2 Jan 1 - Papang Yulni

Barangni lani dawak dalani lani karak

¹ Muihbarak adika diparaswi Papang yaklauwi tawanni walwi yakwi duna yakat. Dalani manatalayang, kaunah yang manah awaski, kaunah di rahm yakat amanglalana balna bitik.

² Yang bik manna kau dalani manatalayang barangni lani maising kau duwa kidika yulni dawak witingna bik mayang karak albu karang kidika.

³ Mapapangki dawak Jisas Krais, witing Walanibis kidika, manna kau tingkih kidika manautuhwarang dawak minikunni lani bik mawarang dawak isning aslah lani bik, kidika laih barangni lani dawak dalani karak bik.

⁴ Yang alasna alahwayang manna kaupak balna as as kalpaknayang kidika rahm lani kat yalalahwa kidika yulni, Mapapangki yaklauwi mayang kau yamnin maiyulna kidika kaput.

⁵ Waralaih, wirah dalani balna, manna kau kalmana dinit buktayang mayang biri biri dalani talnin. Adika manaultayang adika laih la wisam as awas ki, kaunah mayang tanit mani kaupak dunamayang kidika ki.

⁶ Dalani lani kidika laih Papang lani balna amput kat kaput yalahnin kidika ki, dawak kidika lani laih, manna uman tanit mani kaupak dakanamana dai kaput, bitik laih dalani lani kau yalahtanauh.

Alas yulyang balna

⁷ Kat sau akat muih kau alas yulyang balna mahni bangki, witingna laih Jisas Krais tannika tatalwas dawak witingna yuyulwi, witing kidika muih kaput kaiwas dai sumalwi. Wais bik kaput yamwa kidika witing laih alas yulyang as ki dawak Krais waihnila nuhni palniki.

⁸ Manna amungtalnauh adika muihni balna karak, kaput laih manna wark yamtamana kidika dauh disnin awas yulni, kaunah kidika minit bitik laih mamat mawarang.

⁹ Wais yaklauwi witing Krais di sumalwa kidika tanit bayaknin kulwarang kidika, witing Papang duwaski; kaunah wais di sumalna yakat pawatwa kidika laih, Papang kidika duwi, dawak Walanibis kidika bik.

¹⁰ Muih as yaklauwi manna pasmangna kau kaiwi dawak adika sumalnin lani duwas kat, manna ūmana balna kau bik duwinih dawak bik kalparaswinih;

¹¹ kat wais yaklauwi witing karak yul bauwarang kat kidika pātni nuhni kidika witingna albu duwarang bahang.

Witni yulni balna

¹² Yang baisa di mahni dutayang manna kau manayulnik, kaunah wauhtaya karak manayultas awaki. Tahatayang yawik manatalnik dawak manna karak yulbaunik yang palni, kaput laih ma-alaskina kidika aitani palni karang.

¹³ Kidika suts pasyakat wirahmana yal kidika, Papang yaklauwi walwi yakna, bahang parasnin manasihwi.