Amós 9 - Papang Yulni

Papang la yamwarang kidika kaupak muih as bik kiri yaklawas karang ki

¹ Papang kidika sakkat talna yang, sakripais busnin pāni yaihnit yakat, dawak aput yayulna: “Rahni tuna kau yakat wistang kat yukwang, dūrni kawa balna yakat; ¡dawak muih minitna yakat bahwi bukwang! Dawak wais kat dauwas yaklawarang kat, isparah kau īna awaki: kirinin yayamwarang bik, as bik yaklalawas karang ki;

² sau dinit yakau kawi yakmamaldarang bik, kidika kaupak laihtik muryakki ki; dawak makau kisang mayakau kikilwarang bik, kidika yakaupak laihtik murlakki.

³ Carmelo asangni tuna yakat bik kilwi yakmamaldarang bik, yakat yawik diwalki; kaput bik yangkaupak yakmaldi, kuma tuhni yakat kawi yakmamaldarang bik, kuma paskau di dudutni balna bangyakat pakting uiwi dikakasna karang;

⁴ waihninala balna laihwi pa ūk kau duwi uiwarang bik, isparah kidika sihting kat dihina karang. ¡Yamni laih awas, dutni manah karang ki, yang mikpa yakat ban kaput duna awaki!”

⁵ Papang, witing parasni nuhni duwa kidika, sauyakat laihwakat arwi, dawak sau muihni balna kidika bitik kakaidi. Sau kidika kilwi yaklakwi awi sihm Nilo wasni kilwi yaklakwi awa kapat.

⁶ Papang, witing uni kidika laih makau kisang yakat yamna, dawak makau sangni kidika laih, sau minit yakat dana; witing yaklauwi kuma kau was kidika yulwi dukiwi, dawak sau minit yakat utuhwi. Papang laih kidika witing ayangni.

⁷ Adika papang yulwi: “Yang niking yakat Israel balnamana kidika satuk awasmana Etiopía balna karak. Kaput bik manna kidika Egipto kaupak manaduainayang, kaput bik laih filisteo muihni balna kidika, Creta kaupak duainayang, dawak Arameo balna laih kir kaupak duainayang.”

⁸ Papang talwi adika sauni muihni dutni yamyang balna yakat, dawak yulwi: “Adika sauni kaupak dismukki, kauna Jacob uni kidika laih bitik palni laih distas awaki. Yang Papangyang kat yultayang.

⁹ Paktingkat, Israel uni kidika isihna karang, sihm plawar minik isisihwa kapat lanin dini kau āwi, minik as bik sau yakat bukwas kidika.

¹⁰ Yang tawanki muihni balna dutni yamyang bitik kidika laih isparah baini kau dadauna karang: ‘Di as bik mailaihwas karang atwa balna kidika, dutni mailaihwas karang atwa kidika.’

Tanit yakat ma balna kaiwarang yakat watwi laihwi dulauwarang Israel kidika

¹¹ “Mani balna kaiwi Devid uni bukna kidika laihwi dulauna atnin. Ahlna balna kidika putna awaki, daukalna balna kidika wattik dulauki, dawak yamki tatuna dai kapat ma bayakna balna dai yakat,

¹² dawak Edom kau watwa balna kidika, kaput bik muih balna yang diki dai kidika watwi Israel duna karang pāni kidika.” Papang yaklauwi kaput witing yulni kidika kalana, bahang yakat yamwarang ki.

¹³ “Mani balna kaiwi, plawar minik kidika babahwa kat, uman sauni ridi yamni awarni kidika kaina karang, kaput bik wain kidika baisa atakwa sakkat plawar minik kidika dahnin mani karang ki. Asang nunuhni kaupak, dawak asang ubulni binina kaupak wain wasni kidika was kapat murwarang ki.

¹⁴ Kaput dawak, yang tawanki Israel, pa ūk kau laihwi duwi uina dai kidika kaupak kaina karang. Tawanni nuhni daukakalna kidika watwi laihwi dulauwi yayamna karang, dawak kidika yakat witingna yalalahna karang; wain yanimak yayamwarang, dawak kidika kaupak wainni wasni didiwarang; di dadahwarang, dawak minik balna yakwi kakaswarang.

¹⁵ Kat witing sauni palni yakat kaldahki bahang, yang sau dianayang kidika kaupak watbik dutwi yayakwas karang ki.” Papang kidika yaklauwi yulwi.