Efesus 5 - Papang Yulni

Papang walanibis balna amput yalahnin kidika

¹ Manna, Papang walanibis witing dalani manatalwa kidika, witing yamwa kaput yamtanauh.

² Bitik kau dalani ditalnauh, Krais dalani maitalna kapat bitik kau, dawak mayang mayulki dauna kidika, sakripais walapni as kapat Papang muhni yakat.

³ Manna laih tawan holi balna kapat atnamna ki: Lā munah kalduduwas yulni kidika yulnamna bik awaski, maisihni satni balna dawak lalah dukihni kidika bik.

⁴ Yul yamni awas kidika yuyulwinih, di dauh balna kidika dawak yul dutni balna kidika bik, kat kidika dini balna laih yamni awas bahang; tanit yamni ki Papang ayangni nuhni yamtanauh.

⁵ Kat rahm kultanauh, wais kat lā munah kalduduwas kidika, dawak maisihni balna yayamwa kidika, kidika awas bik lalah dukih diawa kidika (kidika laih dawan dau as ki), Krais dawak Papang king kakawa lani yakat sip kakawas karang.

⁶ Muih alas manayulnin bik awaski yul awas balna kidika kau, kat kidika munah kuduh wah yamadahngni kaiwa kidika Papang kaupak, kidika yul dakawi yayamwas balna minitna yakat.

⁷ Manna kidika balna karak di as bik aslah duduwinih.

⁸ Manna tanit kauh laih puksani yakat yalahtamana dai, kaunah waralaih Dawan karak aslah mana yulni, yaringni yakat yalahtamana. Yaringni muihni balna kapat awanauh,

⁹ kat yaringni kidika laih, minikun talnin, barangni atnin dawak di rahm kidika minik yakwi.

¹⁰ Laihta talnauh ais kidika Dawan dukih kalawa kidika.

¹¹ Dutni lapapakwa balna kidika karak manna kalpakta lan kakalwinih; tanit yamni ki lāih yulta yaktanauh.

¹² Asalni ki yulna atnin, witingna malnikau di yayamwa balna kidika;

¹³ kaunah di balna kidika bitik yaringni yaklauwi lāih yakwi,

¹⁴ kat di bitik dāwak lāih kalahwa kidika, yaringni yakat wark yamwi. Kidika bahang yulwi: “Sahmuta, man amaman kidika; lawah dadauna balna kidika paskaupak, dawak Krais yaklauwi man yakatyaringni dahlwarang.”

¹⁵ Kaput bahang, amungtalnauh yamtamana kidika. Tapadadas kapat laih yalalahwinih, kaunah sins lani karak.

¹⁶ Adika mani balna yamni yusyamtanauh, kat mani balna adika laih dudutni bahang.

¹⁷ Mutu kapat di yayamwinih; amanglatanauh angdika Dawan kulwa kidika.

¹⁸ Wasak dadauwinih, kat kidika yaklauwi laih mailaihwatwas maiduwi kiwi; nawatkauh laih, Spirit Holi kidika manabuhng dawang.

¹⁹ Biri biri yulbautanauh salmo, dawak spirit laniwana balna karak, unbautanauh, dawak ismangna bitik Dawan ayangni nuhni yamtanauh.

²⁰ Papang yakat ban kaput tingki kalatanauh, di bitik Papangni kidika, Madakiwan Jisaskrais ayangni yakat.

Kristian balna warknina kidika

²¹ Manna biri biri kallaihnu awanauh, Krais risnipik kau.

²² Yalnina balna kidika witingna alnina yulni dakanin ki, sihm Dawan yulni dakawa kapat.

²³ Kat alni kidik laih yalni kidika tunan, sihm Krais kidika suts tunan kapat, dawak suts kidika laih muihni nuhni; dawak witing laih laihwi yakyang.

²⁴ Kaput, suts kidika Krais karak kapat, yalnina balna kidika bik alni yakat atnin ki.

²⁵ Alnina balna mana kidika, yalmana balna yakat dalani talnauh, Krais suts yakat dalani talna kapat, dawak bik witing sangnika āna kidika.

²⁶ Adika laih holi yamnin yulni yamna, maisihni dis kalyamna was kau dawak yulni karak bik libitwi

²⁷ kaput witing muhni yakat duwi kiunin suts as alasna yaksihni kapat, sani laihwas, dawak bik misikwas, kaunah holi ki dawak yamni manah ki.

²⁸ Sihm kaput bik laih alnina balna kidika yalnina yakat dalani talnin ki, sihm witing muihni kapat. Wais kat yalni yakat dalani talwa kidika laih witing muihni yakat dalani talwi.

²⁹ Kat muih as bik witing silp muihni yakat waihla talwas ki, nawatkauh laih di bayahwi, maintalwi, sihm Krais suts yakat yamwa kapat,

³⁰ kat kidika laih witing muihni nuhni. Dawak mayang laih muihni nuhni kidika tingni bikisni mayang.

³¹ “Kidika bahang muih al kidika papangni dawak nanangni dawarang, yalni karak aslah kalahnin yulni, dawak muih bu kidika kaupak muihnina aslah kalalahwarang.”

³² Akat niningkawi nuhni ampusyah, malnikau Papang di duwa kidika. Dawak yang yultayang kidika laih, Krais dawak suts kidika ki.

³³ Kidika balna bitik yakat, man yalma yakat dalani talah, man muihma kapat, dawak bik yal kidika alni yakat rispik kalawang.