Colosas 4 - Papang Yulni

¹ Manna, dawanmana kidika, dimana yamyang balna niningna yakat lakat awanauh. Ismangnakattanauh, makau kisang yakat Dawan as dutamana kidika di balna yamtamana kidika minit dunam makau kisang kau yalahwa kidika karak.

² Laihwattas mamatnayultanauh, Papang yakat tingkih kalyultanauh.

³ Yangna yulkina bik mamatnayultanauh, kaput laih Dawan yaklauwi dūr apahwang, yangna sumalnikna kidika, Krais warkni malni kau sakkidika yulni, kat kidika yulni silak akat sakyang.

⁴ Mamatnayultanang kat yang warkki amput yamnik kidika yamkuh, lāih palni.

⁵ Kulwas muihni balna karak sins duyang awanauh, dawak ma balna adika yamni yusyamtanauh.

⁶ Yulbautamana kidika yamni atnin ki, dawak amput biri nangnitlanin kidika amanglanamna ki.

Witni yakat parasna kidika

⁷ Mawanaihki dalani Tíquico kidika, tingkisut laihyang yamni as ki, yang karak Dawan warkni yamna, yang yulki balna kidika dukiwi manawarang.

⁸ Kidika bahang manna yakat sihtayang, manayulna atnin ampatmayang kidika dawak kulnamna dulaunin.

⁹ Witing karak kiwi Onésimo kidika, mawirahki barangni kidika, witing kidika laih manna kaupak as ki. Witingna yaklauwi manayuyulwarang akat ais kalahwa balna kidika.

¹⁰ Aristarco, silak akat albu yangna kidika, manaparaswi; dawak Mark bik, Bernabé wahaini kidika. Manna Mark tannika kidika yamni amanglatamana; kiwi manatalwarang kat yamni dutanauh.

¹¹ Jisas bik manaparaswi, ayangni ūk laih Justo. Ju balna pasyakat adika balna manah ki kulyang balna kidika, Papang kingkawa lani yulni yang karak wark yayamna kidika, dawak yang nikingyakat walakianin manas dai.

¹² Epafras bik parasnin manasihwi, Krais Jisas dini yamyang as; witing bik manna kaupak as ki, bahang minityulwa balna yakat manna yulmana bik yulwi, kaput laih barangni atnamna, Papang kulnin lani yamnin kidika.

¹³ Yang laih witnisyang Epafras kasak kulwi kalbauwa kidika manna yulmana, Laodicea, dawak Hierápolis yulni bik.

¹⁴ Luk, daktar as dalani talda kidika manaparaswi, dawak Demas bik.

¹⁵ Wirah balna Laodicea yakat bangkidika bik yultanang pararaswang. Ninfa bik paraswang dawak witing ūni yakat kulyang balna kalududuhwa kidika bik.

¹⁶ Adika wauhnitaya yulta talnama usnit kat, Laodicea sutsni yakat sihtanauh, kaput laih kidika yakat bik yulwi tatalwarang; dawak manna laih, kidika kaupak wauhtaya kiwarang kidika yulta talnama.

¹⁷ Adika Arquipo yakat bik kalyultanauh: “Dawan ayangni kau wark balna papakna kidika yamni yamwang.”

¹⁸ Yang, Pal, tingki kau ultik wauhnitaya adika manasihtayang manaparastinah. Amanglatanauh yang silak kau sakyang adika. Papang tingnikih kidika manna mamatna yakat utuhwang.