibis sumalyang Meremot tingni yakat ahana dai. Adika muihni balna witing karak bangdai: Finees walanibis, Eleazar, dawak libait muihni balna Josué walanibis, Jozabad, dawak Binuy walanibis, Noadías kauna.

³⁴ Sihm kidika mani yakat bitik paun awi dawak kulwi talna dai, dawak dukiwa dini balna kidika wauhtaya yakat ulna dai.

³⁵ Usnit kat, laihwi pa ūk kau duwi uina kat nawatwi aina muihni balna kidika yaklau sakripais karauni kauna Israel Papangni yakat dawak Israel muihni balna bitik ayangnina usnit yakat busna atnin dini balna kidika diayana dai, turuh ahalmuk wawahma kidika 12, sīp ahalmuk 96, sīp kurih as duduwa balna kidika 77 dawak dutnina disnin yulni kidika laih minit dis kalanin dini sīp ahalmuk 12 diayana dai. Kidika balna bitik kidika Dawan risnipik yakat bubusna dai.

³⁶ Usnit kat king lani balna kidika diayana dai kidika sauni tatuna muihni balna yakat dawak Éufrates kaupak ma kawa niningkauh sau sahyakna kabamintni kawa balna yakat bik, witingna yaklau tawan muihni balna yakat dawak Papang ūni yakat bik ilp diayana dai.