1 Timoti 5 - Papang Yulni

Kulyang balna karak amput atnin kidika

¹ Muihbarak yakat bilwinih; nawatkauh, yul kalyultah sihm man papangma kapat; dawak wawahma balna yakat laih sihm man wirahma balna kapat diyamtah.

² Muih yayal muihbararak balna kidika laih sihm man nanangma kapat diyamtah; dawak yayal sirarau balna kidika laih, sihm man wirahma yayal balna kapat diyamtah, maisihni lani dis karuk.

³ Yayal tingmak muih as kau bik uinin muihni dis kidika balna yakat ilp diatah.

⁴ Kaunah yal tingmak as walanibis ahal kidik awaskat mani balna duwa laih, witingna kidika ki tatuna wanaihnina balna yakat ilp dianinna muihni balna kidika dawak papangnina balna dalani kidika yakat bik dinina yamna atnin, kat adika laih Papang yamni talwa bahang.

⁵ Rahm yal as tingmak kidika laih, witing alas watna kidika, witing tahanin lani kidika Papang tingni yakat āwi dawi dawak madah, pukta minit yulwi kalni dinit bukwa kidika bik dawas ki.

⁶ Kaunah yal tingmak as alasna lani yakat kāwa kidika laih, sangnika kidika laih dauna.

⁷ Adika dini balna bik yamnin diyultah, kaput laih dibilwas atnin yulni.

⁸ Bahang angdika muihni witing dini balna kidika yulni kulwi kalbauwas kidika laih, dawak witing sulani balna palni yulnina, kidika laih rahm kulnin lani kidika dana dawak kulwas muihni balna kidika laih baisa dutni ki.

⁹ Yayal tingmak balna ayangnina ahana kidika laih kurih 60 minitkauh duduwa balna kidika manah bang-atnin ki dawak marid al aslah duduna dai kidika.

¹⁰ Kidika muihni balna laih witingna di yayamwa kidika munah amangninalana atnin ki, walaninabis balna yamni mumuhna kidika, witing ūni yakat muih balna uiwakat yamni diduna kidika, kulyang balna kalnina suhna kidika dawak dalani wauhyang balna yakat ilp diana kidika yulni bik. Witni kat, wark yayamni balna bitik yamna kidika yulni.

¹¹ Kaunah yayal tingmak balna kurihnina kuihwas duduwa kidika laih ayangnina āwinih; kat witingna silp dukih diawa kidika yulni Krais kaupak naikau kalalahwi, watwi marid malahwang atwi

¹² dawak praninamis kidika yakat dutni yamna kaldakakawi.

¹³ Baisa kidika minityakat ū ūk ūk kau uiwi, dawak baskiwah kakalwi; dawak baskiwah manah bik kakalwaski, kaunah muih yulni yulwi karinin, di balna bitik yakat kakawi dawak yulnin dini awas kidika bik yuyulwi.

¹⁴ Kidika bahang yang dukih yawi yayal tingmak sirarau balna kidika marid kalahna atninna, walaninabis duwa atninna, ū yakat wark balna yamna atninna dawak witingna niningnakauh yaklalauwa balna yakat didadawakat niningnakauh yulninna awas.

¹⁵ Bahang yayal tingmak balna buas laih uman naikau kalahwi sitan usnit uhuina.

¹⁶ Muih yal kulyang muihni as witing sulani balna pasyakat yal tingmak as duwakat, ilp kalanin ki, suts truknin dini awas atnin; kaput laih suts kidika yaklau tingmak yayal balna muih as kau bik uinin muihni dis kidika balna yakat ilp diana karang.

¹⁷ Muihbararak balna suts yakat yamni tunan duduwa balna kidika laih wat bu praisni yamni diyamna atnin ki, sumamalwa muihni balna kidika yakat.

¹⁸ Bahang ulna yakat aput yulwi: “Wark tuniruh almuk plawar minik unitak yakwa tinpas kidika sitwinih.” Dawak aput bik yulwi: “Wark kalahyang muihni kidika laih minit duna atnin rahmni duwi.”

¹⁹ Man dakawinih muihbarak as niningkauh yulni yayakwakat, witnis muihni bu kidik awaskat bās ilpni kakawas kat.

²⁰ Angdika muihni balna ban tanitna yakat dutni yayamwa kidika laih, muih balna bitik muhnina yakat dibilna atnam ki, muih ūk balna kidika yamaduna atninna yulni.

²¹ Papang, Jisas Krais dawak insal balna walwi yakna kidika muhnina yakat yamnin mayultayang, adika lani balna usnit uitah muih balna kidika satuk satuk talas dawak yamni talas karak bik.

²² Muih as yakat bik tingma dulauwinih yamni kulta talasman tanityakat, muih ūk balna dutnina kidika yulni man bik pāt dunam awas yulni. Di dudutni balna bitik kaupak maisihni dis awah.

²³ Man bama yakat siknis man kidika, was manah diwinih, kaunah wain bik apis ditah.

²⁴ Muih buas balna dutnina kidika laih lāih palni ki lanina yamwas tanitkauh yakat, kaunah ūk balna kidika laih usnit kat lāih kalahwi.

²⁵ Sihm kaput bik, wark yayamni balna kidika bik lāih kalahwi; dawak yayamni awas balna kidika laih ban kaput malni yakat wawatwas karang ki.