Efesus 4 - Papang Yulni

Spirit karak libitna

¹ Kidika bahang yang, silak yakat sakyang kidika Dawan yulni, manayultayang yamni awanauh, Papang yaklauwi manayulwak yawanama kidika, kaput awanauh.

² Limahni awanauh dawak minikun talnin kidika dutanauh; dawak kulnamna laihwattanauh biri biri dalani lani karak;

³ Spirit Holi kaupak aslah lani kaiwa kidika laihta dutanauh, dawak kulnin aslah lani munah bitik aslah maiyamwa kidika.

⁴ Muihni nuhni asla manah ki, Spirit bik asla manah ki, dawak Papang bik tahanin aslah dunin maiyulwa kaput.

⁵ Dawan asla ki, kasak kulnin lani bik asla, dawak was utuh'yaknin bik asla ki;

⁶ Papang aslah ki, kidika laih muih bitik Papangnina, bahang witing laih di bitik minit yakat ki, di bitik pasyakat wark yamwi, dawak di bitik yakat ki.

⁷ Kauna mayang bitik Krais prisantni kidika dudi, witing yaklauwi mayana kidika.

⁸ Kidika bahang, Ulna yakat yulwi: “Makau kisang yakat kilwi kiunasilak muihni balna kidika duwi, dawak muih ahal balna yakatprisantni diana.”

⁹ ¿Dawak ais tanka yulwi mayakat “kil'kiuna” ta kidika? Kidika laih yulwi tatuna adika sauni akat kaiwi yaklakna.

¹⁰ Dawak kaiwi yaklakna kidika kuduh mayakat kilwi kiuna kidika, tanit mayakau, kaput laih di bitik buhngdanin.

¹¹ Dawak witing yaklauwi diana buas apostel atnin, dawak ūk balna yakat laih prapit atnin, dawak ūk balna kidika laih yul wisamni yamni kidika sumalnin, kaput bik ūk balna kidika laih sīp maintalyang dawak maestro.

¹² Kaput ridi yamna holi muihni balna kidika, wark yamna atnin, kidika laih Krais muihni nuhni kidika laihwi dulauwi yamnin

¹³ kaput laih bitik aslah malahwarang kat kasak kulnin kidika munah, dawak Papang walanibis al kidika amangnilanin, dawak muihbarak kaldang, kaput laih Krais yakat dadasni kalna mayang karang.

¹⁴ Walabis kapat awas mawarang, isi kulnin satuk wirlawa kidika, dawak sumalnin wisamni satuk yakat kalmurwa kidika, dāwak alas kalyuyulwi, muih ta dutni yakat uiwa balna yaklauwi.

¹⁵ Tanit yamni ki dalani lani rahm kidika sumalnin, Krais yakat baraknin ki di bitik niningyakat, kidika kuduh muihni nuhni tunan kidika.

¹⁶ Krais munah muihni nuhni kidika papatni kalwi, dawak aslah kalahna kidika yulni yamni sitwi pīsni balna bitik; dawak pīsni balna kidika bitik yamni warknina yayamwak, bitik laih barakwi dalani lani kidika karak.

Sangnika wisam Krais yakat

¹⁷ Adika yulni kuduh manayultayang kidika, dawak yamnin manapaktayang Dawan ayangni kau: Papang kau tatalwas balna karak baisa kalpapakwinih, witingna kulninna dutni yakat kiwa kidika karak yalalahwa kidika

¹⁸ dawak di amanglanin kidika puksani duduwi. Witingna laih sangnika Papang kaupak kaiwa kidika yamni alasnina duduwas ki, kat di amanglalawas balna bahang kulninna dadasni kidika yulni.

¹⁹ Kulninna dadasni kakalna dawak suhlsuhl yakat bubukna, dawak laihwatwas di maisihni balna kidika yayamna.

²⁰ Kauna manna Krais kidika amangnilatasmana dai kaput yalahnamna kidika,

²¹ kaunah rahm palni laih witing yulni dakanamana dai, dawak lan alahwanamana yalahna atnin, witing dukih kalawa kidika kaput, di rahm Jisas yakat sakkidika.

²² Kidika bahang manna tatuna kau amput yalahtamana dai kidika danamna ki, kat kidika bitik laih daukalna bahang, dukih mayawa kidika alasni yulni.

²³ Spiritmana kidika wisam yamnamna ki, amput muih lani yamnin kidika,

²⁴ mamuihki nuhni kidika wisam as dunin Papang kulnin lani kat yamna kidika, dawak kidika laih satuk kalna ki sangnika barangni dawak bik maisihnidis kidika karak, dawak kidika laih di rahm kidika munah kaiwi.

²⁵ Kaput bahang, baisa alas yuyulwinih, kauna di rahm kidika yultanauh muih yaihmatkau balna kidika yakat, kat bitik mayang laih muihni nuhni aslah kaupak malahna bahang.

²⁶ Kulnin daukalwak, dutni yamwinih, dawak kulnin daukalna kidika ma naini bitik dunin awaski.

²⁷ Sitan yakat sans kalalawinih.

²⁸ Di malwa muihni kidika, watwi malnin awaski kaunah wark kalahwang, witing tingni kau wark yamni yamwang, kaput laih dukih diawa muihni balna yakat sip karang diana atnin.

²⁹ Yul dutni yulwinih, kauna yul yamni manah yultanauh, baraknin yulni balna kidika, dawak dakakawa muihni balna kidika ilp as yaknin kidika kaupak.

³⁰ Manna yamtanangkat Papang Spiritni Holi kidika kulnin buknin awaski, kidika karak tamp manataihna kidika Papang dini balna mana kidik, mani balna kaiwak pri lani bitik palni manawarang.

³¹ Tapahlni kidika manna kaupak yakpamtanauh, wauhnin balna kidika, kulnin daukalnin, sarahnin balna, muih usnin dawak di dutni balna bitik kidika.

³² Muih yamni awanauh, dawak biri biri minikun talnin kidika dutanauh, dawak bik dutmana bik datanang diswang biri biri, Papang yaklauwi manna dutmana dāwak disna kaput Krais yakat.