1 Timoti 2 - Papang Yulni

Makat yulnin disumalna kidika

¹ Di bitik tanit yakat manayultayang yultanauh, mamatna yultanauh, kalni dinit buktanauh dawak Papang yakat tingkih lani kalatanauh muih balna bitik yulnina.

² Kabamint kayang balna yulnina dawak la tunan muihni balna bitik yulnina bik mamikit yulnin ki, masangkika alasna dawak makulnik bik aslah duna atnin yulni, di balna bitik kau Papang yakat rispik yamna atnin.

³ Adika laih yamni ki dawak Mapapangki mailaihwi yakyang bik yamni talwi,

⁴ bahang witing laih dukih kalawi muih bitik laihwi yaknin lani kidika duna atninna dawak di rahm kidika bik amanglana atninna.

⁵ Kat Papang ūk dis aslah ki, dawak muih al aslah atnin ki Papang dawak muih balna kidika karak walsah yakat: kidika laih Jisas Krais.

⁶ Kat witing laih daunin tingni yakat kana muih balna bitik laihwi yakna atnin yulni dawak witing muhnilau mani balna yakat witnis yulna dai kaput.

⁷ Adika yulnin laih, yang laih yul trukyang dawak apostel bik āwanayang, dawak yayulna rahm kulnin lani kidika dawak yul rahm yulni kidika bik Ju muihni balna awas yakat disumalna atnik. Yang yultayang kidika laih rahmki; alas yultasyang.

⁸ Kaput bahang, yang dukih yawi muih balna bitik kidika pa balna bitik yakat minitna yulna atninna, dawak witingna tingnina kidika Papang yakat dulalauwang isningna maisihni dis karak dawak kulnin daukalna dis dawak kalbilna lani dis karak bik.

⁹ Dawak dukih yawi muih yayal balna kidika prak yamni kana atninna, di yamni kalyamnin awas, basni yamni kusna bik awas, gol, kipala minit nuhni karak bik awas kidik awaskat asna minit nuhni dini kidika bik awas.

¹⁰ Kaunah wark yayamni balna karak, muih yayal Papang dini kalalahna balna yamninna kaput.

¹¹ Muih yal kidika laih ap dakanin ki yul sumalwa balna yakat, dinit yakat bukninki;

¹² dawak yang muih yal kidika kaldatasyang muih balna muhnina yakat sumalna atnin dawak muih al yakat bik taihwi duna atnin. Yang dukih yawi muih yal kidika ap atnin,

¹³ kat Papang laih Adam kidika tatuna yamna bahang dawak usnitkat Eva;

¹⁴ dawak Adam yakat laih alas kalyulwas dai, kaunah muih yal kidika yakat alas kalyulna dai; dawak alas kalyulna kidika yulni, dutni yakat bukna dai.

¹⁵ Kaunah yal kidika laihwi yaknin lani duwarang nanang kapat yamnin balna kidika kat yamwarang kat, dawak witing rahm kulnin lani kidika, dalani lani, dawak holi atnin lani kidika yakat bik yamni karang kat.