1 Timoti 3 - Papang Yulni

Tunan duyang muihni balna amput atninna kidika

¹ Adika laih rahm palni ki: muih as witing suts yakat tunan dunin kulwa muihni kidika laih, wark yamni dunin kulwi.

² Kidika bahang, angdika muihni adika warkni duwa kidika laih sip muih yakat bilwaski. Muih yal aslah maridni atnin ki dawak sangnika as yamni dawak rispik lani karuk atnin ki. Ma balna bitik yakat witing agha atnin ki ūni kidika muih diawakat payahninna; sumalnin bik sip atnin ki;

³ wasak diyang atnin awaski dawak kalbauyang atnin bik awaski, kaunah dalani lani, kulnin aslah lani dawak lalah kidika yakat bik kulwas atnin ki.

⁴ Witing ūni kidika yamni tunan duna atnin ki dawak walanibis balna kidika bik yul kat dakaninna ki dawak di yayamwa balna kidika bik barangni atnin ki;

⁵ kat muih as witing silp ūni kidika kat bik tunan duwi sip awas kat, ¿amput maintalwaranyah Papang sutsni kidika?

⁶ Kaput bahang, tunan duyang muihni kidika laih wisam kulnin wirlana atnin awaski, witing manah kapat kaldakawi sitan bukna kidika pātni yakat buknin awas yulni.

⁷ Kukulwas muihni balna pasyakat bik rispik kalyamninna ki, rispik dis lani yakat dawak sitan laihnin dini yakat bik bukwas atnin yulni.

Suts dini yamyang balna amput atninna kidika

⁸ Kaput bik, suts dini yamyang balna kidika laih rispik ahalni atninna ki, alas yulwas dawak wasak bik diwas atninna ki dawak di malwi duninna bik awaski.

⁹ Yul rahm manikingkana kat kulda kidika yakat kulninna ki, dawak kulninna bik maisihni dis yalahninna ki.

¹⁰ Tatuna kidika laih wauhnin mani apis bayakninna ki, dawak usnit kat, witingna niningna kauh di as bik dis laih, suts dini yamyang atninna karangki.

¹¹ Sihm kaput bik, muih yayal balna kidika bik rispik lani, muih yulni yulwas atninna, pini karinin awas dawak di balna bitik yakat barangni atninna ki.

¹² Suts dini yamyang as kidika laih muih yal aslah maridni atnin ki, dawak witing walanibis balna kidika dawak ūni kidika bik tunan duwi sip atnin ki.

¹³ Kat suts dini yamyang balna witingna warknina balna yamni yayamwa kidika laih, rispik pāni as duduwi, dawak yamni kulna lani karuk witingna Jisas Krais yakat rahm kulnin lani duduwa kidika yuyulna karang.

Masutski yulni rahm manikingkana kidika

¹⁴ Yang sirihni yawik matalnik kultayang; kaunah adika wauhnitaya maultayang

¹⁵ sirihni yawas awaki kat, man amanglana atnam muih as kidika amput di balna yamnin kidika Papang walanibis balna pasyakat, kidika laih warmani kat Papang sutsni kidika ki, kidika yaklau di rahm yakat laihwi duwi dawak bik tanitdakwa kidika.

¹⁶ Mayang rahm kuldi masutski yakat di rahm manikingkana kidika laih di as nuhni ki: Krais laih sihm muih al kapat kalwi kalahna, sihm spirit kapat kalwi minitbayakna dawak insal balna yaklauwi kaltatalna dai. Nisan balna yakat diyuyulna dai, sau akat rahm kalkukulna dai dawak alasna yaksihni kidika duna dai.