Amós 2 - Papang Yulni

¹ Aput Papang yulwi: “Moab muihni balna kidika dutnina mahni palni yayamna, witingna yakat wah wistas laih datas awaki; kat witingna yaklauwi Edom kingni wakalni balna kidika bubusna, dawak wan manah yayamna.

² Kidika bahang Moab sauni yakat kuhpau lakna awaki, dawakat kidika kuhnipau yaklauwi Queriot kingni uni balna kidika busyamwarang; dawakat war kalbauwi sarahwa pasyakat, kaput bik trumpit puhwa pasyakat, Moab muihni balna kidika dadauwarang.

³ ¡King kidika tawanni papus kaupak yakki, dawak iki, dawak yaihnitkau muih nunuhni balna duwa kidika bik!” Papang yulwi.

⁴ Aput Papang yulwi: “Judá balna kidika dutnina mahni yayamna bahang witingna yakat wistas laih datas awaki; kat witingna yakat Papang yulni di sumalna kidika duduwas dadana bahang, dawak witing lani balna yakat kukulwas dadana, kauna nawatkauh sihm wayani dauh balna yakat minitna yuyulna, papangnina balna minitna yuyulna dai yakat.

⁵ Kidika bahang Judá minit yakat kuhpau lakki, dawakat kidika kuhnipau yaklauwi Jerusalén kingni uni balna kidika busna karang.”

Israel minit yakat layamwarang kidika

⁶ Papang aput yulwi: “Israel muihni balna kidika dutnina mahni palni yayamna, witingna yakat di wistas laih datas awaki; kat muih dutni yayamwas balna yakat lalah minit bakakanwi, dawak muih miniknakunni balna kidika sus as minit bakakanwi.

⁷ Muih miniknakunni balna yakat taihwi diwararauwi, dawak muih kulninna yamni anwas balna yakat, niningna yakat la kat yamnin kidika yayamwas ki. Papang kidika walanibis al karak yal aslah duduwi. Kaput yamwi yang ayangki maisihni dis kidika daukakalwi.

⁸ Asnina lalah kau wayaki wiririhna kidika kau riwi, wayani dauh ayangni kau di lakwi kakaswi, la awas karak tunan minit yakna lalahni kau wain bakanwi daninawan dauh prinias uni yakat didiwi.

⁹ Kaunah yang laih, manna yakat tamana apahnik yulni, Amorreo balna yakat bitik dis yamnayang; dawak bitik palni inayang, witingna kidika naini sihm suhun dawak iban dadasni kapat dai bik.

¹⁰ Kauna manna laih Egipto kaupak namangyaknayang, dawak kauhmak wanilang pasyakat kurih muihasluih bu tunamana dunayang manna yakat, witingna saunina kidika mananik yulni.

¹¹ Dawak manna sip alasyultasmana, Israel balna manna paskaupak, as as kidika prapit balna yamnayang, dawak ūk balna kidika laih nazareo, yamnayang.” Papang yaklauwi yulwi.

¹² “Kauna manna nazareo balna yakat taihta diyamnamana, wain bayahnin yulni, dawak prapit balna yakat yang ayangki yulnin-awas diatnamana.

¹³ Yamni ki, yang lawik sau kalmana ataktamana yakarak manalibittik taihki, sihm plawar minik kidika puwi murnin dini kau puwi bung dawak di parasni karkwa kapat.

¹⁴ Parasni iranama bik, sip ira lawas awanama, baisa parasni duwa kidika parasni dis kalwarang, dawak baisa kulnin dadasni duwa kidika bik yaklawas karang.

¹⁵ Sibang ruhmyang kidika parasni dis kalwarang, dawak bik yaklawas karang, kalni kau sirihni kira karang dawak aras kau kilwi kirarang bik.

¹⁶ Kidika mani war kalbauyang baisa kulnin dadasni bik wārni dini balna kidika dawarang kiri yaklanin yulni.” Papang yaklauwi yulwi.