Eclesiastés 1 - Papang Yulni

Di bitik laih dauh manahki

^1-2 Adika balna kuduh sumalwa muihni kulnin lani balna kidika, Devid walanibis, Jerusalén yakat king kana dai kidika. ¡Adika laih dauh alas yulni manah ki, adika laih dauh alas yulni manah ki! ¡Bitik laih dauh alas yulni manah ki!

³ ¿Muih kidika ais yakwih sau akat wark parasni yamwa manah?

⁴ Muih buas kidika laih batatahnwi, ūk balna kidika laih dadauwi, kaunah sau kidika laih satuk bik kalwas ki.

⁵ Ma kidika kalahwi, ma kidika puklakwi, dawak sirihni palni watwi pāni yakat kiwi watwi kalahna atnin yulni.

⁶ Wing kidika wadah niningyak wauhwi, dawak usnit kat tingpal niningyak awaihwi kiwi. ¡Wing kidika laih wat wat awaihwi! ¡Awaihwi watwi awaihwi!

⁷ Was balna bitik laih kuma yakat uiwi, kaunah kuma kidika laih sip bangwas ki; dawak was balna kidika laih watwi angkaupak kalalahna kat pāni yakat uiwi tani kidika munah watwi murna atnin yulni.

⁸ Sip muihni as bik diski yulna atnin di balna bitik kau ampus dilunglakwa kidika; muih as bik talwas ki dawak bik dakawas ki aitani palni isninglak kapat dana atnin.

⁹ Di as bik dis karang muhnilau kau dis dini dai kidika; di as bik kalwas karang ki muhnilau kau kalwasdai kidika dini. ¡Adika sauni akat laih di as bik wisamni diski!

¹⁰ Muih laih aput yulwarang ki: “¡Adika dini laih wisam ki!” Kaunah kidika laih uman muhnilau kau kalahna kurih andat bayakna, mayang dismayang tanitkau.

¹¹ Di balna bayakna dini kidika laih dinitkahnin yakat bubukna, dawak di balna baisa kaiwi kalahwas balna kidika bik dinitkahnin yakat bubukna karang ki usnitkauh aiwarang balna kidika pasyakat.

Sumalwa muihni di balna talwi bayakna kidika

¹² Yang, sumalyang muihni yang adika laih, Jerusalén yakat Israel kingni yang dai,

¹³ dawak kulnik aslah palni dutik sins tuhni karak waltik talnayang dai adika sauni akat di balna yamnin bitik yakat. ¡Truknin dini tikini palni Papang yaklau dana kidika muih balna minitna yakat kidika kau sau yakat dilakna atnin yulni!

¹⁴ Dawak yang amanglanayang dai adika sauni akat di balna bitik yamnin kidika dauh alas manah ki, kidika laih wing kidika laihnin kapat yamdi.

¹⁵ ¡Dawak di kawaini kalna kidika sip barangni yamdaski, dawak sip bik kul'yakdas ki di as didis kaupak!

^16-17 Bahang yang alas muihki yakat yulnayang dai: “Akat yadutamana, muih nuhni as kalna, sins nuhni duyang muhnilau kau Jerusalén yakat king kakana balna kidika karak dawakat; sins tuhni yakat dawak amanglanin yakat bik āwanayang di balna kidika waltik talna atnik yulni, dawak sins dis lani dawak tapdadas lani yakat bik āwanayang kaput karak amanglana atnik yulni kidika kaput bik wing kidika yakat laihnin yamda kidika.”

¹⁸ Rahm kidika laih, sins tuhni nuhni kat, dutni kidika nuhni palni maiyamwi; di kidika mahni palni amanglada kat, dalani kidika baisa wauhdi.