Amós 3 - Papang Yulni

Prapit warkni yamnin kidika

¹ Israel balna dakanauh, Papang tawan as Egipto kaupak yakna yakat aput kalyulwa kidika:

² “Manna manah manawaltik yaknayang, sau akat tawan balna bangkidika paskaupak. Kidika bahang man kau mayulnik karang ki dutma bitik yamnaman kidika yulni.”

³ Manna muih bu kalpakta lapaktamana kidika tanka laih kulnamna kidik kapapatki;

⁴ layan kidika asangpas yakat ihwi, kat witing di as laihna bahang; layan bin kidika urkwi pāni sulihni yakat, kat witing di as laihna bahang.

⁵ Uhu kidika sau yakat bukwi, kat laihnin dini as sakbahang; laihnin dini sau yakat bukwa kidika tanka laih umna di as laihna;

⁶ trumpit kidika tawan pasyakat puhwakat muih balna kidika kiri yaklalauwi; tawan pasyakat di dutni as kalahwa kidika laih Papang yaklauwi sihwa bahang.

⁷ Papang kidika di as bik yamwas ki, baisa pranipit balna yakat niningnakawas tanit yakat.

⁸ ¿Wais kidika yamaduwasyah layan ihwak? ¿Wais kidika Papang ayangni kau yulwas yah, witing yaklauwi pakwakat?

Samaria bahwi disna

⁹ Manna Asdod kingni uni balna yakat lawa yultanauh, dawak Egipto yakat king uni balna yakat bik: “Samaria asangni balna yakat aiwanauh; dawak talnauh kidika pasyakat di pini manah kidika, dawak kidika pasyakat kalbaunin lani manah wawauhna kidika.”

¹⁰ Papang yaklauwi yulwi: “Witingna barangni atnin kidika sip awaski; witingna kingnina ūnina balna yakat muih kaupak taihwi dinina dakyayakna kidika puwi duduwi.”

¹¹ Kaput bahang, Papang aput yulwi: “Dutni makulwa muihni as yaklauwi kidika sauni yak awaihdakwarang, tamat daknam parasni balna kidika bahwidis yamwarang, dawak kingma ūnipas kau di bangkidika bitik duwi uiwarang.”

¹² Papang aput yulwi: “Sīp maintalyang as, layan tinpas kaupak sīp kalni bik, awaskat tapan sutni manah bik laihwi yakwa kapat, kaput Israel muihni balna Samaria kau bangkidika kiri yaklalawarang, kidika muihni balna Damasco kau yalahnin pāni yudutni yamni kau yalalahwa balna kidika.”

¹³ Papang parasni nuhni duwa kidika yulwi: “Manna dakanauh dawak, Jacob tawanni yakat yul balna kidika di yultanauh,

¹⁴ kat angdika mani yang lawik Israel witing dutni yamna kidika minit kalyulki yakat, Betel kau sakripais busnin pāni balna kidika bitik dis yamki; sakripais busnin pāni tamni balna kidika dakna karang, dawak sau yakat bukwarang.

¹⁵ Wasma dawi kurih uni balna kidika bitik disyamki, ilipan anan kau ū yamna balna kidika bitik bahtik dis yamki, dawak king uni balna bitik bik daukalmukki.” Papang kaput yulwi.