Efesus 6 - Papang Yulni

¹ Walabis balna, papangmana yulni dakanauh, Dawan dukih kalawa kaput, kat kidika laih Papang lani kat bahang.

² Lā tatuna yakat adika pramis duwi: “Papangma dawak nanangma yakat risnipik kalatah,

³ kaput laih ismanglak atnam dawak sangmaka naini dunam sau akat.”

⁴ Dawak manna, Papangmana kidika, yamtanangkat walamanabis kulnin daukalnin awaski, kaunah sumaltanauh la kat atnin Dawan dukih kalawa kaput.

⁵ Muih dini yamyang balna, sau akat manna damanawan balna yulni daka yamtanauh. Rispik karuk yamtanauh, yamadunin dawak ismangna yakat alas lani dis, Krais dini yamtamana kapat.

⁶ Dinina yamtanauh, witingna tatalwa minitni yakat manah awaski, yamni manakulnin yulni, kauna Krais dini yamyang balna kapat, rahm palni Papang kulnin lani yayamwa kidika.

⁷ Wark kidika yamkih yamtah, Dawan dini yamtaman kapat, kaunah muih al dini yamtaman kapat laih awas.

⁸ Manna amanglanamna ki muih bitik, muih dini yamyang, pri muihni karang bik Dawan kaupak duduwarang, di yamni balna yayamna kidika minit.

⁹ Dawak manna, dawan mana kidika, dimana yamyang balna niningna yakat kaput awanauh, niningna yakat dutni yamnin kapat laih awas. Ismangna aitanauh, manna dawak witingna bik, Dawan yakat mana, witing makau kisang yakat sakkidika, dawak witing laih muih buas kau dauh dikulwaski dawak ūk balna yakat laih nuhni.

Kalbaunin spiritni kristian duwa kidika

¹⁰ Dawak waralaih, wirah balna, parasmana kidika Dawan yakat waltanauh, witing parasni nuhni duwa yakat.

¹¹ Papang yaklauwi nanitdaknin dini manana kidika kau namatna daktanauh, kaput laih manna ridi awanama sitan alas yulwa kidika niningyakat.

¹² Kat mayang kalbaudaski muih parasni niningyakat, kaunah spirit dutni makau kisang yakat kidika niningyak kalbaudi, witingna parasni duduwa kidika sau akat puksani pasyakat.

¹³ Kidika bahang, Papang yaklauwi kalbauwi nanitdaknin dini manana kidika bitik dutanauh, kaput laih ma dutni yakat sip wauhtanama, yamni ridi kalahna usnit kat parasni awanauh.

¹⁴ Kaput bahang parasni awanauh, di rahm kidika prakmana kapat awanauh, dawak barangni lani kidika karak namatna daktanauh.

¹⁵ Ban kaput ridi awanauh, kalahwi sumalnin kidika, kulnin aslah dunin yulni kidik.

¹⁶ Di bitik minityakat, kasak kulnin lani kidika kau namatna daktanauh, di dutni sinibang dahlwa kidika kaupak manalaihwi yaknin.

¹⁷ Dawak laihwi yaknin kidika laih tunama paknin dini dadasni kapat kawang, dawak Papang yulni kidika laih isparah baina kapat kawang, Spirit Holi yaklauwi kalawa kidika.

¹⁸ Makatyulnin kidika dadawinih: Papang yakat ban kaput kalyulta awanauh, Spirit yaklauwi manaduwi kiwa kidika. Ismangna abahl awanauh, kulnamna buknin awaski, dawak tawan holi kidika yulni bik mamatnayultanauh.

¹⁹ Yang yulki bik mamatnayultanauh, Papang yaklauwi yul balna yulnik kidika yāwarang, dawak kaput laih kulnin dadasni karak yulki, kaput laih Papang di malnikau duwa kidika lāih niningnakaki, yul wisamni yamni kau duwa kidika.

²⁰ Papang yaklauwi yasihna adika yulnin yulni, kidika yulni waradika silak yakat sakyang. Mamatna yultanauh, kaput laih yamadutas yulki.

Parasna yulni balna witni yakat

²¹ Tíquico, mawirahki dalani dawak barangni bik kidika Dawan warkni yakat, witing yaklauwi yang yulki balna kidika bitik duwi kiwarang, dawak bik ampatyang kidika.

²² Kidika bahang manasihtayang manna yakat, manayulna atnin ampat mayang kidika, dawak kaput laih kulnamna dulaunin.

²³ Papang kidika, Dawak Jisaskrais, wirah balna yakat diawang, kulnin aslah lani, dalani lani dawak kasak kulnin karak;

²⁴ dawak bik witing yaklauwi tingnikih kidika diwang, Dawan Jisaskrais yakat dalani tatalwa balna kidika, dalani lani satuk kalwas kidika karak.